ପ୍ରଦୀପଙ୍କ ଘରୁ ବାହାରିଲାଣି ୧୭ ଲକ୍ଷ ନଗଦ, ମାଳ ମାଳ ଘର ଆଉ ପ୍ଲଟ୍
ଗିରଫ ହେଲେ STA ଯୁଗ୍ମ ନିର୍ଦେଶକ ପ୍ରଦୀପ ମହାନ୍ତି । ପ୍ରଦୀପଙ୍କ ଘରୁ ଆଜି ଆଉ ୨ ଲକ୍ଷ ଟଙ୍କା ଜବତ କରିଛି ଭିଜିଲାନ୍ସ । ବର୍ତ୍ତମାନ ସୁଦ୍ଧା ମୋଟ ୧୭ ଲକ୍ଷ ୫୫ ହଜାର ଟଙ୍କା ଜବତ ହେବା ସହ ୨.୧ କିଲୋଗ୍ରାମର ସୁନା ଅଳଙ୍କାର ମଧ୍ୟ ଜବତ କରିଛି ଭିଜିଲାନ୍ସ । ପୁରୀରେ ଦୁଇଟି ବେନାମୀ ଫ୍ଲାଟ ସହ ଭୁବନେଶ୍ୱରରେ ୩ଟି ବହୁତଳ ପ୍ରାସାଦ ଥିବା ଜାଣିଛି ଭିଜିଲାନ୍ସ । ଏହାସହ ଗୋଟିଏ ୪ BHK ଫ୍ଲାଟ ପାଇଁ ପ୍ରଦୀପ ଆଗୁଆ ୧ କୋଟି ପୈଠ କରିଥିବା ମଧ୍ୟ ଜଣାପଡ଼ିଛି ।
ଗତକାଲି ଗୁରୁବାର ପ୍ରଦୀପ ମହାନ୍ତିଙ୍କ ମୈତ୍ରୀ ବିହାର ସ୍ଥିତ ଘର ଓ କଟକ କାର୍ଯ୍ୟାଳୟ ସହ ୯ଟି ସ୍ଥାନରେ ଏକକାଳିନ ଭିଜଲାନ୍ସ ରେଡ୍ କରାଯାଇଥିଲା । ପ୍ରଦୀପଙ୍କ ଭୁବନେଶ୍ବର ମୈତ୍ରୀ ବିହାର ଘରୁ ଜବତ ହୋଇଥିଲା ୩ଟି ସୁନା ବିସ୍କୁଟ ଓ ଭିନ୍ନ ଭିନ୍ନ ଡିଜାଇନର ସୁନା ହାର, ଚୁଡ଼ି ସହ ଦାମୀ ଅଳଙ୍କାର । ଯାହାର ଆନୁମାନିକ ମୂଲ୍ୟ କୋଟିଏ ଟଙ୍କା ହେବ । ସୁନା ତାରକାସି କାମରେ ପ୍ରସ୍ତୁତ ବିଭିନ୍ନ ଠାକୁରଙ୍କ ଫଟୋ, ରୂପା ଥାଳି ଓ ଗ୍ଲାସ ମଧ୍ୟ ମିଳିଥିଲା। ପ୍ରଦୀପଙ୍କ ଘରୁ ପ୍ରାୟ ୧୫ ଲକ୍ଷ ଟଙ୍କା କ୍ୟାସ୍ ଜବତ ହୋଇଥିଲା । ଏଥିରେ ରହିଥିଲା ଦୀର୍ଘ ଦିନରୁ ବନ୍ଦ ହୋଇ ଯାଇଥିବା ୨୦୦୦ ଟଙ୍କିଆ ନୋଟ ବିଡା । ମେସିନ ଆଣି ଟଙ୍କା ଗଣିଥିଲା ଭିଜଲାନ୍ସ । କୁବେର ବାବୁଙ୍କ ଅମାପ ସମ୍ପତ୍ତି ଦେଖି ଭିଜିଲାନ୍ସ ବି ତାଜୁବ ।
ସେହିପରି ବ୍ୟାଙ୍କ ପାସବୁକ୍, ପାସପୋର୍ଟ ସହ ବୀମା କାଗଜପତ୍ର ଯାଞ୍ଚ କରିଥିଲା ଭିଜିଲାନ୍ସ । ଆୟ ବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ କଟକ ଅଫିସ୍, ନୟାଗଡ଼, ରଣପୁର ସ୍ଥିତ ଘର, ପୁରୀ, ଖୋର୍ଦ୍ଧାର ସଂପର୍କୀୟ ଘର ସମେତ ୯ଟି ସ୍ଥାନରେ ଏକକାଳୀନ ଭିଜିଲାନ୍ସ ଚଢାଉ କରିଥିଲା ।
ମୌତ୍ରୀ ବିହାର ଘର ବ୍ୟତୀତ ଭୁବନେଶ୍ବର ରଘୁନାଥପୁରରେ ୪ ବିଏଚକେ ଫ୍ଲାଟ ପାଇଁ ଏକ କୋଟି ଟଙ୍କା ଦେଇଛନ୍ତି । ଆହୁରି ରହିଛି ଗୋବିନ୍ଦ ପ୍ରସାଦରେ କାମ ଚାଲିଥିବା ୫ ତାଲା କୋଠା, ନୟାଗଡ଼ ରଣପୁରର କୁଶପଲ୍ଲାରେ ଫାର୍ମ ହାଉସ , ଖୋର୍ଧା ଟାଙ୍ଗିରେ ଘର, ପୁରୀ ଜେନାରୀ ଗଛ ଲେନରେ ସମ୍ପର୍କୀୟଙ୍କ ଘର, ଭୁବନେଶ୍ବର ମଳିପଡାରେ ସମ୍ପର୍କୀୟଙ୍କ ନାଁରେ ପେଟ୍ରୋଲ ପମ୍ପ, ପୁରୀ ବାଲିଖଣ୍ଡରେ ସମ୍ପର୍କୀୟଙ୍କ ନାଁରେ ଘର ତିଆରି ଚାଲିଛି । କଟକରେ ଏକ ଅଫିସ ମଧ୍ୟ ଅଛି । ଏହା ଛଡା ୧୧ଟି ପ୍ଲଟ ରହିଛି ଭୁବନେଶ୍ବର, ଖୋର୍ଧା, ରଣପୁର, ନୟାଗଡ଼ରେ । ୧୧ ଡେସିମିଲର ଏଗ୍ରିକଲଚରାଲ ଲ୍ୟାଣ୍ଡ ମଧ୍ୟ ଅଛି ।
