କଳାହାଣ୍ଡି ଜିଲ୍ଲା କୋକସରା ବ୍ଲକ ଆମପାଣି ପଂଚାୟତର ସର୍ଗିପାନି ଗାଁ । ଏହି ଗାଁରେ ପ୍ରାୟ ୩୦ରୁ ଉର୍ଦ୍ଧ୍ୱ ଆଦିବାସୀ ପରିବାର ବସବାସ କରନ୍ତି । ଗାଁକୁ ଯିବାକୁ ହେଲେ ନାହିଁ ଭଲ ରାସ୍ତା, ଜଙ୍ଗଲ ମଧ୍ୟରେ ଥିବା ଏହି ଆବୁଡା ଖାବୁଡ ରାସ୍ତାରେ ଅତି ଦୟନୀୟ ଅବସ୍ଥାରେ ଯାତାୟତ କରନ୍ତି ଏମାନେ । ଅନେକ ସମୟରେ ଦୁର୍ଘଟଣା ହୋଇ ଜୀବନ ହାନି ହେଉଥବା ଅଭିଯୋଗ କରିଛନ୍ତି । ଗାଁକୁ ଆମ୍ବୁଲାନ୍ସ ଆସି ପାରୁନଥିବାରୁ ରୋଗୀ ହୁଅନ୍ତୁ ଅବା ଗର୍ଭବତୀ, ମେଡିକାଲ ନେବା ପାଇଁ ଦୀର୍ଘ ୧୨ କିମି ବିରିମୁହାଣ ଛକକୁ ଖଟିଆରେ ବୋହି ନେବାକୁ ପଡେ । ଏମାନଙ୍କ ପାଇଁ ବିଜୁଳି ଆଲୁଅ ମଧ୍ୟ ସାତସପନ ।

ଗାଁରେ ପାନୀୟ ଜଳ ପାଇଁ ନଳକୂପ ନଥିବାରୁ ଗ୍ରାମବାସୀ ବାଧ୍ୟ ହୋଇ ଗାଁ ପାଖରେ ଥିବା ନାଳର ଦୂଷିତ ପାଣି ବ୍ୟବହାର କରୁଛନ୍ତି । ଏହି ଦୂଷିତ ପାଣି ପିଇ ଅନେକ ସମୟରେ ଗ୍ରାମବାସୀ ମାରାତ୍ମକ ରୋଗରେ ଆକ୍ରାନ୍ତ ହେବା ସହ ମୃତ୍ୟୁ ମୁଖରେ ପଡୁଥିବା ଅଭିଯୋଗ ହୋଇଛି । ଏମିତିରେ ରାସ୍ତା ସହ ବିଦ୍ୟୁତ, ପାଣି ଯୋଗାଇ ଦେବାକୁ ଦାବି କରିଛନ୍ତି ଗ୍ରାମବାସୀ । ସେପଟେ ସମସ୍ୟା ନେଇ ସ୍ଥାନୀୟ ଉପାଧ୍ୟକ୍ଷଙ୍କୁ ଯୋଗାଯୋଗ କରିବା ପରେ ସେ ସମସ୍ତ ବ୍ୟବସ୍ଥା କରାଯିବ ବୋଲି ପ୍ରକାଶ କରିଛନ୍ତି ।

୨୪ ବର୍ଷର ସ୍ଥିର ବିଜେଡି ସରକାରରେ ବିକାଶ କେବଳ କାଗଜ କଲମରେ ରହିଗଲା, ସମସ୍ୟାର ସମାଧାନ ହେଲା ନାହିଁ । ରାଜ୍ୟରେ ବିଜେପି ସରକାର ଆସିଥିବାରୁ ଲୋକଙ୍କ ଭରସା ନିଶ୍ଚିନ୍ତ ସମାଧାନ ହେବ ସମସ୍ୟା ।