ଶ୍ରୀକ୍ଷେତ୍ର ଭଉଁରୀକୁ ଆଉ ମାତ୍ର ୪ ଦିନ ବାକି । ଜୋରସୋରରେ ରଥଖଳାରେ ଚାଲିଛି ରଥନିର୍ମାଣ କାର୍ଯ୍ୟ । ତେବେ ଭଉଁରୀକୁ ଦୃଷ୍ଟିରେ ତିନି ରଥର ନାହାକା ଚକ ଅଖ ପ୍ରସ୍ତୁତ କରାଯାଉଛି । ଏଥିସହ ଏବେ ବି ଚାଲିଛି ସିଙ୍ଗଡ଼ା ବାଡିଆ କାର୍ଯ୍ୟ । ତିନିରଥର ୪୨ଟି ତୁମ୍ଭରେ ୬୭୨ ଟି ଅର ସଂଯୋଗ ପ୍ରକ୍ରିୟା ଜାରି ରହିଛି ।

ସେପଟେ ପହି ପଡିବା ପରେ ବିଲେଇ ବାଡିଆ କାର୍ଯ୍ୟ ଜାରି ରହିଛି । ଏହି ବାଡ଼ିଆ ଫଳରେ ରଥଚକ ମଜବୁତ ହୋଇଥାଏ । ମହାପ୍ରଭୁଙ୍କ ତିନିରଥର ୩୩ଟି ଗୁଜରେ ସିଂହବିରାଳ ଖୋଦେଇ ଚାଲିଛି । ନୃସିଂହ ଚତୁର୍ଦ୍ଦଶୀ ଦିନ ଗୁଜ ଅନୁକୂଳ ହେବା ପରେ ରୂପକାର ସେବକମାନେ ନିଷ୍ଠାର ସହ ସିଂହ ବିରାଳର ଖୋଦେଇ କାର୍ଯ୍ୟ କରୁଛନ୍ତି ।

ଏଥିସହ କମାର ଶାଳରେ କମାର ମାନେ ତିନିରଥ ପାଇଁ ଲୁହା କଣ୍ଟା ସହ ଲୁହା ସାମଗ୍ରୀ ତିଆରି କରୁଛନ୍ତି । କମାର ଶାଳରେ ଅରକଣ୍ଟା, ଅର କ୍ଲାମ୍ପ ଓ ୪୨ଟି ତୁମ୍ଭର ୪୨ ଯୋଡା ପନ୍ଦାରି ନିର୍ମାଣ ଜାରି ରହିଛି ।