ସ୍ତବ୍ଧ ହୋଇଗଲା ବିଡାନାସୀ ଛକ । ଖାଁ ଖାଁ ଲାଗୁଛି ରାସ୍ତା କଡ଼ରେ ଥିବା ବାଉଁଶ ତାଟିରେ ତିଆରି ଉଠା ଦୋକାନ । ଅଧା ତିଆରି ହୋଇ ରହିଛି ଦହିବରା । ଆଳୁଦମ ପାଇଁ ହାଣ୍ଡିରେ କଟା ହୋଇ ଥୁଆ ହୋଇ ରହିଛି ଆଳୁ । କାନ୍ଦ ବୋବାଳିରେ ଫାଟି ପଡୁଛି କଟକ ବିଡାନାସୀ ଗୋପାଳସାହି । କାରଣ କଟକ ପ୍ରସିଦ୍ଧ ଦହିବରା ଆଳୁଦମକୁ ଜାତୀୟ ସ୍ତରରେ ସ୍ଵତନ୍ତ୍ର ପରିଚୟ ଦେଇଥିବା ପ୍ରସିଦ୍ଧ ଦହିବରା ଆଳୁଦମ ବ୍ୟବସାୟୀ ରଘୁ ମଉସା ଆଉ ନାହାଁନ୍ତି । ୯୧ ବର୍ଷ ବୟସରେ କଟକ ବିଡାନାସୀ ଗୋପାଳ ସାହି ସ୍ଥିତ ବାସଗୃହରେ ତାଙ୍କର ପରଲୋକ ଘଟିଛି । ବାର୍ଦ୍ଧକ୍ୟ ଜନିତ ରୋଗରେ ପୀଡ଼ିତ ହୋଇ ଘରେ ଚିକିତ୍ସିତ ହେଉଥିଲେ । ଆଜି ସକାଳେ ତାଙ୍କର ଦେହାନ୍ତ ଘଟିଛି । ତାଙ୍କ ପରଲୋକ ପରେ ଭାଙ୍ଗି ପଡିଛନ୍ତି ତାଙ୍କ ପରିବାର ଲୋକେ ।

ଦୀର୍ଘ ୬ ଦଶନ୍ଧି ଧରି ଦହିବରା ଆଳୁଦମ ବ୍ୟବସାୟ କରି ଆସୁଥିଲେ ରଘୁ । ୧୯୫୦ ମସିହାରେ ମାତ୍ର ୧୫ ବର୍ଷ ବୟସରେ ଦହିବରା ଆଳୁଦମ ବ୍ୟବସାୟ ସେ ଆରମ୍ଭ କରିଥିଲେ । ୨୦୧୭ ମସିହାରେ ଦିଲ୍ଲୀରେ ଓଡିଆ ପର୍ବରେ ସାମିଲ ହୋଇ ରାଜ୍ୟ ବାହାରେ ଥିବା ଓଡ଼ିଆ ଓ ଅଣ ଓଡିଆଙ୍କୁ ନିଜ ଦହିବରା ଆଳୁଦମର ସ୍ଵାଦ ଛଖେଇ ଥିଲେ ରଘୁ ମଉସା । ପ୍ରତିଦିନ ୨୦୦ ଜଣଙ୍କ ପାଇଁ ତାଙ୍କର ଦହିବରା ଆଳୁଦମ ପ୍ରସ୍ତୁତ ହେଉଥିବା ବେଳେ ଛୁଟି ଦିନରେ ଅଧିକ ୫୦ ଜଣଙ୍କ ପାଇଁ ତିଆରି ହୋଇଥାଏ । ଅନ୍ୟଙ୍କଠାରୁ ତାଙ୍କର ଟିକେ ଭିନ୍ନ ଥିଲା ଦହିବରା ଆଳୁଦମ । ସେ କେବଳ ଖଟା ଦହିବରା ଓ ମିଠା ଦହିବରା ସହ ଆଳୁଦମ ରଖିଥାନ୍ତି। ଅଧିକ ରାଗ ଲାଗିଲେ ସେ ପେଡା ମଧ୍ୟ ଗ୍ରାହକଙ୍କୁ ଦେଇ ଥାଆନ୍ତି।

ସନ୍ଧ୍ୟା ୫.୩୦ ହେଲେ ଟ୍ରଲିରେ ଦହିବରା ଆଳୁଦମ ହାଣ୍ଡି ଥୋଇ ବିଡାନାସୀ ଛକକୁ ବ୍ୟବସାୟ ପାଇଁ ଆସି ଯାଆନ୍ତି ରଘୁ ମଉସା । ସେପଟେ ତାଙ୍କ ବିୟୋଗ ଖବର ପାଇ ତାଙ୍କ ବାସ ଭବନରେ ପହଂଚି ଅନେକ ବିଶିଷ୍ଟ ବ୍ୟକ୍ତି ତାଙ୍କୁ ଶ୍ରଦ୍ଧାଞ୍ଜଳି ଜଣେଇଛନ୍ତି। ରଘୁ ମଉସାଙ୍କୁ ପଦ୍ମଶ୍ରୀ ସମ୍ମାନରେ ସମ୍ମାନିତ କରିବାକୁ ଦାବି କରିଛନ୍ତି ଦହିବରା ଆଳୁଦମ ବ୍ୟବସାୟୀ ସଂଘ ଓ କଟକବାସୀ। କଟକ ସହରରେ ଦହିବରା ଆଳୁଦମ ବ୍ୟବସାୟ ଆରମ୍ଭ କରିଥିବା ଏକ ଯୁଗର ଏବେ ଅବସାନ ଘଟିଛି । କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ରଘୁ ମଉସାଙ୍କ ବିୟୋଗରେ ଗଭୀର ଶୋକ ବ୍ୟକ୍ତ କରିଛନ୍ତି ।