ଅର୍ଗସ ବ୍ୟୁରୋ : ଭୁବନେଶ୍ଵର ପାୱାର ହାଉସ ଛକରେ ହୋଇଥିବା ହିଟ୍‌ ଆଣ୍ଡ ରନ୍‌ ମାମଲାକୁ ନେଇ ବିବାଦରେ ବିଶାଲ । ପୂର୍ବତନ ମନ୍ତ୍ରୀ ନବ ଦାସଙ୍କ ପୁଅ ତଥା ବର୍ତ୍ତମାନର ଝାରସୁଗୁଡା ବିଧାୟିକାଙ୍କର ଭାଇ ହୋଇଥିବାରୁ କୁଆଡ଼େ ତଥ୍ୟ ଥିଲେ ବି କାର୍ଯ୍ୟାନୁଷ୍ଠାନ ଗ୍ରହଣ ଲାଗି କୁନ୍ଥୁକୁନ୍ଥୁ ହେଉଛି ପୋଲିସ । ସେପଟେ ବଢିଲା ଝିଅକୁ ହରାଇ ମୁଣ୍ଡ ବାଡେଇ କାନ୍ଦୁଛି ମାଆ, ଛାତି ପିଟି କାନ୍ଦୁଛନ୍ତି ବାପା ।

ଘନଉଛି ରେଞ୍ଜ ରୋଭର ବିବାଦ । ଏହି ବହୁଚର୍ଚ୍ଚିତ ଦୁର୍ଘଟଣାରେ ବିଜେଡି ବିଧାୟିକାଙ୍କ ଭାଇ ବିଶାଲ ଦାସଙ୍କୁ ମିଳୁଛି ସୁରକ୍ଷା କବଚ । ଦିନ ଦ୍ଵିପ୍ରହରରେ ବାଇକକୁ ପିଟିଥିଲା ରେଞ୍ଜରୋଭର । ଆଉ ଦୁର୍ଘଟଣାର ଶିକାର ହେବା ପରେ ଆଖି ବୁଜିଥିଲେ ଲୋପାମୁଦ୍ରା । ଆଉ ଏବେ ବି ମେଡିକାଲରେ ଜୀବନ ବଂଚାଇବାକୁ ଗାଡି ଚାଳକ କରୁଛନ୍ତି ସଂଘର୍ଷ । ହେଲେ ଗାଡି କେମିତି ଦୁର୍ଘଟଣା ହେଲା ? ଦୁର୍ଘଟଣା ଦିନ ଗାଡିରେ କିଏ କିଏ ଥିଲେ ? କାର୍ଯ୍ୟାନୁଷ୍ଠାନ ନେବାକୁ ପୋଲିସ କାହିଁକି ଡେରି କରୁଛି ? ସେନେଇ ସାଧାରଣରେ ପ୍ରଶ୍ନ ଉଠୁଥିବା ବେଳେ ବିଜେଡିର ଖାସ୍‌ ବିଧାୟିକାଙ୍କ ବିଶାଳ ଭାଇ ହୋଇଥିବାରୁ ତାଙ୍କୁ ସାତଖୁଣ୍ଡ ମାଫ୍‌ ବୋଲି ଚର୍ଚ୍ଚା ଜୋର ଧରିଛି ।

ମଙ୍ଗଳବାର ରାଜଧାନୀର ରାଜରାସ୍ତାରେ ରେଞ୍ଜ ରୋଭର ଧକ୍କାରେ ତିନି ଦିନ କାଳ ଜୀବନ ସହ ଯୁଝି, ଯୁଝି ଯାଜପୁର ବରୀ ଅଞ୍ଚଳର ଲୋପାମୁଦ୍ରା ଆଖି ବୁଜିଛନ୍ତି । OD-23-K-0006 ନମ୍ବର ବିଶିଷ୍ଟ ଏକ ରେଞ୍ଜ ରୋଭର ଧକ୍କାରେ କଟକର ଏକ ଘରୋଇ ହସ୍ପିଟାଲରେ ଲୋପାମୁଦ୍ରାଙ୍କ ଜୀବନ ଯିବା ପରେ ଭୁବନେଶ୍ୱରର ଘରୋଇ ହସ୍ପିଟାଲରେ ଜୀବନ ସହ ଲଢୁଛନ୍ତି ଅବସରପ୍ରାପ୍ତ ସିଆଇଏସ୍ଏଫ୍ ଯବାନ କାହ୍ନୁଚରଣ ନାୟକ । ଗୁରୁତ୍ଵପୂର୍ଣ୍ଣ କଥା ହେଲା ସାଧାରଣ ଦୁର୍ଘଟଣା ହେଲେ ପୋଲିସ ତତ୍ପରତା ଦେଖାଏ, ଗାଡି ଚାଳକଙ୍କୁ ଆରମ୍ଭ କରି ମାଲିକଙ୍କୁ ଥାନାକୁ ଡକାଏ । ଦରକାର ପଡିଲେ ଗିରଫ । ହେଲେ ପୂର୍ବତନ ମନ୍ତ୍ରୀ ପୁଅଙ୍କ ଗାଡି ଧକ୍କାରେ ଜଣଙ୍କର ଜୀବନ ଯିବା ପରେ ବି କାହିଁକି ଆକ୍ସନ ମୋଡକୁ ଆସୁନି ପୋଲିସ ସେନେଇ ଚର୍ଚ୍ଚା ଜୋରଦାର ଚାଲିଛି । ତେବେ ପୂରା ଘଟଣାରେ ବିଧାୟିକା କିମ୍ବା ବିଶାଳଙ୍କ ପ୍ରତିକ୍ରିୟା ମିଳିପାରିନାହିଁ ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV