ପୁରୀ: ବଡ଼ଦାଣ୍ଡରେ ଅଟକିଛି ତିନି ରଥ । ନନ୍ଦିଘୋଷ, ତାଳଧ୍ୱଜ ଆଉ ଦେବଦଳନ ରଥ ଉପରେ ବିରାଜମାନ କରିଛନ୍ତି ଜଗତର ନାଥ ଶ୍ରୀଜଗନ୍ନାଥ, ବଳଭଦ୍ର ଆଉ ଦେବୀ ସୁଭଦ୍ରା । ଗତକାଲି ଯେଉଁଠି ରଥ ଅଟକିଛି, ଆଜି ସେଇଠୁ ପୁଣି ଆରମ୍ଭ ହେବ ରଥଟଣା ।

ଆଜି ସକାଳ ସାଢ଼େ ୯ଟାରୁ ପୁଣି ରଥଟଣା ହେବାକୁ ଥିବା ବେଳେ ସନ୍ଧ୍ୟା ସୁଦ୍ଧା ତିନି ରଥ ଶରଧା ବାଲିରେ ପହଞ୍ଚିବା ଲକ୍ଷ୍ୟ ରହିଛି । ଏହା ପରେ ଶନିବାର ଚତୁର୍ଦ୍ଧାମୂର୍ତ୍ତିଙ୍କର ଆଡ଼ପ ବିଜେ ଅନୁଷ୍ଠିତ ହେବ । ଗତକାଲି ଦିନସାରା ପ୍ରଭୁଙ୍କ କୃପା ବର୍ଷା ଭଳି ଶ୍ରାବଣର ଝିପିଝିପି ବର୍ଷା ଲାଗି ରହିଥିଲା । ହେଲେ ଏ ବର୍ଷା କି ବାଧା କ'ଣ ଜଗନ୍ନାଥ ପ୍ରେମୀଙ୍କୁ ଅଟକାଇ ପାରିଥାନ୍ତା ?

ଏଥିସହ ପଢ଼ନ୍ତୁ: କାହିଁକି ମହାପ୍ରଭୁଙ୍କ ମସ୍ତକରେ ଲାଗେ ଟାହିଆ ? ଜାଣନ୍ତୁ ଅଜଣା ଇତିହାସ

ଜମାରୁ ନୁହେଁ ! ସେଇ ଭକ୍ତିର ଦଉଡ଼ିକୁ ହାତରେ ଧରି ଗୁଣ୍ଡିଚା ମନ୍ଦିର ଅଭିମୁଖେ ବଡ଼ଠାକୁରଙ୍କୁ ନେବା ପାଇଁ ପ୍ରତିଟି ଜଗନ୍ନାଥ ପ୍ରେମୀ ଚାହିଁ ରହିଛନ୍ତି । ଗତକାଲି ରାତିସାରା ମୁକ୍ତ ଆକାଶ ତଳେ ରଥ ଉପରେ ବିରାଜମାନ କରିଥିଲେ ଚତୁର୍ଦ୍ଧାମୂର୍ତ୍ତି । ପ୍ରଭୁଙ୍କ ଏହି ଦୁର୍ଲଭ ରୂପକୁ ଆଖିପୂରାଇ ଦର୍ଶନ କରିବା ପାଇଁ ବଡ଼ଦାଣ୍ଡରେ ଭକ୍ତଙ୍କ ଅସମ୍ଭାଳ ଭିଡ଼ ଦେଖିବାକୁ ମିଳିଥିଲା ।

ଶୁକ୍ରବାର ରଥଟଣା ଓ ଶନିବାର ଆଡ଼ପ ବିଜେ ନେଇ ଗୁରୁତ୍ବପୂର୍ଣ୍ଣ ସୂଚନା ଦେଇଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ । ସେ କହିଛନ୍ତି, "ଆଜି ସକାଳ ୯ଟା ୩୦ରେ ଆରମ୍ଭ ହେବ ରଥଟଣା । ଆଜି ରଥ ଉପରେ ସମ୍ପନ୍ନ ହେବ ସବୁ ନୀତିକାନ୍ତି । ସନ୍ଧ୍ୟା ପୂର୍ବରୁ ଶ୍ରୀଗୁଣ୍ଡିଚା ମନ୍ଦିର ପହଞ୍ଚିବେ ତିନି ରଥ । ତେବେ ଆଜି ହୋଇପାରିବ ନାହିଁ ଆଡ଼ପ ମଣ୍ଡପ ପହଣ୍ଡି । ଶନିବାର ମହାପ୍ରଭୁ ଆଡ଼ପ ମଣ୍ଡପ ବିଜେ କରିବେ ।

ଏଥିସହ ପଢ଼ନ୍ତୁ: ବଡ଼ଦାଣ୍ଡରେ ଦିବ୍ୟ ତିନି ରଥ; କେଉଁ ରଥ ଦର୍ଶନ କଲେ ମିଳେ କେଉଁ ଲାଭ ?

ଗତକାଲି ଆଲୋକ ଅଭାବ ପାଇଁ ରଥଟଣା ବନ୍ଦ କରାଯାଇଥିଲା । ରଥଟଣା ବନ୍ଦ କରିବାକୁ ପରାମର୍ଶ ଦେଇଥିଲେ ଭୋଇ ସର୍ଦ୍ଦାର । ଘୋଷଯାତ୍ରାରେ ପ୍ରତିକୂଳ ପାଗ ସତ୍ତ୍ବେ ଶ୍ରୀକ୍ଷେତ୍ରରେ ୧୦ରୁ ୧୨ ଲକ୍ଷ ଭକ୍ତଙ୍କ ସମାଗମ ହୋଇଥିଲା । ସୁରକ୍ଷା ଦୃଷ୍ଟିରୁ ସନ୍ଧ୍ୟାରେ ରଥଟଣା ବନ୍ଦ କରାଯାଇଥିବା ଶ୍ରୀମନ୍ଦିର ମୁଖ୍ୟ ପ୍ରଶାସକ କହିଛନ୍ତି ।