ବଡ଼ ଦାଣ୍ଡରେ ମଦ, ଆମିଷ ବିକ୍ରି ବନ୍ଦ ହେବ । ଶ୍ରୀମନ୍ଦିରର ଦୁଇ କିଲୋମିଟର ପରିଧି ଭିତରେ ମଦ ଦୋକାନ କିମ୍ବା ବାର ରହିବ ନାହିଁ । ପୁରୀକୁ ପିଲିଗ୍ରିମ୍ ସିଟି କରାଯିବ ବୋଲି କହିଛନ୍ତି ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ । ଏଥିସହ ବଡଦାଣ୍ଡରେ ଥିବା ସବୁ ଘରର ଉଚ୍ଚତା ସମାନ ରହିବ । ବଡ଼ ଦାଣ୍ଡକୁ ମୁହଁ କରିଥିବା ଘରଗୁଡିକର ରୂପରେଖ ବଦଳା ଯିବ । ଏନେଇ ପ୍ରାଥମିକ କାର୍ଯ୍ୟ ଆରମ୍ଭ ହୋଇଥିବା ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ ସୂଚନା ଦେଇଛନ୍ତି ।

ସେପଟେ ସ୍ନାନପୂର୍ଣ୍ଣିମା ପାଇଁ ପୁରୀ ପୋଲିସ ପକ୍ଷରୁ ଟ୍ରାଫିକ ଆଡଭାଇଜାରି ଜାରି । ୧୦ ତାରିଖ ସନ୍ଧ୍ୟାରୁ ମେଡିକାଲ ଛକଠାରୁ ଶ୍ରୀମନ୍ଦିର ଯାଏଁ ଚାରି ଚକିଆ ଯାନ ଉପରେ କଟକଣା । ଦୁଇ ଚକିଆ ଯାନ ପାଇଁ ମ୍ୟୁନିସପାଲଟି ମାର୍କେଟ କମପ୍ଲେକ୍ସରେ ବ୍ୟବସ୍ଥା । ଭୁବନେଶ୍ୱର ଆଡୁ ଚାରି ଚକିଆ ଯାନରେ ଆସୁଥିବା ଯାତ୍ରୀମାନେ ଜେଲ ରୋଡ ଏବଂ ଶରଧାବାଲିରେ ପାର୍କିଂ କରିବେ । କୋଣାର୍କ ଆଡୁ ଆସୁଥିବା ଯାତ୍ରୀଙ୍କ ପାଇଁ ଶରଧାବାଲିରେ ପାର୍କିଂ ବ୍ୟବସ୍ଥା, ବ୍ରହ୍ମଗିରି ଆଡୁ ଆସୁଥିବା ଯାତ୍ରୀମାନେ ଯାତ୍ରୀକାରେ ପାର୍କିଂ କରିପାରିବେ । ପୋଲିସ ପକ୍ଷରୁ ଜାରି କରାଯାଇଥିବା ଟ୍ରାଫିକ ଆଡଭାଇଜାରିକୁ ଅନୁପାଳନ କରିବା ପାଇଁ ଅନୁରୋଧ କରିଛନ୍ତି ପୁରୀ ଏସପି ।