ଅର୍ଗସ ବ୍ୟୁରୋ: ଚନ୍ଦନ କାଠ ଉପରେ ଦସ୍ୟୁଙ୍କ ଲୋଲୁପ ଦ୍ରୁଷ୍ଟି । ଦିନ ଥିଲା `ରକ୍ତ ଚନ୍ଦନ' ଗଛରେ ଭରପୂର ଥିଲା ଗଜପତି ଜିଲ୍ଲା । ଏବେ କିନ୍ତୁ କାଁ ଭାଁ ଗଛ ରହିଛି । ପୁରା ଜଙ୍ଗଲ କାଟି ସଫା କରିଦେଲେଣି ମାଫିଆ । ବହୁ ମୂଲ୍ୟ ରେଡ୍ ସ୍ୟାଣ୍ଡଲ୍ ବିଦେଶକୁ ଚାଲାଣ କରି କୋଟି କୋଟି ଟଙ୍କା କମାଇ ହେଉଛନ୍ତି ମାଲେମାଲ୍। ଜିଲ୍ଲାର ଗୋଷାଣି ବ୍ଳକର ଲାବାଣ୍ୟଗଡ ଏବଂ ଗୁମ୍ମା ବ୍ଲକର ନାମନଗଡ ଅଞ୍ଚଳରେ ବେଧଡ଼କ ଚାଲିଛି ଚନ୍ଦନ କାଠ ଚୋରି । ଦୁର୍ମୂଲ୍ୟ ଜଙ୍ଗଲକୁ ସୁରକ୍ଷା ଦେବାରେ ବିଫଳ ବନବିଭାଗ ।

ଔଷଧୀୟ ଗୁଣରେ ଭରପୁର ରକ୍ତ ଚନ୍ଦନ ଗଛର ସ୍ବତନ୍ତ୍ର ବଣ ସୃଷ୍ଟି କରିବା ଦିଗରେ ପାରଳା ମହାରାଜା ଶ୍ରୀ କୃଷ୍ଣଚନ୍ଦ୍ର ଗଜପତି ମୁଖ୍ୟ ଭୂମିକା ଗ୍ରହଣ କରିଥିଲେ । ବିଭିନ୍ନ ସ୍ଥାନରୁ ରକ୍ତ ଚନ୍ଦନ ଗଛ ସଂଗ୍ରହ କରି ପାରଳାଖେମୁଣ୍ଡି ନିକଟରେ ବଣ ସୃଷ୍ଟି କରିଥିଲେ ପାରଳାଖେମୁଣ୍ଡି ମହାରାଜା । ସମୟ କ୍ରମେ ଏହା ବନ ବିଭାଗ ଅଧୀନକୁ ଆସିଲା । ଏବେ ଏହା ପାରଳାଖେମୁଣ୍ଡି ବନଖଣ୍ଡ ଅଧିନସ୍ଥ ମହେନ୍ଦ୍ରଗିରି ଏବଂ ଦେବଗିରି ବନାଅଞ୍ଚଳ ଅଧୀନରେ ରହିଛି ।

ଏହି ଗଛର ଚାହିଦା ଜଣାପଡିବା ପରେ ୧୯୯୦ ବେଳକୁ ତସ୍କରୀ ଆରମ୍ଭ ହୋଇଥିଲା । ଗତ ୩୩ବର୍ଷ ଧରି ଏହି ବଣରୁ ଗଛ ଚୋରି ହୋଇଚାଲିଛି । କୁହାଯାଉଛି. ପ୍ରାୟ ୧୨ ହଜାର ଗଛ ଲଗାଇ ବଣ ସୃଷ୍ଟି କରିଥିଲେ ପାରଳା ମହାରାଜ । ସେଥି ମଧ୍ୟରୁ ଏବେ ମାତ୍ର ୧୦୦୩ଟି ଗଛ ହିଁ ରହିଥିବା ବନ ବିଭାଗ ତଥ୍ୟରୁ ସ୍ପଷ୍ଟ ହୋଇଛି ।

Argus News | argus news | Odisha Latest News, Breaking News, Trending News, Live TV