ରାଜ୍ୟରେ ଗ୍ରୀଷ୍ମ ପ୍ରବାହ ଛୁଟି ପରେ ଆଜିଠୁ ଖୋଲିବ ସ୍କୁଲ। ଡାଇରିଆ ସ୍ଥିତି ଦେଖି ଗାଇଡ୍ ଲାଇନ୍ ଜାରି କଲା ବିଦ୍ୟାଳୟ ଓ ଗଣ ଶିକ୍ଷା ବିଭାଗ । ରାଜ୍ୟର ସମସ୍ତ ଜିଲ୍ଲାପାଳଙ୍କୁ ଚିଠି ଲେଖିଛନ୍ତି ବିଭାଗୀୟ ସଚିବ। ସ୍କୁଲର ସମସ୍ତ କ୍ଲାସ ରୁମ, ଟୟଲେଟ, କମନ ରୁମ, ଲାଇବ୍ରେରୀ, ହଷ୍ଟେଲ ରୁମ୍ ଭଲ ଭାବେ ସଫା ହେବ । ଏଥିସହ ସାନିଟାଇଜ କରିବାକୁ ନିର୍ଦେଶ ଦିଆଯାଇଛି । ସଂକ୍ରମଣରୁ ବର୍ତ୍ତିବା ପାଇଁ ସମସ୍ତ ପାଣି କଣ୍ଟେନର ବା ଟାଙ୍କି ସଫା ରଖାଯିବ। ଚାଉଳ ସହ ଅନ୍ୟ ସାମଗ୍ରୀ ଠିକ ଭାବେ ସ୍ଵଚ୍ଛ ସ୍ଥାନରେ ରଖିବାକୁ ଗାଇଡ୍ ଲାଇନ୍ ଜାରି ହୋଇଛି ।

ସ୍କୁଲ ପରିସରରେ ଥିବା ଗଛ, ଘାସ ସଫା କରାଯିବ। ମରାମତି କାମ ହେଉଥିବା ସ୍କୁଲ ଗୁଡିକରେ ପଡ଼ି ରହିଥିବା ଆବର୍ଜନା ସଫେଇ କରାଯିବ । ମଶା ଦାଉରୁ ରକ୍ଷା ପାଇଁ ବ୍ୟବସ୍ଥା କରାଯିବାକୁ ନିର୍ଦ୍ଦେଶ ରହିଛି। ଅନେକ ଦିନ ପରେ ସ୍କୁଲ ଖୋଲୁଥିବାରୁ ପିଲାମାନେ ମଧ୍ୟ ଖୁବ ଖୁସି ଅଛନ୍ତି। ସେପଟେ ଡରାଉଛି ଡାଇରିଆ। ତମାମ ପ୍ରତିଷେଧମୂଳକ ପଦକ୍ଷେପ ସତ୍ବେ ରାଜ୍ୟର 3ଟି ଜିଲ୍ଲା ଯାଜପୁର, ଭଦ୍ରକ ଓ କଟକରେ ଏବେ ବି ନିୟନ୍ତ୍ରଣ ବାହାରେ ରହିଛି ଝାଡ଼ାବାନ୍ତି ସ୍ଥିତି । କେନ୍ଦ୍ରରୁ ଆସିଥିବା ଟିମ୍ ସହ ଆଜି ରାଜ୍ୟ ସ୍ବାସ୍ଥ୍ୟ ବିଭାଗର ଟିମ୍ ସଂକ୍ରମିତ ଜିଲ୍ଲା ଗସ୍ତ କରି ସ୍ଥିତି ଅନୁଧ୍ୟାନ କରିଛନ୍ତି ।