ରାଜ୍ୟରେ କ୍ୟାନସର ଆକ୍ରାନ୍ତଙ୍କ ବୃଦ୍ଧି ବଢାଉଛି ଚିନ୍ତା । ବର୍ଷକୁ ପ୍ରାୟ ୬୦ ହଜାରରୁ ଅଧିକ ଚିହ୍ନଟ ହେଉଥିବା ବେଳେ ପଶ୍ଚିମ ଓଡ଼ିଶାରେ ଆକ୍ରାନ୍ତଙ୍କ ସଂଖ୍ୟା ଉଦବେଗଜନକ ଭାବେ ବଢୁଛି । ଗତ ୯ ମାସ ମଧ୍ୟରେ ୨୩ ହଜାର ୧୩୧ ଆକ୍ରାନ୍ତ ଚିହ୍ନଟ ହୋଇଛନ୍ତି । କ୍ୟାନସର ଚିହ୍ନଟ ପାଇଁ ଡାକ୍ତର ପରାମର୍ଶ ନେବାକୁ ଗାଁ ଗାଁ ବୁଲି ସଚେତନତା କରିବେ ସ୍ବୟଂ ସହାୟକ ଗୋଷ୍ଠୀ ।

ରାଜ୍ୟରେ ଚିନ୍ତା ବଢାଉଛି କ୍ୟାନସର ଆକ୍ରାନ୍ତଙ୍କ ସଂଖ୍ୟା । ଏହାର ତୁରନ୍ତ ଚିହ୍ନଟ ପାଇଁ ନିଅଯାଉଛି ପଦକ୍ଷେପ । ଗାଁ ଗାଁ ବୁଲି ସଚେତନତା କରିବେ ସ୍ବୟଂ ସହାୟକ ଗୋଷ୍ଠୀ । ରାଜ୍ୟରେ ପ୍ରତିବର୍ଷ ପ୍ରାୟ ୬୦ ହଜାର ନୂଆ କ୍ୟାନସର ଆକ୍ରାନ୍ତ ଚିହ୍ନଟ ହେଉଛନ୍ତି । ସେମାନଙ୍କ ମଧ୍ୟରୁ ପ୍ରାୟ ୩୫ ହଜାର ମୃତ୍ୟୁ ମୁଖରେ ପଡୁଛନ୍ତି । ରାଜ୍ୟରେ ମୁଖ ଗହ୍ବର କର୍କଟ ଅଧିକ ହେଉଛି । କ୍ୟାନସରର ହଟସ୍ପଟ ପାଲଟିଛି ପଶ୍ଚିମ ଓଡ଼ିଶା । ଡାକ୍ତରଙ୍କ ତୁରନ୍ତ ପରାମର୍ଶ ସହ ଚିକିତ୍ସା କରାଗଲେ ଶ୍ରୀଘ୍ର ଉପଶମ ମିଳିବ ବୋଲି ବିଶ୍ବ କର୍କଟ ଦିବସରେ କହିଛନ୍ତି ଜନସ୍ବାସ୍ଥ୍ୟ ନିର୍ଦ୍ଦେଶକ ।

ରାଜ୍ୟରେ ପ୍ରତି ଏକ ଲକ୍ଷରେ ୯୭ ଜଣଙ୍କୁ ହେଉଛି କର୍କଟ। ରାଜ୍ୟରେ ମୁଖ ଗହ୍ୱର କର୍କଟ ଅଧିକ ରହୁ ଥିବା ବେଳେ , ମହିଳାଙ୍କ ସ୍ତନ କର୍କଟ, ଜରାୟୁ ଗ୍ରିଭା କର୍କଟ ମଧ୍ୟ ଦେଖାଯାଉଛି। ଯାହା ସାଧାରଣତଃ ୩୦ ରୁ ୬୦ ବର୍ଷ ବୟସ ମଧ୍ୟରେ ହୋଇଥାଏ। ଗତ ୯ ମାସ ମଧ୍ୟରେ ୨୩ ହଜାର ୧୩୧ ଆକ୍ରାନ୍ତ ଚିହ୍ନଟ ହୋଇଛନ୍ତି । ସେମାନଙ୍କ ମଧ୍ୟରୁ ସବୁଠୁ ଅଧିକ ୪୭୭୯ ଆକ୍ରାନ୍ତ କଟକରୁ ଚିହ୍ନଟ କରାଯାଇଥିଲା । କେନ୍ଦ୍ରାପଡ଼ା ଜିଲ୍ଲା ରେ ୧୮୭୮, ଯାଜପୁରରେ ୧୧୫୩, ଜଗତସିଂହପୁରରେ ୧୮୨୨, ବାଲେଶ୍ୱରରେ ୧୫୪୬ ଓ ଭଦ୍ରକରେ ୧୪୩୨ ଆକ୍ରାନ୍ତ ଚିହ୍ନଟ ହୋଇଛନ୍ତି ।