ଅର୍ଗସ ବ୍ୟୁରୋ: ବର୍ଷ ପରେ ବର୍ଷ ଗଡୁଛି । ମାତ୍ର ଆଶା ପୂରଣ ହେଉନି । ସରିବାର ନାଁ ଧରୁନି ଗଞ୍ଜାମ ଜିଲ୍ଲା ପାତ୍ରପୁର ବ୍ଲକ ଚାଲୁଣିଆ ନାଳ ଉପରେ ନିର୍ମାଣଧୀନ ସିଲେଇସିଙ୍ଗି ଲାଇଡା ସେତୁ କାମ । ପୂର୍ବ ସରକାରବେଳେ 2023 ମସିହାରେ 5 ଲକ୍ଷ 22 ହଜାର 535 ଟଙ୍କା ବ୍ୟୟରେ ଏହି ସେତୁ ନିର୍ମାଣ କରିବା ଦାୟିତ୍ବ ଦିଆଯାଇଥିଲା। 2024 ସେତୁ ନିର୍ମାଣର ଅବଧି ଶେଷ ଥିଲା । ମାତ୍ର ସମୟ ସରିଯାଇଥିଲେ ସୁଦ୍ଧା ସେତୁ ନିର୍ମାଣ କାମ ସଂପୂର୍ଣ୍ଣ ହୋଇନାହିଁ । ଯାତାୟତରେ ସମସ୍ୟା ଭୋଗ କରୁଥିବା ତୁମ୍ବା ଓ ବୁରାତାଲ ପଞ୍ଚାୟତର ତାଳବାଢ, ସରଡା, ରମ୍ପା ଭଳି ପ୍ରାୟ 12ଟି ଗାଁର ବାସିନ୍ଦା ଦୀର୍ଘ ବର୍ଷ ହେବ ବ୍ରିଜ୍ ଖଣ୍ଡେ ଲାଗି ଚାହିଁ ବସିଛନ୍ତି । କାହିଁକି ନା ଚାଲୁଣିଆ ନାଳ ଗମନାଗମନରେ ବାଧା ସୃଷ୍ଟି କରୁଛି । ବିଶେଷ କରି ବର୍ଷାଦିନେ ନାଳରେ ପାଣି ବଢିଯିବା ଯୋଗୁଁ ଅସୁବିଧାର ସମ୍ମୁଖୀନ ହୋଇଥାନ୍ତି ଗରିବ ଆଦିବାସୀ ପରିବାର ।

ସେତୁ ନିର୍ମାଣ କାର୍ଯ୍ୟରେ ଅହେତୁକ ବିଳମ୍ବ ଓ ନିମ୍ନମାନର କାମ ହେଉଥିବା ନେଇ ଅଞ୍ଚଳବାସିନ୍ଦା ଅଭିଯୋଗ କରିଛନ୍ତି । ଏନେଇ ବିଭାଗୀୟ ଅଧିକାରୀଙ୍କୁ ବାରମ୍ବାର ଜଣାଇଥିଲେ ସୁଦ୍ଧା କୌଣସି ପଦକ୍ଷେପ ନିଆଯାଉନାହିଁ । ଏପରି ଦିନ ପରେ ଦିନ ଗଡୁଥିବା ବେଳେ ସେତୁ କାମ କେବେ ଶେଷ ହେବ ତାହାକୁ ନେଇ ଅନିଶ୍ଚିତତା ବଢ଼ିବାରେ ଲାଗିଛି । ବ୍ରିଜ୍ ପ୍ରତି ଦୃଷ୍ଟି ଦେଇ ରାଜ୍ୟ ସରକାର ତୁରନ୍ତ ପଦକ୍ଷେପ ନେବାକୁ ପଞ୍ଚାୟତ ବାସିନ୍ଦା ଦାବି କରିଛନ୍ତି ।

Argus News | argus news | Odisha Latest News, Breaking News, Trending News, Live TV