ନାଲିବତୀ ଗାଡିରେ ବୁଲୁଛନ୍ତି । ରାସ୍ତାରେ ବସି ମଦ ପିଉଛନ୍ତି । କିଛି ଏମିତି ଦୃଶ୍ୟ ଦେଖିବାକୁ ମିଳିଛି ରାଜଧାନୀର ରାଜରାସ୍ତାରେ । ଖାରବେଳନଗର ଥାନା ଅଞ୍ଚଳରେ ଥିବା ଏକ ଗହଣା ଦୋକାନ ନିକଟରେ ଫୁଟପାଥ୍‌ ଉପରେ ଲାଗିଲା ଏକ ନାଲିବତି ଗାଡି । ଗାଡ଼ିରୁ ଓହ୍ଲାଇପଡ଼ିଲେ ୫ଜଣ ଯୁବକ । ବାହାର କଲେ ମଦ ବୋତଲ ଏବଂ ଆରମ୍ଭ କରିଦେଲେ ଆସରା । ରାସ୍ତା ଉପରେ ଚାଲିଲା ରୋଡ ରୋମିଓଙ୍କ ଉତ୍ପାତ ।

ନାଲିବତୀ ଗାଡ଼ି ବୋଲି କାହାର ମୁହଁ ଖୋଲିବାର ନଥିଲା । ଗାଡ଼ିଟି ଘରୋଇ ଗାଡ଼ିଥିଲା ଏବଂ କୌଣସି ଅଫିସର୍‌ଙ୍କ ପାଇଲଟ୍ ଡ୍ୟୁଟିରେ ଲାଗିଥିବା ଜଣାପଡ଼ୁଥିଲା । ଏ ଚିତ୍ର ଜଣେ ଯୁବକ ମୋବାଇଲ୍‌ରେ ରେକର୍ଡ କରୁଥିବା ଜାଣିବା ପରେ ମଦ ପିଉଥିବା ଯୁବକଙ୍କ ମଧ୍ୟରୁ ଜଣେ ଗାଡ଼ିରୁ ନାଲିବତି ବାହାର କରି ଗାଡ଼ି ଭିତରକୁ ଫୋପାଡ଼ି ଦେଲା । ଅନ୍ୟମାନେ ମଦ ବୋତଲ ବନ୍ଦ କରି ତରତରରେ ଗାଡ଼ି ଭିତରକୁ ପଶିଗଲେ ଏବଂ ଗାଡ଼ି ନେଇ ସେଠାରୁ ଛୁ ମାରିଲେ । ଭିଡିଓ ସାମ୍ନାକୁ ଆସିବା ପରେ ପୁରା ଘଟଣା କୁ ନେଇ ତଦନ୍ତ ଆରମ୍ଭ କରିଛି ଖାରବେଳନଗର ଥାନା ପୋଲିସ ।