ଆଣ୍ଠେଇଛି ପ୍ରକଳ୍ପ । ବିତିଲାଣି ୭ ବର୍ଷ, ପଡ଼ିନି ୭ ଖଣ୍ଡ ପିଲର୍ । ନର୍କ ଯନ୍ତ୍ରଣାରେ ୬ ଖଣ୍ଡ ଗାଁ । ଖରା ଦିନେ କଷ୍ଟେମଷ୍ଟେ ଚଳିଯାନ୍ତି, ବର୍ଷା ଦିନେ ବାହ୍ୟ ଜଗତରୁ ସମ୍ପୂର୍ଣ୍ଣ ବିଚ୍ଛିନ୍ନ । ଗାଁ ବିକାଶରେ ବାଧକ ସାଜିଛି ଅଧାପନ୍ତରିଆ ସେତୁ । କୋରାପୁଟ ଜିଲ୍ଲା ବନ୍ଧୁଗାଁ ବ୍ଲକ କାପୋଲଡ଼ା ପଞ୍ଚାୟତ ଆନ୍ଧ୍ର ସୀମାନ୍ତକୁ ଲାଗିରହିଛି । ପଞ୍ଚାୟତର ସୀମାବର୍ତ୍ତୀ ଗାଁ ଲୋକେ ଆଜି ଯାଏଁ ବି ଅଭିଶପ୍ତ ଜୀବନ ଅତିବାହିତ କରୁଛନ୍ତି । କାରଣ ସେମାନଙ୍କ ପାଇଁ ନା ପାନୀୟ ଜଳର ବ୍ୟବସ୍ଥା ଅଛି ନା ପକ୍କାରାସ୍ତା । ରାସ୍ତା ନଥିବାରୁ ଏକାଧିକ ସରକାରୀ ଯୋଜନାରୁ ବଞ୍ଚିତ ଅଛନ୍ତି ସୀମାନ୍ତବାସୀ ।

ପଞ୍ଚାୟତର ରେବତୀ ଗୁଡ଼ା, ଏଗୁ ଭଦ୍ରାପଲ୍ଲୀ, ସାନ ବାଙ୍କିଡି, ସିକେଟ୍ ଲଭା , ଏମ୍ଫା ୱାଲ୍ସା, ବଡ଼ ବାଙ୍କିଡିର ଲୋକ ଆଜି ବି ଅଭିଶପ୍ତ ଜୀବନ ବଞ୍ଚୁଛନ୍ତି । ସବୁଠାରୁ ବଡ଼ କଥା ହେଲା ରେବତୀଗୁଡ଼ା ଗାଁ ଓଡ଼ିଶାରେ ଥାଇ ବି ଏହି ଗାଁରେ ପ୍ରଶାସନର ପାଦ ପଡ଼ିଛି ନା ନେତାଙ୍କ । ଅଧପନ୍ତରିଆ ପୋଲ ପାଇଁ ବର୍ଷା ଦିନରେ ଅଣ୍ଟା ଯାଏ ପାଣି ଚାଲେ ତେଣୁ ମାସ ମାସ ଧରି ଗାଁ ଭିତରେ ରୁହନ୍ତି ଛଅ ଖଣ୍ଡ ଗ୍ରାମବାସୀ ।

ସମସ୍ୟା ବାବଦରେ ସରପଞ୍ଚ ଠାରୁ ଆରମ୍ଭ କରି ବ୍ଲକ ପ୍ରଶାସନ, ଜିଲ୍ଲାପାଳ ପର୍ଯ୍ୟନ୍ତ ସମସ୍ତଙ୍କୁ ଅଭିଯୋଗ କରିଛନ୍ତି । ହେଲେ କାହା ନଜର ପଡ଼ିନି । ଏଥର ସରକାର ବଦଳିଛି, ରାଜ୍ୟ ଓ କେନ୍ଦ୍ରରେ ଡବଲ ଇଞ୍ଜିନ ସରକାର । ଡବଲ ବିକାଶ ହେବ ବୋଲି ଗ୍ରାମବାସୀଙ୍କ ଆଶା ।