ପୁନଃବାସ ହେବେ ୧୯ ମଠ । ଗୋଟିଏ ସ୍ଥାନରେ ହେବ ବିଜେସ୍ଥଳୀ । ଶ୍ରୀମନ୍ଦିର ପରିକ୍ରମା ପ୍ରକଳ୍ପ ବେଳେ ଭଙ୍ଗା ଯାଇଥିବା ମଠମନ୍ଦିର ପାଇଁ ପୁରୀ ସହରରେ ଜାଗା ଚିହ୍ନଟ। ପରିକ୍ରମା ପ୍ରକଳ୍ପ ପାଇଁ ଉଚ୍ଛେଦ ହୋଇଥିବା ସମସ୍ତ ୧୯ ଟି ମଠ ଏହି ପ୍ରକ୍ରିୟାକରଣ ରେ ସାମିଲ ରହିବେ ।

ଗୋଟିଏ ଜାଗାରେ ମଠ ଗୁଡ଼ିକର ବିଜେସ୍ଥଳୀ ରହିଲେ ଭକ୍ତ ମାନଙ୍କୁ ଦର୍ଶନ ପାଇଁ ଓ ଶେଷ ପୂଜା ପାଇଁ ସୁବିଧା ହେବ କହିଛନ୍ତି ଆଇନ ମନ୍ତ୍ରୀ । ଏନେଇ ଦେବୋତ୍ତର କମିଶନଙ୍କ ସହ ଦୁଇ ଥର ବୈଠକ ସହ ଜାଗା ଚିହ୍ନଟ ହୋଇଥିବା ସେ ସୂଚନା ଦେଇଛନ୍ତି ।

ଅନ୍ୟପଟରେ ଦୀର୍ଘ ୬ ବର୍ଷ ଧରି ଏଭଳି ଏକ ନିଷ୍ପତ୍ତି କୁ ପ୍ରତୀକ୍ଷା କରି ରହିଥିଲେ ମଠ ମହନ୍ତ । ପରିକ୍ରମା ପ୍ରକଳ୍ପ ପାଇଁ ମଠ ଗୁଡ଼ିକର ଅଧିକାଂଶ ସ୍ଥାନ ଉଚ୍ଛେଦ ହୋଇଥିବା ବେଳେ କେବଳ ଗାଦି ସ୍ଥାନଟି ରହିଛି । ଯାହା ସଂକୀର୍ଣ୍ଣ ଓ ଅଣଓସାରିଆ । ଭଜନ କୀର୍ତ୍ତନ ପାଇଁ ପର୍ଯ୍ୟାପ୍ତ ସ୍ଥାନ ନାହିଁ, ବିଦ୍ୟାର୍ଥୀ,ଗୋସେବା କିମ୍ବା ଭକ୍ତଙ୍କ ପାଇଁ ପର୍ଯ୍ୟାପ୍ତ ସ୍ଥାନ ନାହିଁ । ଏନେଇ ପୂର୍ବ ସରକାର ଲିଖିତ ପ୍ରତିଶ୍ରୁତି ଦେଇଥିଲେ ମଧ୍ୟ କାର୍ଯ୍ୟକାରୀ କରିପାରି ନଥିଲେ ।

ଶ୍ରୀମନ୍ଦିର ଠାରୁ ଅଳ୍ପ କେଇ କିଲୋମିଟର ଦୂରରେ ଜାଗା ଚିହ୍ନଟ ହୋଇଥିବା ସୂଚନା ମିଳିଛି । ଚୂଡ଼ଙ୍ଗ ସାହି ମୌଜା ର ପ୍ରାୟ ୪ ରୁ ୫ ଏକର ପରିମିତ ଜାଗାରେ ହୋଇପାରେ ମଠ ବିଜେ ସ୍ଥଳୀ। ଅନ୍ୟପଟେ ଗୋଟିଏ ସ୍ଥାନରେ ଭିନ୍ନ ଭିନ୍ନ ପରମ୍ପରା ଆଧାରିତ ମଠ କୁ ଏକ କରିବା ପରମ୍ପରା ସମ୍ମତ ନୁହେଁ ବୋଲି କହିଛନ୍ତି ବରିଷ୍ଠ ସ୍ତମ୍ଭକାର ।