ଆଦିବାସୀ ଅଧ୍ୟୁଷିତ ମୟୁରଭଞ୍ଜ ଜିଲ୍ଲା ଜାମଦା ହରଗଡା ପ୍ରାଥମିକ ବିଦ୍ୟାଳୟରେ ପଡ଼ିଛି ତାଲା । ବିଜେଡି ସରକାର ସମୟରେ ବିଦ୍ୟାଳୟ ଏବଂ ଗଣଶିକ୍ଷା ବିଭାଗର ନିର୍ଦ୍ଦେଶ କ୍ରମେ 2020 ମସିହାରେ ସ୍କୁଲଟିକୁ ବନ୍ଦ କରାଯାଇଥିଲା । ଯାହାର ପରିଣାମ ଭୋଗୁଛନ୍ତି କୁନିକୁନି ଛାତ୍ରଛାତ୍ରୀ । ଗାଁରେ ଥିବା ସ୍କୁଲ ବନ୍ଦ ପଡ଼ିଥିବାରୁ ବିପଦପୂର୍ଣ୍ଣ ଭାବରେ ଜୀବନକୁ ବାଜି ଲଗାଇ ଦୀର୍ଘ 3 କିଲୋମିଟର ଦୂରରେ ଥିବା ଶାଗଜୋଡି ବିଦ୍ୟାଳୟକୁ ପାଠ ପଢ଼ିବାକୁ ଯାଉଛନ୍ତି ଛାତ୍ରଛାତ୍ରୀ । ଗାଁର କିଛି ଛାତ୍ରଛାତ୍ରୀଙ୍କ ପାଠରେ ବନ୍ଧା ହୋଇଛି ଡୋରି । ସ୍କୁଲ ନଯାଇ ବନ୍ଦ ପଡିଥିବା ବିଦ୍ୟାଳୟରେ ସମ୍ମୁଖରେ ଖେଳୁଥିବା ମଧ୍ୟ ଦେଖିବାକୁ ମିଳିଛି ।

ପିଲାଙ୍କ ଭବିଷ୍ୟତକୁ ନେଇ ଚିନ୍ତାରେ ଅଭିଭାବକ । ବାରମ୍ବାର ଗୋଷ୍ଠୀ ଶିକ୍ଷା ଅଧିକାରୀ ଓ ଜିଲ୍ଲାପାଳଙ୍କ ପାଖରେ ଯେତେ ଅଭିଯୋଗ କଲେ ମଧ୍ୟ ଫଳ ଶୂନ । ଶେଷରେ ଗ୍ରାମବାସୀ ମୋହନ ସରକାରଙ୍କୁ ବିଦ୍ୟାଳୟ ଖୋଲିବା ପାଇଁ ଅନୁରୋଧ କରିଛନ୍ତି । ତେବେ ଏନେଇ ଜାମଦା ଅତିରିକ୍ତ ଶିକ୍ଷା ଅଧିକାରୀଙ୍କୁ ପଚାରିବାରୁ ସେ କହିଛନ୍ତି, ଏହା ଆମ ହାତରେ ନାହିଁ, ତାହା ବିଦ୍ୟାଳୟ ଏବଂ ଗଣଶିକ୍ଷା ବିଭାଗଙ୍କ ଦ୍ବାରା ଖୋଲାଯାଇ ପାରିବ । ତେବେ ଦେଖିବାକୁ ବାକି ରହିଲା ଦୁର୍ଗମରେ ଛାତ୍ରଛାତ୍ରୀଙ୍କ ଭବିଷ୍ୟତ ଅନ୍ଧାର ଆଡକୁ ଯାଉଥିବା ବେଳେ ସ୍କୁଲ ଏବଂ ଗଣଶିକ୍ଷା ବିଭାଗ କଣ ପଦକ୍ଷେପ ଗ୍ରହଣ କରୁଛନ୍ତି ।