ଦୀର୍ଘ ଦିନ ହେବ ଅସମ୍ପୂର୍ଣ ହୋଇ ପଡିରହିଛି ସାଲେମପଦରଠାରୁ ସୁଲିଆମାରି ପର୍ଯ୍ୟନ୍ତ ନିର୍ମାଣ ହେଉଥିବା ବିଜୁ ସେତୁ ବ୍ରିଜ କାମ । ଯାହା ଦ୍ଵାରା ପଥର ଓ ମାଟିର କଲଭର୍ଟ ରାସ୍ତା ଭରସାରେ ଯାତାୟାତ କରୁଛନ୍ତି ଅଞ୍ଚଳର ଲୋକେ l ହେଲେ ରାସ୍ତା ଅବସ୍ଥା ଆପଣଙ୍କ ସାମ୍ନାରେ । ସତେ ଯେମିତି ଜୀବକା ପାଇଁ ବାଜିରେ ଲଗାଉଛନ୍ତି ଜୀବନକୁ l ଏହି ଦୃଶ୍ୟ ହେଉଛି କୋରାପୁଟ ଜିଲ୍ଲା ପଟ୍ଟାଙ୍ଗି ବ୍ଲକ ଅନ୍ତର୍ଗତ ବହୁଚର୍ଚ୍ଚିତ କୋଟିଆ ପଂଚାୟତର ଦୃଶ୍ୟ l ବିଜୁ ସେତୁ ଯୋଜନା ନାଁରେ ଏହି ବ୍ରିଜ କାମ କୋଟିଆ ଅଞ୍ଚଳବାସୀଙ୍କ ଗମନାଗମନକୁ ଦେଖି ଆରମ୍ଭ କରାଯାଇଥିଲା ।

କିନ୍ତୁ ପ୍ରାୟ ୩ ରୁ ୪ ବର୍ଷ ହେଲା ଏହି ବ୍ରିଜ ନିର୍ମାଣ ହୋଇପାରୁନାହିଁ । ତେଣୁ ଲୋକଙ୍କ ସାହା ଭରସା ପାଲଟିଛି ଏହି ମାଟି ପଥରର କଲଭର୍ଟ l ହେଲେ ବର୍ଷା ସମୟରେ ଦୁଇଟି ନଦୀର ପାଣି ଆସି ରାସ୍ତାକୁ ଭସେଇ ନେଇଯାଉଛି । ଯାହା ଦ୍ଵାରା ଅନେକ ଅସୁବିଧା ହେଉଥିବା କହିଛନ୍ତି କୋଟିଆର ଦୁର୍ଗମବାସୀ । ଏହି ବ୍ରିଜର ଆର ପାରିକୁ ରହିଛି କୋଟିଆ, ପଟ୍ଟାଙ୍ଗି ଅନ୍ୟ ପାରିରେ ନାରାୟଣପାଟଣା ଓ ବନ୍ଧୁଗାଁ l ସେଠାକୁ ଅନେକ ସମୟରେ ପ୍ରତିଦିନ ବ୍ୟବସାୟ ସହ ମେଡିକାଲ ପାଇଁ ଏଠାକାର ଅନେକ ଗ୍ରାମବାସୀ ଏହି ରାସ୍ତା ଉପରେ ନିର୍ଭର କରନ୍ତି l

କିନ୍ତୁ ଅଧୁରା ବ୍ରିଜ ସାଜିଛି ସେମାନଙ୍କ ପାଇଁ କାଳ l ତତ୍କାଳୀନ ବିଜେଡି ସରକାରଙ୍କ ପ୍ରତାରଣାକୁ ଦୃଢ଼ ନିନ୍ଦା କରିବା ସହ ବର୍ତ୍ତମାନ ବିଜେପି ଶାସନ ସମୟରେ ନିଶ୍ଚୟ ବ୍ରିଜ ସମ୍ପୂର୍ଣ ହେବ ବୋଲି ଆଶା ଭରସା ଥିବା କହିଛନ୍ତି ଜିଲ୍ଲା ପରିଷଦ । ସେପଟେ ବ୍ରିଜ କାର୍ଯ୍ୟ ବୁଝୁଥିବା ସୁପରଭାଇଜର ମଧ୍ୟ ବ୍ରିଜ ବିଷୟରେ କିଛି ଜାଣି ନଥିବା କହିଛନ୍ତି ।