ପହିଲି ବର୍ଷାର ପହିଲି ଜଳ ବିନ୍ଦୁ ଧରଣୀକୁ ଛୁଇଁବା ପରେ ଏହି ସାଧବ ବୋହୂମାନେ ନାଲି ରଙ୍ଗର ଓଢଣୀ ଟାଣି ଘାସ ଗାଲିଚାରେ ବୁଲୁଛନ୍ତି । ଶୂନଶାନ ପରିବେଶରେ ବେଙ୍ଗ ବେଙ୍ଗୁଲିର ରଡ଼ି ଏଥି ସହ ସବୁଜ ଘାସ ଗାଲିଚାରେ ଲାଲ ଟୁକୁଟୁକୁ ସାଧବ ବୋହୂମାନଙ୍କର ଚାଲି ଧରିଣୀ ରାଣୀକୁ ରେଶମୀ ରଙ୍ଗରେ ସଜେଇ ଦେଇଛି । ଥିରି ଥିରି ସୁନ୍ଦର ଚାଲି ଦେଖି କବିଙ୍କ କଲମରୁ ଆପେ ଆପେ ଚାଲିଆସେ କେତେ ଯେ କବିତା । ଏଭଳି ସୁନ୍ଦର ଜୀବ ଦେଖିବାକୁ ମିଳିଛି ଗୁଣୁପୁର ଅଞ୍ଚଳରେ ଥିବା ପଡିଆରେ ।

ମୌସୁମୀ ବର୍ଷାରେ ଗଛ ଲତା ପୁର୍ନଜୀବନ ପାଇ ପରିବେଶର ସୁନ୍ଦରତାକୁ ଦ୍ୱିଗୁଣିତ କରୁଛନ୍ତି । ଏହି ସମୟରେ ପୃଥିବୀର ଅତି ସୁନ୍ଦର କୀଟ ସାଧବ ବୋହୂ ଘାସର ଗାଲିଚା ଉପରେ ଦେଖିବାକୁ ମିଳିଛନ୍ତି । ଆଜିକାଲି ଏମାନଙ୍କ ବଂଶ ଲୋପ ହେବାକୁ ବସିଥିବାବେଳେ କାଁ ଭାଁ କେଉଁଠି ଦେଖିବାକୁ ମିଳୁଛି । ଆଉ ଏମାନଙ୍କୁ ଦେଖିବାକୁ ପାଗଳ ହେଉଛନ୍ତି ପିଲାଠୁ ବୁଢା । ଦିନ ଥିଲା ବଗିଚା, ବାଡ଼ିରେ ବହୁ ପରିମାଣରେ ଦେଖିବାକୁ ମିଳୁଥିଲା ସାଧବ ବୋହୂ । କିନ୍ତୁ ଋତୁ ଚକ୍ରେରେ ପରିବର୍ତ୍ତନ ହେବା ସହ ଦିନକୁ ଦିନ ଜମିର ପରିମାଣ କମିବାରେ ଲାଗିଛି । ଯାହା ଫଳରେ ସାଧବବୋହୂ ଭଳି କୀଟ ଲୁପ୍ତ ହେବାରେ ଲାଗିଛନ୍ତି ।

ଏହି ପୋକର ରଙ୍ଗ ଗାଢ ସିନ୍ଦୂର ରଙ୍ଗ ହୋଇଥିବାରୁ ଏହା ବୋହୂଟିଏ ନାଲି ପାଟ ପିନ୍ଧି ସିନ୍ଦୂର ଲଗାଇଥିବା ଭଳି ଦିଶେ । ସେଥିପାଇଁ ଓଡ଼ିଆରେ ଏହାକୁ ସାଧାବ ବୋହୂ କୁହାଯାଏ । ଏହି ସୁନ୍ଦର ପାଟ ପୋକର ଆୟୁ ଅତି ସ୍ୱଳ୍ପ ଦିନ । ପୂର୍ବେ ଏହି କୀଟକୁ ଔଷଧ ରୂପରେ ଗ୍ରହଣ କରୁଥିଲେ । ଏହି କୀଟ ମୌସୁମୀର ଆଗମନକୁ ସୂଚାଇଥାଏ । ସମୟ ସାଙ୍ଗରେ ସବୁ ବିଲୁପ୍ତ ହେବାକୁ ବସିଲାଣି । ଏମାନଙ୍କ ସଂଖ୍ୟ ଧୀରେ ଧୀରେ କମିବାରେ ଲାଗିଛି । ଆଗୁଆ ସଚେତନ ନହେଲେ ଏହି ସୁନ୍ଦର କୀଟ ଦେଖିବାକୁ ମିଳିବ ନାହିଁ । ତେଣୁ ଏମାନଙ୍କ ବଂଶ ରକ୍ଷା କରିବା ଜରୁରୀ ହୋଇପଡିଛି ।

ପ୍ରକୃତି ସହ ପରିବେଶର ରହିଛି ନିବିଡ଼ ସମ୍ପର୍କ । ଦାରୁଣ ଗ୍ରୀଷ୍ମର ପ୍ରକପ ପରେ ଆସିଛି ମୌସୁମୀ ମୌସୁମୀର ପ୍ରଭାବରେ ଆନମନା ପ୍ରକୃତି । ପହିଲି ବର୍ଷାରେ ଶୁଷ୍କ ହୋଇପଡିଥିବା ଧରାପୃଷ୍ଠ ରଙ୍ଗୀନ ହୋଇ ଉଠିଛି । ସବୁଜ ଘାସ ଗାଲିଚାରେ ଖେଳୁଛି ନାଲି ଟୁକୁ ଟୁକୁ ସାଧବବାହୂ ।

Argus News | argus news | Odisha Latest News, Breaking News, Trending News, Live TV