କନ୍ଧମାଳ କୋଟଗଡ଼ ବ୍ଳକ ଠାରୁ ମାତ୍ର 20 କିଲୋମିଟର ଦୂରରେ ରହିଛି ଓରା ପଞ୍ଚାୟତର ଆଡାରି ଗାଁ । ପାଖାପାଖି 100 ରୁ ଉର୍ଦ୍ଧ୍ବ ପରିବାର ଆଡ଼ାରି ଗାଁରେ ବସବାସ କରନ୍ତି। ଗାଁରେ ସ୍କୁଲ ଅଛି ସତ ମାତ୍ର ଛାତ୍ରଛାତ୍ରୀମାନଙ୍କ ପାଇଁ ପ୍ରାଥମିକ ବିଦ୍ୟାଳୟରେ କୋଠାଘର ନାହିଁ । ପ୍ରଥମେ ଗଛ ମୂଳେ ଓ ପରେ ବର୍ତ୍ତମାନର ପ୍ରଧାନ ଶିକ୍ଷକ ବଳି ପ୍ରଧାନଙ୍କ ବ୍ୟକ୍ତିଗତ ଉଦ୍ୟମରେ ଅର୍ଦ୍ଧ ନିର୍ମିତ ଘରକୁ ଟିଣ ଛପର କରି ଛାତ୍ରଛାତ୍ରୀମାନଙ୍କ ଭବିଷ୍ୟତ ନିର୍ମାଣ କରୁଛନ୍ତି।

15 ବର୍ଷ ତଳେ 2010 ମସିହାରେ ବିଦ୍ୟାଳୟ ପ୍ରତିଷ୍ଠା କରାଯାଇଥିଲା । ପାହାଡ଼ ପାଦଦେଶରେ ଅବସ୍ଥିତ ବିଦ୍ୟାଳୟ । ମାତ୍ର ଏହି ବିଦ୍ୟାଳୟ କୁ ଯିବାଆସିବା ପାଇଁ କୌଣସି ରାସ୍ତା ନାହିଁ। ବିଦ୍ୟାଳୟର ଚାରି ପାର୍ଶ୍ଵରେ କିଛି ବ୍ୟକ୍ତିଗତ ଜମି ଥିବାରୁ ବିଦ୍ୟାଳୟକୁ ଯିବାଆସିବା କରିବା ପାଇଁ ସ୍ଥାୟୀ ରାସ୍ତାଟିଏ ହୋଇ ପାରୁନାହିଁ । ଏପଟେ ଅର୍ଥ ଅଭାବରୁ ସ୍କୁଲ କୋଠା କାମ ଆଜି ଯାଏଁ ସରିନି। ଆଡ଼ାରି ପ୍ରାଥମିକ ବିଦ୍ୟାଳୟରେ ପାଠ ପଢିବା ପାଇଁ ଆଖପାଖ 3ଟି ଗାଁର ପିଲା ମାନେ ଆସିଥାନ୍ତି । କିନ୍ତୁ ବାରମ୍ବାର ପ୍ରସାସନିକ ସ୍ତରରେ ଅନୁରୋଧ କରିବା ସତ୍ତ୍ବେ ବିଦ୍ୟାଳୟ ପାଇଁ ସ୍ଥାୟୀ କୋଠାଟିଏ ନିର୍ମାଣ ହୋଇ ପାରିନାହି କି ଭିତ୍ତିଭୂମି ସଜଡା ଯାଇନି ।

ଏପଟେ ବିଦ୍ୟାଳୟର ଭିତ୍ତିଭୂମି ଅଭାବ ଯୋଗୁଁ ଦିନକୁ ଦିନ ଛାତ୍ରଛାତ୍ରୀଙ୍କ ସଂଖ୍ୟା କମିବାରେ ଲାଗିଛି। ପ୍ରତ୍ୟେକ ବର୍ଷ 60 ରୁ ଉର୍ଦ୍ଧ୍ବ ପିଲାମାନେ ପାଠ ପଢୁଥିବା ବେଳେ ଚଳିତ ବର୍ଷ ଏହା 21କୁ କମି ଆସିଛି । ଭିତ୍ତିଭୂମୀ ସମସ୍ୟା ଆଡାରି ପ୍ରାଥମିକ ବିଦ୍ୟାଳୟ ପାଇଁ ଚିନ୍ତାର କାରଣ। କାରଣ ବାରମ୍ବାର ଅଭିଯୋଗ ପରେବି ସଜଡା ଯାଇ ପାରୁନି ଭିତ୍ତିଭୂମୀ।