ମହାପ୍ରଭୁଙ୍କ ସ୍ନାନ ଲୀଳା ପାଇଁ ପ୍ରସ୍ତୁତ ହେଲାଣି ମର୍ତ୍ତ ବୈକୁଣ୍ଠ ଶ୍ରୀକ୍ଷେତ୍ର ପୁରୀ... ସ୍ନାନ ପହଣ୍ଡି ଦେଖିବାକୁ ୧୫୦ ଟଙ୍କାର ସର୍ବାଧିକ ୧୦ହଜାର ପହଣ୍ଡି ଟିକେଟ ହେବ ବିକ୍ରି । ଭକ୍ତଙ୍କ ସୁରକ୍ଷା ପାଇଁ ମୁତୟନ ହେବେ ୭୯ ପ୍ଲାଟୁନ୍ ପୋଲିସ୍ ଫୋର୍ସ । ମାର୍କେଟ ଛକରୁ ବ୍ୟାରିକେଡ଼ ଦେଇ ଯିବେ ଭକ୍ତ । ସେପଟେ ପହଣ୍ଡି ବେଳେ କିମ୍ବା ସ୍ନାନ ବେଦୀରେ ଶ୍ରୀଅଙ୍ଗ ଛୁଇଁବାକୁ ହୋଇଛି ନିଷେଧ । ସିସିଟିଭି ମନିଟରିଂରେ ରହିବ ଆନନ୍ଦ ବଜାର ଓ ସ୍ନାନ ବେଦୀ ଚତୁଃପାର୍ଶ୍ୱ ।

ଆଉ ମାତ୍ର ଦୁଇ ଦିନପରେ ମର୍ତ୍ତ୍ୟ ବୈକୁଣ୍ଠ ଦେଖିବ ଦେବଲୀଳା । ଭକ୍ତଙ୍କ ଶୃଙ୍ଖଳିତ ଦର୍ଶନ ପାଇଁ ମାର୍କେଟ ଛକ ଯାଏଁ ଲମ୍ବିଲାଣି ବ୍ୟାରିକେଡ଼ । ପ୍ରଶାସନିକ ପ୍ରସ୍ତୁତି ଜୋର୍ ଧରିଥିବା ସ୍ନାନ ପୂର୍ଣ୍ଣିମା ପାଇଁ ପ୍ରସ୍ତୁତ ରହିଛି ସ୍ୱତନ୍ତ୍ର ବ୍ୟବସ୍ଥାବଳୀ । ସ୍ନାନ ପୂର୍ଣ୍ଣିମା ପାଇଁ ୭୯ ପ୍ଲାଟୁନ୍ ଫୋର୍ସ ମୁତୟନ ରହିବେ । ୧୫ ଜଣ ଏସପି ପାହ୍ୟାର ଅଧିକାରୀ ସମେତ ୩୦ ଡିଏସପି ନେବେ ଦାୟିତ୍ୱ ।

ଏଥି ସହିତ ସବ୍ ଇନ୍ସପେକ୍ଟର ଓ ଆସିଷ୍ଟାଣ୍ଟ ସବ୍ ଇନ୍ସପେକ୍ଟର ପାହ୍ୟାର ୩୨୦ ଅଫିସର୍ ମୁତୟନ ରହିବେ । ଶ୍ରୀମନ୍ଦିର ଭିତର, ବାହାର, ଟ୍ରାଫିକ, କଣ୍ଟ୍ରୋଲ ରୁମ୍, ରୁଫ ଟପ୍ ଆରେଞ୍ଜମେଣ୍ଟ ଏଭଳି ପର୍ଯ୍ୟାୟରେ କ୍ରାଉଡ୍ ମ୍ୟାନେଜମେଣ୍ଟ ଓ ସୁରକ୍ଷା ମ୍ୟାନେଜମେଣ୍ଟ କରିବ ପୋଲିସ୍ । ଶ୍ରୀମନ୍ଦିର ଭିତର ବାହାର ହୋଇ ୧୪ ସେକ୍ଟରରେ ସୁପରଭିଜନ କରିବେ ଦକ୍ଷ ଅଫିସର୍ ।

ଅନ୍ୟପଟରେ ୧୫୦ ଟଙ୍କା ବିଶିଷ୍ଟ ୧୦ ହଜାର ପହଣ୍ଡି ଦର୍ଶନ ଟିକେଟ ବିକ୍ରି ପାଇଁ ହୋଇଛି ପ୍ରଶାସନିକ ନିଷ୍ପତ୍ତି । ସେପଟେ ବ୍ୟବସ୍ଥାବଳୀ ଉଲ୍ଲଂଘନ ହେଲେ କାର୍ଯ୍ୟାନୁଷ୍ଠାନ ନେବାକୁ ଉଲ୍ଲେଖ ରହିଛି । ସ୍ନାନ ମଣ୍ଡପକୁ ବିଜେ ସମୟରେ ୧୫୦ ଘଣ୍ଟୁଆ ଓ ମଣ୍ଡପରୁ ବାହୁଡ଼ା ବିଜେ ବେଳେ ୮୪ ଜଣ ଘଣ୍ଟୁଆ ଘଣ୍ଟ ବଜାଇବାକୁ ବ୍ୟବସ୍ଥାବଳୀରେ ଉଲ୍ଲେଖ ରହିଛି ।

ଠାକୁର ରୁନ୍ଧା ହେବା ପରେ ସମ୍ମୁଖ ଭାଗରେ ରହିବା ତଥା ଶ୍ରୀଅଙ୍ଗରେ ଭରା ଦେଇ ଛିଡା ହେବାକୁ ରହିଛି ବାରଣ । ଗଜବେଶକୁ ଅକ୍ଷତ ରଖିବା ନିମନ୍ତେ ଦଇତାପତି ନିଯୋଗର ସହଯୋଗ କରିବାକୁ ୬ ଦକ୍ଷ ପୋଲିସ ଅଧିକାରୀଙ୍କୁ ମୁତୟନ କରାଯିବାକୁ ନିଷ୍ପତ୍ତି ହୋଇଛି। ଶ୍ରୀଜିଉଙ୍କୁ ଦର୍ଶନାର୍ଥି ସ୍ପର୍ଶ କରିବାକୁ ନିଷେଧ ରହିଛି ।

ସ୍ନାନଯାତ୍ରା ପାଇଁ ପୋଲିସ୍ ତରଫରୁ ଟ୍ରାଫିକ ଆଡଭାଇଜରି ଜାରି ହୋଇଛି । ଦୁଇଚକିଆ ଯାନକୁ ସର୍ବାଧିକ ମାର୍କେଟ ଛକ ପର୍ଯ୍ୟନ୍ତ ଓ ଚାରି ଚକିଆ ଯାନକୁ ଶ୍ରୀସେତୁ ଦେଇ ଜେବିପିସି ପର୍ଯ୍ୟନ୍ତ ଅନୁମତି ରହିଛି । ପାର୍କିଂ ଫୁଲ ଥିଲେ ଅନ୍ୟ ବିକଳ୍ପ ଜାରି ହୋଇଛି ।