ମୟୂରଭଞ୍ଜ ଜିଲ୍ଲାରେ ଚାରିଆଡେ କୋହଲା ପାଗ, ରାସ୍ତା ଘାଟରେ ବାଟ ଓଗାଳୁଛି କୁହୁଡିର ଆସ୍ତରଣ । ଦିନ ୧୧ଟା ଯାଏ ସୂର୍ଯ୍ୟ କିରଣ ପଡୁନି ଧରାପୃଷ୍ଠରେ । ମଝିରେ ମଝିରେ ଉତ୍ତରା ପବନରେ ଦେହହାତ କାଲୁଆ ମାରୁଛି । ଆଜକୁ ୪ଦିନ ହେଲାଣି ପୁରା ମୟୂରଭଞ୍ଜ ଜିଲ୍ଲାର ହାଲ୍ ବେହାଲ୍ ହେଲାଣି । ଭୋର ସକାଳୁ ୪/୫ ମିଟର ରାସ୍ତା ଦୃଶ୍ୟ ହେଉଥିବା ଯୋଗୁଁଗାଡିମଟର ଚଳାଚଳରେ ଘୋର ସମାସ୍ୟା ସୃଷ୍ଟି ହୋଇଛି ।

ଲୋକେ ଗାଡିର ଲାଇଟ୍ ଲଗାଇ ଯିବା ଆସିବା କରୁଥିବା ଦେଖିବାକୁ ମିଳିଛି । ମୟୂରଭଞ୍ଜ ଜିଲ୍ଲା ଦେଇ ଯାଇଥିବା ୧୮ ନମ୍ବର ଜାତୀୟ ରାଜପଥ ଓ ୪୯ ନମ୍ବର ଜାତୀୟ ରାଜପଥରେ ଗାଡି ଚଳାଚଳରେ ସମସ୍ୟା ଦେଖା ଦେଇଦେଇଛି । ଘନ କୁହୁଡି ଯୋଗୁଁ ସକାଳୁ ସକାଳୁ ଲୋକେ ଘରୁ ବାହାରିବା ଖାସ୍‌ କରି ପିଲାମାନେ ସ୍କୁଲ ଯିବା କଷ୍ଟକର ହୋଇପଡ଼ିଛି । ସକାଳୁ ସକାଳୁ ଚଲଚଞ୍ଚଳ ହୋଇ ପଡୁଥିବା ବଜାର ଘାଟ ଶୂନ ଶାନ୍ ହୋଇପଡିଛି ।

ଶିମିଳିପାଳର ଉପରବାରାହାକାମୁଡାରେ ସର୍ବନିମ୍ନ ତାପମାତ୍ରା ୪ ଡିଗ୍ରୀ ରେକର୍ଡ ହୋଇଛି । ଆହୁରି ୭ଦିନ ଧରି ଏପରି ପାଗ ରହିବାନେଇ ପାଣିପାଗ ବିଭାଗ ପକ୍ଷରୁ ସୂଚନା ଜାରି କରାଯାଇଛି । ଅନ୍ୟପଟେ ରାଜ୍ୟ ବାଣିଜ୍ୟ ଓ ପରିବହନ ବିଭାଗ ପକ୍ଷରୁ କୁହୁଡି ସମୟରେ ଗାଡି ଚଳାଇବାକୁ ବାରଣ କରାଯାଇଛି, ନିହାତି ଆବଶ୍ୟକ ସ୍ଥଳେ ସାବଧାନତାର ସହ ଯିବା ଆସିବା କରିବାକୁ ପରାମର୍ଶ ଦିଆଯାଇଛି।

ଅନ୍ୟପଟେ ରାଜ୍ୟରେ ଜାରି ରହିଛି ଶୀତ ଲହରୀ । ଭାରତୀୟ ପାଣିପାଗ ବିଭାଗର କୁହୁଡ଼ି ସତର୍କତାକୁ ଦୃଷ୍ଟିରେ ରଖି ରାଜ୍ୟ ପରିବହନ ବିଭାଗ ସତର୍କତାମୂଳକ ପଦକ୍ଷେପ ନେଇଛି । ବିଭାଗ ଘନ କହୁଡ଼ି ପାଇଁ ରାଜ୍ୟର ୬ ଜିଲ୍ଲାର ଆରଟିଓଙ୍କୁ ମାର୍ଗଦର୍ଶିକା ଜାରି କରିଛି । ଏହି ୬ ଜିଲ୍ଲା ହେଉଛି ସୁନ୍ଦରଗଡ଼, ଝାରସୁଗୁଡ଼ା, କଳାହାଣ୍ଡି, କନ୍ଧମାଳ, କୋରାପୁଟ ଏବଂ ସମ୍ବଲପୁର ।

ବାଣିଜ୍ୟ ଓ ପରିବହନ ବିଭାଗ ମନ୍ତ୍ରୀ ବିଭୂତି ଭୂଷଣ ଜେନାଙ୍କ ନିର୍ଦ୍ଦେଶରେ ଜାରି ମାର୍ଗଦର୍ଶିକା ଅନୁସାରେ, ଘନ କୁହୁଡ଼ି ପାଇଁ ଏହି ୬ ଜିଲ୍ଲାର ଆରଟିଓମାନଙ୍କୁ ଦୁର୍ଘଟଣା ନିବାରଣ ପଦକ୍ଷେପ ନେବା ପାଇଁ ନିର୍ଦ୍ଦେଶ ଦିଆଯାଇଛି। ଅର୍ଥାତ୍ ଏହି ୬ ଜିଲ୍ଲାରେ ସଚେତନତା ଓ ଚେକିଂ କଡ଼ା କଡ଼ି କରାଯିବ। ବାଣିଜ୍ୟିକ ଯାନରେ ହେଡ୍ ଲାଇଟ୍, ବ୍ରେକ୍ ଲାଇଟ୍, ରିଫ୍ଲେକ୍ଟର ବ୍ୟବହାର କରନ୍ତୁ, ଭୋର ସମୟରେ ଅନାବଶ୍ୟକ ଯାତ୍ରା ଏଡ଼ାନ୍ତୁ, ଅଭିଜ୍ଞ ଚାଳକଙ୍କୁ ନିଯୁକ୍ତ କରନ୍ତୁ ବୋଲି ମଧ୍ୟ ମାର୍ଗଦର୍ଶିକାରେ କୁହାଯାଇଛି।