ସେପ୍ଟେମ୍ବର ୧୫ ସୁଦ୍ଧା ଶ୍ରୀମନ୍ଦିରରେ ଆରମ୍ଭ ହେବ ଧାଡ଼ି ଦର୍ଶନ

ଭୁବନେଶ୍ଵର: ଖୁବଶୀଘ୍ର ପୁରୀ ଶ୍ରୀମନ୍ଦିରରେ ଆରମ୍ଭ ହେବ ଧାଡ଼ି ଦର୍ଶନ । ଶ୍ରୀମନ୍ଦିର ପରିଚାଳନା କମିଟି ଗଠନ ପରେ ପ୍ରଥମ ବୈଠକରେ ହୁଣ୍ଡି ସ୍ଥାନାନ୍ତରଣ ନେଇ ନିଷ୍ପତ୍ତି ନିଆଯିବ । ଏହା ପରେ ସେପ୍ଟେମ୍ବର ୧୫ ସୁଦ୍ଧା ଶ୍ରୀମନ୍ଦିରରେ ଧାଡ଼ି ଦର୍ଶନ ପ୍ରକ୍ରିୟା ଆରମ୍ଭ ହେବ ବୋଲି ସୂଚନା ଦେଇଛନ୍ତି ଆଇନ୍ ମନ୍ତ୍ରୀ ପୃଥ୍ଵୀରାଜ ହରିଚନ୍ଦନ ।

ମନ୍ତ୍ରୀ କହିଛନ୍ତି, ହୁଣ୍ଡି ସ୍ଥାନାନ୍ତରଣର ଗୋଟିଏ ସପ୍ତାହ ମଧ୍ୟରେ ଧାଡ଼ି ଦର୍ଶନ ନେଇ ପ୍ରକ୍ରିୟା ଆରମ୍ଭ ହେବ । ପରିଚାଳନା କମିଟି ପ୍ରଥମ ବୈଠକର ୪ରୁ ୫ ଦିନ ମଧ୍ୟରେ ଏନେଇ କାମ ଆରମ୍ଭ ହେବ । ଶ୍ରୀମନ୍ଦିରରେ ଧାଡ଼ି ଦର୍ଶନ ଆରମ୍ଭ ହେଲେ ଭକ୍ତ ସୁରୁଖୁରୁରେ ଦର୍ଶନ କରିପାରିବେ । ବାହାର କାଠ ପାଖରେ ଆଉ ଭିଡ଼ ହେବ ନାହିଁ । ଦର୍ଶନ ପରେ ଶ୍ରଦ୍ଧାଳୁ ଫେରିବାର ପ୍ରକ୍ରିୟା ଠିକ୍ ଭାବେ କରାଯିବ ।

ଶ୍ରୀମନ୍ଦିରରେ ମହାପ୍ରସାଦ ବିକ୍ରୟ ଲାଗି ରେଟ୍ ଚାଟ୍ ଲାଗିବ । ସୁଆର ନିଯୋଗ ସହ ମନ୍ଦିର ପ୍ରଶାସନ ଏନେଇ ଆଲୋଚନା କରିଥିବା କହିଛନ୍ତି ଆଇନ୍ ମନ୍ତ୍ରୀ । ଏଥିସହ ଜ୍ଞାନଯଜ୍ଞ ମଣ୍ଡପ ଲାଗି ଡିପିଆର୍ ସରିଥିବା ଏବଂ ଖୁବଶୀଘ୍ର ଟେଣ୍ଡର ଡକାଯିବ ବୋଲି କହିଛନ୍ତି ଆଇନ୍ ମନ୍ତ୍ରୀ ।

ଓଡ଼ିଶା ସମ୍ପର୍କିତ ଅଧିକ ଖବର ପଢ଼ନ୍ତୁ