ଆସନ୍ତାକାଲି ପବିତ୍ର ଶ୍ରୀରାମ ନବମୀ । ମର୍ଯ୍ୟାଦା ପୁରୁଷୋତ୍ତମ ପ୍ରଭୁ ଶ୍ରୀରାମଙ୍କ ଜନ୍ମୋତ୍ସବ ପାଇଁ ଏବେ ସାରା ଓଡ଼ିଶା ଚଳଚଞ୍ଚଳ । ଭଦ୍ରକର ଐତିହାସିକ ଶୋଭାଯାତ୍ରା ଠାରୁ ଆରମ୍ଭ କରି ସମ୍ବଲପୁରର ହାଇ-ଆଲର୍ଟ ଏବଂ ଶ୍ରୀମନ୍ଦିରର ରହସ୍ୟମୟ ନୀତିକାନ୍ତି ପର୍ଯ୍ୟନ୍ତ, ସବୁଠି ଏବେ କେବଳ ରାମ ନାମର ଗୁଞ୍ଜରଣ ।

ମର୍ଯ୍ୟାଦା ପୁରୁଷୋତ୍ତମ ପ୍ରଭୁ ଶ୍ରୀରାମଙ୍କ ଜନ୍ମୋତ୍ସବ ପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ । ଗେରୁଆମୟ ସହର, ଶାନ୍ତି ଓ ଭାଇଚାରାର ପ୍ରତୀକ ଭଦ୍ରକ ସହରରେ ଶ୍ରୀରାମ ନବମୀ ଏକ ଭବ୍ୟ ଉତ୍ସବ । ଚଳିତ ବର୍ଷ ଗାନ୍ଧୀ ପଡ଼ିଆଠାରେ ବିଶ୍ୱଶାନ୍ତି ମହାଯଜ୍ଞ ଜାରି ରହିଛି ।

ଆଜି ଅଶୋକାଷ୍ଟମୀ ହୋଇଥିବାରୁ ମା’ଙ୍କ ପାଖରେ ଚଣ୍ଡୀପାଠ ସହ ପ୍ରଭୁଙ୍କ ପାଇଁ ୧୦୮ ହନୁମାନ ଚାଳିଶା ପାଠ କରାଯାଉଛି ଆସନ୍ତାକାଲି ନେହେରୁ ଷ୍ଟାଡିୟମରୁ ବାହାରିବ ବିଶାଳ ମେଢ଼ ଶୋଭାଯାତ୍ରା । ୧୦୦ରୁ ଉର୍ଦ୍ଧ୍ୱ ସୁସଜ୍ଜିତ ମେଢ଼ ୧୨ କିଲୋମିଟର ରାସ୍ତା ପରିକ୍ରମା କରିବ ।

ପୋଲିସ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । କ୍ୟାମ୍ପ ଓ ଫ୍ଲାଗ ମାର୍ଚ୍ଚ ସହ ୩୯ ପ୍ଲାଟୁନ ପୋଲିସ ଫୋର୍ସ ଏବଂ ୩ କମ୍ପାନୀ କେନ୍ଦ୍ରୀୟ ସୁରକ୍ଷା ବାହିନୀ ମୁତୟନ ହୋଇଛନ୍ତି । କ୍ରାଇମ ଡିଜିପି ବିନୟତୋଷ ମିଶ୍ର ନିଜେ ସ୍ଥିତିର ସମୀକ୍ଷା କରୁଛନ୍ତି । 

ହାଇ-ଆଲର୍ଟରେ ସମ୍ବଲପୁର । ହଜାର ହଜାର କଳାକାରଙ୍କ ସମାଗମ । ସମ୍ବଲପୁରରେ ଶ୍ରୀରାମ ନବମୀକୁ ନେଇ ପ୍ରଶାସନ ଅଧିକ ସତର୍କ ଅଛି । ଶ୍ରୀରାମ ଜନ୍ମୋତ୍ସବ ସମିତି ପକ୍ଷରୁ ପ୍ରାୟ ୧୦ ହଜାର କଳାକାରଙ୍କୁ ନେଇ ଶୋଭାଯାତ୍ରା କରିବାକୁ ଲକ୍ଷ୍ୟ ରଖାଯାଇଛି । ପୂରା ସହରକୁ ସିସିଟିଭି ନଜରରେ ରଖାଯାଇଛି । ମହିଳାମାନଙ୍କ ସୁରକ୍ଷା ପାଇଁ ସାଦା ପୋଷାକଧାରୀ ମହିଳା ପୋଲିସ ନିୟୋଜିତ ହେବେ । ୩୦ ପ୍ଲାଟୁନ ଫୋର୍ସ ସହରର ବିଭିନ୍ନ ଛକରେ ମୁତୟନ ହୋଇଛନ୍ତି ।

ଶ୍ରୀମନ୍ଦିରରେ ଜଗନ୍ନାଥ ନିଜେ ମାତା ରୂପେ କଳ୍ପିତ ହୋଇ ପୁଣି ପୁତ୍ର (ଶ୍ରୀରାମ) ରୂପେ ଆବିର୍ଭୂତ ହୁଅନ୍ତି । ସନ୍ଧ୍ୟାଧୂପ ପରେ ପୂଜାପଣ୍ଡା, ପତି ମହାପାତ୍ର ଓ ମୁଦିରସ୍ତ ସେବକମାନେ ମହାପ୍ରଭୁଙ୍କୁ ବନ୍ଦାପନା କରନ୍ତି ମାତାଙ୍କ ଗର୍ଭ କଷ୍ଟ ଦୂର କରିବା ପାଇଁ ଶ୍ରୀମନ୍ଦିରରେ ଏକ ସ୍ୱତନ୍ତ୍ର ଭୋଗ ଲାଗି ହୁଏ, ଯାହାକୁ 'ଜେଉଡ଼ ଭୋଗ' କୁହାଯାଏ । ଏଥିରେ ବିଶେଷ କରି ଶାଗ ଇତ୍ୟାଦି ଅର୍ପଣ କରାଯାଏ । ଭକ୍ତି ଓ ଶୃଙ୍ଖଳାର ସହ ପ୍ରଭୁ ଶ୍ରୀରାମଙ୍କ ଜନ୍ମୋତ୍ସବ ପାଳିବାକୁ ରାଜ୍ୟବାସୀ ଅପେକ୍ଷା କରିଛନ୍ତି