Sea Erosion / ରାତିରେ ବଦଳିଗଲା ଦୃଶ୍ୟ, ସକାଳେ ଘର ଆଗରେ ସମୁଦ୍ର ପାଣି

ଛତ୍ରପୁର,୦୩/୦୭: କୂଳ ଲଂଘୁଛି ସମୁଦ୍ର । ଗଞ୍ଜାମ ବ୍ଲକ ପୋଡ଼ମପେଟାରେ ସମୁଦ୍ର କୂଳ ଲଙ୍ଘିଥିବା ଦେଖିବାକୁ ମିଳିଛି | ଯାହା ଫଳରେ ଭୟଭୀତ ଅବସ୍ଥାରେ ପାଳିବନ୍ଧ ପଂଚାୟତର ୩ ଖଣ୍ଡ ଗ୍ରାମର ଗ୍ରାମବାସୀ । ଏପରିକି ରାମଗଡ଼ ପଂଚାୟତର ୭ରୁ ଅଧିକ ଗ୍ରାମର ଜନସାଧାରଣ ମଧ୍ୟ ଆତଙ୍କିତ ହୋଇପଡିଛନ୍ତି।

ଯେଉଁ ସମୁଦ୍ର ଗାଁଠୁ ୧ କିମି ଦୂରରେ ରହିଥିଲା ତାହା ଗାଁ ନିକଟରେ ପହଁଚିଯାଇଛି। ସମୁଦ୍ର ଆଁରେ ଲୀନ ହୋଇଯିବ କି ଜନ ବସତି? ଏପରି ପ୍ରଶ୍ନ ମଧ୍ୟ ଉଠିବା ଆରମ୍ଭ ହେଲାଣି । ସେପଟେ ପୋଡ଼ମପେଟାରେ ଥିବା ଗୋଟିଏ ପରେ ଗୋଟେ ଘର ସମୁଦ୍ରରେ ଲୀନ ହୋଇଗଲାଣି । ଦିନେ ସେଠାରେ ୫ ଶହ ଘର ଥିଲା ଏବେ ଆଉ କିଛିଟା ଘର ରହିଛି । ଯଦିଓ ସେଠାରେ ଜନବସତି ନାହିଁ ତଥାପି ସମୁଦ୍ର ଦିନକୁ ଦିନ କୂଳ ଲଂଘୁଛି । ଯାହାକି ଆଗାମୀ ଦିନରେ ଦୁଇ ପଂଚାୟତର ୧୭ ଖଣ୍ଡ ଗ୍ରାମ ପାଇଁ ବିପଦ ଆଣିଛି । ତୁରନ୍ତ ଏହାର ପ୍ରତିକାର ଗ୍ରାମବାସୀ ଦାବି କରିଛନ୍ତି ।

ଏହି ଘଟଣାକୁ ଗୁରୁତର ସହ ନେଇ ଛତ୍ରପୁର ବିଧାୟକ କୃଷ୍ଣ ଚନ୍ଦ୍ର ନାୟକ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଛନ୍ତି । ଦିନକୁ ଦିନ ଉପକୂଳରେ ବଢ଼ୁଥିବା ସମୁଦ୍ର କୂଳ କ୍ଷୟ ଓ କୂଳ ଲଙ୍ଘିବା ଘଟଣାକୁ ନେଇ ଚିଠିରେ ସେ ଦର୍ଶାଇଛନ୍ତି । ସମୁଦ୍ର ଦ୍ରୁତ ଗତିରେ ସ୍ଥଳଭାଗକୁ ମାଡ଼ି ଆସୁଥିବାରୁ ଜନବସତି, ଚାଷଜମି ଓ ଜନଜୀବନ ବିପଦରେ ପଡ଼ିଥିବା ସେ ଉଲ୍ଲେଖ କରିଛନ୍ତି। ଏହା ସହ ପ୍ରସିଦ୍ଧ ବଟେଶ୍ୱର ପୀଠର ସୁରକ୍ଷା ପ୍ରସଙ୍ଗ ମଧ୍ୟ ଉଠାଇଛନ୍ତି।

ପଢନ୍ତୁ ଏହି ଖବର: ବଙ୍ଗୋପସାଗରରେ ସୃଷ୍ଟି ହେଲା ଲଘୁଚାପ,୬ ତାରିଖ ଯାଏଁ ମତ୍ସ୍ୟଜୀବୀଙ୍କୁ ସମୁଦ୍ର ମନା

ସେ କହିଛନ୍ତି, ବର୍ତ୍ତମାନର ପରିସ୍ଥିତି ଜାରି ରହିଲେ ବଟେଶ୍ୱର ପୀଠ ସମେତ ଅନେକ ଗ୍ରାମ ସମୁଦ୍ର ଗର୍ଭରେ ବିଲୀନ ହେବାର ଆଶଙ୍କା ରହିଛି। ତୁରନ୍ତ ଏଥିପ୍ରତି ଗୁରୁତ୍ୱ ଦେଇ ସମୁଦ୍ର କୂଳ ସୁରକ୍ଷା ପ୍ରକଳ୍ପ ପାଇଁ ତୁରନ୍ତ ପ୍ରଶାସନିକ ଓ ଆର୍ଥିକ ଅନୁମୋଦନ ପ୍ରଦାନ କରି କାର୍ଯ୍ୟ ଆରମ୍ଭ କରିବାକୁ ସେ ମୁଖ୍ୟମନ୍ତ୍ରୀଙ୍କ ନିକଟରେ ଦାବି କରିଛନ୍ତି।

ସେପଟେ ଦୀଘା ସମୁଦ୍ରରେ ଉଠିଲା ୧୦ ଫୁଟର ଉଚ୍ଚ ଜୁଆର । ସ୍ଥାନୀୟ ପ୍ରଶାସନ ପକ୍ଷରୁ ସତର୍କତା ଜାରି । ପଡ଼ୋଶୀ ରାଜ୍ୟ ପଶ୍ଚିମବଙ୍ଗ ଦୀଘା ଓ ତାଳସାରି ଉଦୟପୁରରେ ସମୁଦ୍ର ଅଶାନ୍ତ ହୋଇଥିବା
ଦେଖିବାକୁ ମିଳିଛି । ସୁରକ୍ଷା ବନ୍ଧ ଡେଇଁ ଦୀଘା ସହର ଭିତରକୁ ପାଣି ପଶିବା ଆରମ୍ଭ ହୋଇଥିବା ବେଳେ ପ୍ରଶାସନ ପକ୍ଷରୁ ସତର୍କତା ଜାରି କରାଯାଇଥିବା ଦେଖିବାକୁ ମିଳିଛି ।
ବିଭିନ୍ନ ରାଜ୍ୟରୁ ପର୍ଯ୍ୟଟକ ମାନେ ଦୀଘାକୁ ଆସିଥିବା ବେଳେ ଶୁକ୍ରବାର ଏଭଳି ସମୁଦ୍ରର କରାଳ ରୂପ ଦେଖି ପ୍ରଶାସନ ପକ୍ଷରୁ ପର୍ଯ୍ୟଟକ ଓ ମତ୍ସ୍ୟଜୀବୀ ମାନଙ୍କୁ ସମୁଦ୍ରକୁ ନଯିବାକୁ ସମସ୍ତଙ୍କୁ ବାରଣ କରାଯାଇଛି । ସେପଟେ ମତ୍ସ୍ୟଜୀବୀଙ୍କୁ ସମୁଦ୍ରକୁ ନଯିବାକୁ ଚନ୍ଦନେଶ୍ୱର ମତ୍ସ୍ୟ ବିଭାଗ ପକ୍ଷରୁ ଉଦୟପୁର ତାଳସାରି ରଣସିଂହପୁର କୀର୍ତିନିଆ ଆଦି ମତ୍ସ୍ୟ ଅବତରଣ କେନ୍ଦ୍ରରେ ଡାକବାଜି ଯନ୍ତ୍ର ଦ୍ୱାରା ସତର୍କତା ଆରମ୍ଭ କରାଯାଇଛି ।