ରେଳଧାରଣା ବିଛା ସରିଛି । ରେଳଧାରଣା ଉପରେ ଚାଲିଛି ବିଦ୍ୟୁତ ସଂଯୋଗୀକରଣ କାମ । ଅତ୍ୟାଧୁନିକ ମେସିନ ସାହାଯ୍ୟରେ ଚାଲିଛି ଯାଞ୍ଚ । ଏପଟେ ପୁରୁଣାକଟକ ରେଳ ଷ୍ଟେସନ ନିର୍ମାଣ ମଧ୍ୟ ଶେଷ ହୋଇ ୧୧୦ ସ୍ପିଡ଼ ଟ୍ରାଏଲ ରନ ସଫଳ ହୋଇଛି । ଯାଞ୍ଚ ପ୍ରକ୍ରିୟା ଦୁଇଦିନ ଧରି ଚାଲିଥିଲା । ପ୍ରଥମ ଦିନରେ CRS-କମିସନର ଅଫ ରେଳ ସେପ୍ଟି, ବୌଦ୍ଧ ଷ୍ଟେସନ ଠାରୁ ଚମ୍ପାପୁର ଷ୍ଟେସନ ଓ ଦ୍ୱିତୀୟ ଦିନ ଚମ୍ପାପୁର ଷ୍ଟେସନ ଠାରୁ ପୁରୁଣାକଟକ ଷ୍ଟେସନ ମଧ୍ୟରେ ଥିବା ସମସ୍ତ ବ୍ୟବସ୍ଥା ଯାଞ୍ଚ କରିଥିଲେ । ଏଥିସହ ୧୧୦ ସ୍ପିଡ଼ ଟ୍ରାଏଲ ରନ ସଫଳ ହୋଇଛି l ୧୦ଜଣିଆ ରେଳ ଅଧିକାରୀ ଟିମ ୫ ଟି ଟ୍ରେନଟ୍ରଲି ସାହାଯ୍ୟ ରେ ରେଳ ଧାରଣାର ବୌଦ୍ଧ ଷ୍ଟେସନ ପଟୁ ପୁରୁଣାକଟକ ଷ୍ଟେସନକୁ ଯାତ୍ରା କରିଥିଲେ । ଏହି ସମୟରେ ରେଳପଥର ବିଭିନ୍ନ ଜାଗାରେ ଉଚ୍ଚତା ମାପି ଦେଖିବା ସହ ସିଗନାଲ ବ୍ୟବସ୍ଥା ଯାଞ୍ଚ କରିଥିଲେ ।

ପୁରୁଣାକଟକ ଷ୍ଟେସନର ସମସ୍ତ ସୁରକ୍ଷା ବ୍ୟବସ୍ଥା ଯାଞ୍ଚ କରିଥିଲେ । ଷ୍ଟେସନ ରେ ଥିବା ସମସ୍ତ ଲୁପ-ଲାଇନ ମେନ-ଲାଇନ ମଧ୍ୟ ତଦାରଖ କରିଥିଲେ । ସମସ୍ତ ଯାଞ୍ଚ ପ୍ରକ୍ରିୟା ସରିବା ପରେ ଦ୍ୱିତୀୟ ଦିନ ପାସେଞ୍ଜର ଟ୍ରେନ କୁ ବଲାଙ୍ଗୀର ଅଭିମୁଖେ ୧୧୦ ବେଗ ରେ ଚଳାଇବା ପାଇଁ ବିଭାଗ ପକ୍ଷରୁ ଲୋକପାଇଲଟ ଙ୍କୁ ନିର୍ଦ୍ଦେଶ ଦିଆଯାଇଥିଲା । ପୂଜାର୍ଚ୍ଚନା ସରିବା ପରେ ସବୁଜ ପତାକା ଦେଖାଇ ସ୍ପଡ଼ ଟ୍ରାଏଲ ରନ ଆରମ୍ଭ ହୋଇଥିଲା । CRS ଙ୍କ ନିକଟରୁ ସୁରକ୍ଷା ପ୍ରମାଣପତ୍ର ମିଳିବା ପରେ ଖୁବଶୀଘ୍ର ରେଳ ମନ୍ତ୍ରାଳୟରୁ ଗ୍ରୀନ ସିଗନାଲ ମିଳିବ । ଏହା ପରେ ପୁରୁଣାକଟକ କୁ ରେଳ ଗଡ଼ିବ ବୋଲି DRM ସମ୍ବଲପୁର କହିଛନ୍ତି ।

ଅନ୍ୟପଟେ ଖୋର୍ଦ୍ଧା ବଲାଙ୍ଗୀର ରେଲପଥରେ 7ଟି ଟନେଲ ନିର୍ମାଣ ଚାଲିଛି l ସେଥିମଧ୍ୟରେ ବୌଦ୍ଧ ରେ 4ଟି ଟନେଲ କାର୍ଯ୍ୟ ସରିଛି । ନୟାଗଡ଼ ଜିଲ୍ଲାରେ ୩ଟି ଟନେଲ ନିର୍ମାଣ ଚାଲିଛି। ଟନେଲ ଭିତରେ ରେଲଧାରଣା ବିଛା କାର୍ଯ୍ୟ ଆରମ୍ଭ ହୋଇଛି l ଏହାପରେ ଆରମ୍ଭ ହେବ ବିଦ୍ୟୁତ ସଂଯୋଗୀକରଣ କାର୍ଯ୍ୟ । ନିର୍ମାଣ ରେ ଲାଗିପଡିଛନ୍ତି ଠିକାସଂସ୍ଥା । ସମସ୍ତ ସୁରକ୍ଷା ବ୍ୟବସ୍ଥା ଅବଲମ୍ବନ କରି ଇଞ୍ଜିନିୟର ଓ ଶ୍ରମିକମାନେ କାର୍ଯ୍ୟ କରୁଛନ୍ତି l ଖୁବଶୀଘ୍ର ଟନେଲ କାର୍ଯ୍ୟ ସମ୍ପୂର୍ଣ୍ଣ ହେବ ବୋଲି ଯନ୍ତ୍ରୀ କହିଛନ୍ତି । ...

କଂଗ୍ରେସ ସରକାର ସମୟରେ ଧୀମା ଥିଲା କାମ । ଗତ 5ବର୍ଷରେ କ୍ଷୀପ୍ର ହୋଇଛି କାମ । ପୁରୁଣା କଟକ ପର୍ଯ୍ୟନ୍ତ ସୁରକ୍ଷା ବ୍ୟବସ୍ଥା ସମ୍ପୂର୍ଣ୍ଣ ହୋଇଛି । ରେଲ ମନ୍ତ୍ରାଣାଳୟ ର ଗ୍ରୀନ ସିଗନାଲକୁ ଅପେକ୍ଷା। ଟନେଲ କାର୍ଯ୍ୟ ଶୀଘ୍ର ସମ୍ପୂର୍ଣ୍ଣ ହେଲେ ଶିକ୍ଷା, ସ୍ୱାସ୍ଥ୍ୟ , ବାଣିଜ୍ୟ ଓ ଯୋଗାଯୋଗ କ୍ଷେତ୍ରରେ ଏକ ମାଇଲ ଖୁଣ୍ଟ ହେବ ବୋଲି ଆଶା କରାଯାଉଛି ।

Argus News | argus news | Odisha Latest News, Breaking News, Trending News, Live TV