Sea Erosion / ପୁଣି କୂଳ ଲଙ୍ଘିଲା ସମୁଦ୍ର, ଘରେ ପଶିବ ସମୁଦ୍ରପାଣି, ଲୋକେ ଭୟଭୀତ

ବ୍ରହ୍ମପୁର,୧୪/୦୮: ସମୁଦ୍ର ଆଁରେ କେ.ଆର୍ଯ୍ୟପଲ୍ଲୀ ଗାଁ। ବ୍ରହ୍କପୁରର ଆର୍ଯ୍ୟପଲ୍ଲିରେ ପୁଣିଥରେ କୂଳ ଲଂଘୁଛି ସମୁଦ୍ର । ବଡ଼ ବଡ଼ ଜୁଆର ସହ ଗଞ୍ଜାମ ଜିଲ୍ଲା ଛତ୍ରପୁର ଅଞ୍ଚଳରେ ସମୁଦ୍ର ପାଣି ପଶିଥିବାରୁ ଭୟଭୀତ ହୋଇପଡ଼ିଛନ୍ତି ସ୍ଥାନୀୟ ଲୋକେ । ସମୁଦ୍ରର ଉଚ୍ଚ ଜୁଆର ଯୋଗୁଁ କୂଳ ଡେଇଁ ପାଣି ଘର ନିକଟକୁ ମାଡ଼ି ଆସିବା ସହ ପାଖରେ ଥିବା ଜଙ୍ଗଲ ଭିତରକୁ ମଧ୍ୟ ପଶିଯାଇଛି । ପୁର୍ବରୁ ଦୁଇକିଲୋ ମିଟର ଦୂରରେ ଥିବା ସମୁଦ୍ର ଗାଁକୁ ଆସି ଲାଗିଲାଣି। ସମୁଦ୍ରର ଉଗ୍ରରୂପ ଏବେ ସ୍ଥାନୀୟ ଲୋକଙ୍କ ଚିନ୍ତା ବଢ଼ାଇଦେଇଛି। ବଡ଼ ବଡ଼ ଲହଡ଼ି ମାଡ଼ି ଆସିବା ସମୟରେ ଗଛ, ଲତା ଓ ଅନ୍ୟାନ୍ୟ ଜିନିଷକୁ ସମୁଦ୍ର ପାଣି ଭସାଇ ନେଉଥିବା ଦେଖିବାକୁ ମିଳିଛି । କୂଳ ନିକଟରେ ରହୁଥିବା ଲୋକଙ୍କ ମଧ୍ୟରେ ଏହାକୁ ନେଇ ଆତଙ୍କ ଖେଳିଯାଇଛି ।

ସେପଟେ ଲଘୁଚାପ ପ୍ରଭାବରେ ଅଞ୍ଚଳରେ ବର୍ଷା ଲାଗି ରହିଥିବାରୁ ସମୁଦ୍ରର ଅବସ୍ଥା ଆହୁରି ଅଶାନ୍ତ ହେବାର ଆଶଙ୍କା ରହିଛି। ବର୍ଷା ସାଙ୍ଗକୁ ଉଚ୍ଚ ଜୁଆର ଲୋକଙ୍କ ଚିନ୍ତାକୁ ଦ୍ୱିଗୁଣିତ କରିଛି । ସମୁଦ୍ର ନିକଟବର୍ତ୍ତୀ ଅଞ୍ଚଳରେ ଏଭଳି ସ୍ଥିତି ଦେଖାଦେଇଥିବାରୁ ସତର୍କ ରହିବାକୁ ସ୍ଥାନୀୟ ଲୋକଙ୍କୁ ଆହ୍ୱାନ କରାଯାଉଛି । ବିଶେଷକରି ଉଚ୍ଚ ଜୁଆର ସମୟରେ ସମୁଦ୍ର କୂଳକୁ ନଯିବା ଏବଂ ପାଣି ଘର ନିକଟକୁ ପଶିଲେ ସୁରକ୍ଷିତ ସ୍ଥାନକୁ ଚାଲିଯିବା ଜରୁରୀ।

ପଢନ୍ତୁ ଏହି ଖବର: ସମୁଦ୍ର ଆଁରେ ଲୀନ ହେଲାଣି ଗାଁ,ଗାଁକୁ ସିଲ୍ କଲା ପ୍ରଶାସନ

ସେପଟେ ଛତ୍ରପୁରର ପୋଡମପେଟାରେ ଗୋଟିଏ ପରେ ଗୋଟିଏ ଘର ଗିଳୁଛି ସମୁଦ୍ର । ଶ୍ରୀହୀନ ହେବାକୁ ବସିଲାଣି ଜନବସତି । ଗାଁ ଗିଳିବା ପାଇଁ ମାଡ଼ି ଆସୁଛି ଲହଡ଼ି । ଏଭଳି ଦୃଶ୍ୟ ଦେଖିବାକୁ ମିଳିଛି ଗଞ୍ଜାମ ଜିଲ୍ଲା ଗଞ୍ଜାମ ବ୍ଲକର ପୋଡମପେଟା ଗାଁରେ । କିଛି ଦିନ ପୂର୍ବରୁ ଗାଁର ୧୦ରୁ ଅଧିକ ଘର ସମୁଦ୍ରରେ ମିଶିଯାଇଥିଲା । ଗତ କିଛିଦିନ ତଳେ ଘର ଭାଙ୍ଗିରୁଜି ସମୁଦ୍ର ଗର୍ଭକୁ ଚାଲିଯାଇଛି । ଦରିଆର ଉଗ୍ରରୂପ ଦେଖି ଭୟଭୀତ ଗ୍ରାମବାସୀ । ଗାଁର ଏଭଳି ଦୃଶ୍ୟକୁ ଦେଖି ଜିଲ୍ଲା ପ୍ରଶାସନ ଆଲୋଚନା ପାଇଁ ସ୍ଥାନୀୟ ଗାଁ ଲୋକଙ୍କୁ ଡାକିଥିଲେ । ୬ ଖଣ୍ଡ ଗାଁର ଲୋକେ ଜିଲ୍ଲାପାଳଙ୍କୁ ନିଜର ଦୁଃଖ ଜଣାଇଛନ୍ତି । ବିଳମ୍ବ ନକରି ତୁରନ୍ତ ସମୁଦ୍ର କୂଳରେ ପଥର ବନ୍ଧ ସହ କଂକ୍ରିଟ ୱାଲ୍ କରାଇବାକୁ ଦାବି ହୋଇଛି । ନଚେତ କେବଳ ପୋଡ଼ମପେଟା ନୁହେଁ, ବରଂ ୧୨ ଖଣ୍ଡ ଗାଁ ଦିନେ ଅତୀତ ପାଲଟିଯିବ ବୋଲି ଆଶଙ୍କା କରିଛନ୍ତି।