ଗନ୍ଧମାର୍ଦ୍ଦନ ଲୋଡ଼ିଂ ଆଣ୍ଡ କୋପରେଟିଭ ସୋସାଇଟିରୁ ୧୮୫ କୋଟି ଟଙ୍କାର ଘୋଟାଲା ମାମଲାରେ ବାଲେଶ୍ବର EOW ସ୍ପେଶାଲ କୋର୍ଟରେ ଆଜି ହାଜର ହୋଇଥିଲେ ବିଜେଡି ନେତା ରାଜା ଚକ୍ର । ହାଜର କରିଥିଲା କ୍ରାଇମବ୍ରାଞ୍ଚ EOW । EOW କୋର୍ଟରେ ହାଜର ପରେ ଜେଲ୍ ଗଲେ ରାଜା ଚକ୍ର । ଆସନ୍ତା ୧୯ ତାରିଖ ଯାଏ ତାଙ୍କୁ ବିଚାର ବିଭାଗୀୟ ହାଜତକୁ ପଠାଯାଇଛି । ରାଜା ଚକ୍ରଙ୍କ ଓକିଲ ରଘୁନାଥ ପ୍ରଧାନ କହିଛନ୍ତି, ଆଗାମୀ ଦିନରେ ଜାମିନ ପାଇଁ ଦରଖାସ୍ତ ଦିଆଯିବ । ।

ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିଛନ୍ତି,
ରାଜା ଚକ୍ର ଦୁର୍ନୀତି ମାମଲାରେ କାହାରିକୁ ଛଡାଯିବନି ରାଜାଙ୍କ ଲିଙ୍କରେ ଅନେକ ବଡ଼ ବଡ଼ିଆଙ୍କ ସଂପୃକ୍ତି ରହିଛି। ରାଜା ଚକ୍ର ଯାହା ଛତ୍ରଛାୟା ତଳେ କାମ କରୁଥିଲା ଏବଂ ଯାହା ନିର୍ଦ୍ଦେଶରେ କାମ କରୁଥିଲା । ସେମାନେ ସମସ୍ତେ ଆଗାମୀ ଦିନରେ ନ୍ୟାୟିକ ପରିସରଭୁକ୍ତ ହେବେ। ଯାହାଦ୍ବାରା ଆହୁରି ଅନେକ ଗୁମର ସାମ୍ନାକୁ ଆସିବ। ଯେଉଁ ବଡ଼ ଭ୍ରଷ୍ଟାଚାର ହୋଇଛି, ତାହା ଉପରୁ ବି ପରଦା ହଟିବ ।

ଗନ୍ଧମାର୍ଦ୍ଦନ ଖଣି ପ୍ରଭାବିତ ଅଂଚଳର ଆଦିବାସୀଙ୍କ ପିଟିସନ ଆଧାରରେ 2022 ମସିହାରେ ଗନ୍ଧମାର୍ଦ୍ଦନ ଖଣି ଅଂଚଳ ଗସ୍ତ କରିଥିଲେ ST କମିଶନ । ସେତେବେଳେ ST କମିଶନ ସଦସ୍ୟ ଥିଲେ ବିଜେପି ନେତା ଅନନ୍ତ ନାୟକ । ରାଜା ଚକ୍ରଙ୍କ ପ୍ରରୋଚନାରେ କିଛି ଆସାମାଜିକ ତତ୍ତ୍ବ ST କମିଶନଙ୍କୁ ଅଟକାଇବାକୁ ଉଦ୍ୟମ କରିଥିଲେ । ଏପରିକି ଧସ୍ତାଧସ୍ତି ପର୍ଯ୍ୟନ୍ତ ମଧ୍ୟ କଥା ଯାଇଥିଲା । ତତ୍କାଳୀନ ଏସପି ମିତ୍ରଭାନୁ ମହାପାତ୍ର ଏବଂ ଜିଲ୍ଲାପାଳ ଆଶିଷ ଠାକରେଙ୍କ ନିକଟରେ ଏନେଇ ଅଭିଯୋଗ ହୋଇଥିଲେ କେହି କିଛି ଶୁଣିନଥିଲେ । ରାଜା ଚକ୍ରଙ୍କ ଦବଦବା କେତେ ଥିଲା ତାହା ଏଥିରୁ ସହଜରେ ଅନୁମାନ କରାଯାଇପାରେ ।

ଏପରିକି ମୁଖ୍ୟମନ୍ତ୍ରୀ ମୋହନ ମାଝି ବିଧାୟକ ଥିବା ସମୟରେ ମଧ୍ୟ ତାଙ୍କ ଉପରେ ବୋମା ମାଡ଼ ଅଭିଯୋଗ ହୋଇଥିଲା । ଆଉ ଏହି ବୋମା ମାଡ଼ ପଛରେ ଥିଲା ରାଜା ଚକ୍ରଙ୍କ ହାତ । ବିଜେଡିର ଛତ୍ରଛାୟା ତଳେ ନିଜର କାୟା ବିସ୍ତାର କରିଥିବା ରାଜା ଚକ୍ରର ଏବେ ଖେଳ ଖତମ ହୋଇଯାଇଛି । ଆଇନ ମନ୍ତ୍ରୀଙ୍କ କଡା ବୟାନ ପରେ ବିଜେଡି ନେତାଙ୍କ ଛନକା ପଶିଛି । ରାଜା ଚକ୍ର ସହ ସମ୍ପୃକ୍ତି ଅଭିଯୋଗରେ ଆଗକୁ ଆଉ କାହାର ପାଳି ପଢୁଛି ଏବେ ତାକୁ ଅପେକ୍ଷା ।

Argus News | argus news | -Argusnews Home: Odisha Latest News, Breaking News, Trending News, Live TV and more