ଭୁବନେଶ୍ଵର: କାହା ଗୁଳିରେ ହୋଇଥିଲା ନବ ଦାସଙ୍କ ମୃତ୍ୟୁ । ନବଙ୍କୁ ଏକାଧିକ ବନ୍ଧୁକରୁ ଗୁଳିମାଡ଼ ହୋଇଥିବା ନେଇ ରାଜ୍ୟ ଫରେନସିକ୍ ଲ୍ୟାବର ଫିଲ୍ଡ ରିପୋର୍ଟରେ ଦର୍ଶାଯାଇଛି । ରିପୋର୍ଟ ଅନୁସାରେ, ନବ ଦାସଙ୍କ ହତ୍ୟା ଦିନ ତାଙ୍କ ଗାଡ଼ି ଉପରକୁ ୩ଟି ଏବଂ ପଛରୁ ଆସୁଥିବା ସରକାରୀ ଗାଡ଼ି ଉପରକୁ ବି ୫ଟି ଗୁଳିମାଡ଼ ହୋଇଥିଲା । ତେଣୁ ସ୍ଵାଭାବିକ ଭାବେ ଏଏସ୍ଆଇ ଗୋପାଳ ଦାସଙ୍କ ବ୍ୟତୀତ ଏହି ଗୁଳିକାଣ୍ଡରେ ଆଉ କିଏ ସମ୍ପୃକ୍ତ ତାକୁ ନେଇ ବଡ଼ ପ୍ରଶ୍ନବାଚୀ ସୃଷ୍ଟି ହୋଇଛି ।

ସେ ଦିନ କେବଳ ଗୋପାଳ ଦାସଙ୍କ ବନ୍ଧୁକରୁ ନୁହେଁ ବରଂ ଏକାଧିକ ବନ୍ଧୁକରୁ ଗୁଳିମାଡ଼ ହୋଇଥିବା ରିପୋର୍ଟ ସ୍ପଷ୍ଟ କରୁଛି । ରିପୋର୍ଟ ସାମ୍ନାକୁ ଆସିବା ପରେ ଏବେ ମାମଲାରେ ନୂଆ ମୋଡ଼ ନେଇଛି । ନବ ଦାସଙ୍କୁ ହତ୍ୟା ଲାଗି ନିଯୁକ୍ତ ହୋଇଥିଲେ କି ସ୍ନାଇପର । ସ୍ନାଇପର ନିଯୁକ୍ତ ହୋଇଥିବା ନେଇ ଅଭିଯୁକ୍ତ ଗୋପାଳଙ୍କ ଓକିଲ ନରେଶ ନାୟକ ଲଗାତାର ଭାବେ ଆଶଙ୍କା ମଧ୍ୟ କରି ଆସୁଛନ୍ତି ।

କ୍ରାଇମବ୍ରାଞ୍ଚ ପକ୍ଷରୁ ଦାଖଲ ଚାର୍ଜସିଟ୍ ଓ ଏସଏଫଏସଏଲର ରିପୋର୍ଟ ଅନୁସାରେ ୨୦୨୩ ଜାନୁଆରୀ ୨୯ ତାରିଖରେ ନବ ଦାସଙ୍କର ୨ଟି ଗାଡ଼ି ବ୍ରଜରାଜନଗର ଗାନ୍ଧୀ ଛକକୁ ଯାଇଥିଲା । ପ୍ରଥମ ଗାଡ଼ିରେ ନବ ଦାସ ବସିଥିବା ବେଳେ ଦ୍ଵିତୀୟ ଗାଡ଼ିରେ ତାଙ୍କର ସହ‌ଯୋଗୀ ବସିଥିଲେ । କ୍ରାଇମବ୍ରାଞ୍ଚ ପକ୍ଷରୁ ଦାଖଲ ହୋଇଥିବା ଫାଇନାଲ ଫର୍ମରେ ଗୋପାଳ ପାଖରୁ ୧୮ଟି ଗୁଳିଥିବା ଗୋଟିଏ ମ୍ୟାଗାଜିନ୍, ୩ଟି ଅଫୁଟା ଗୁଳି ଜବତ କରାଯାଇଥିବା ନେଇ ଦର୍ଶାଯାଇଥିଲା ।

ଘଟଣାସ୍ଥଳରୁ ଗୋଟିଏ ଖୋକା ଓ ଅନ୍ୟ ଏକ ଅକାମୀ ଗୁଳି ବି ଜବତ କରାଯାଇଥିଲା ବୋଲି ରିପୋର୍ଟରେ ଉଲ୍ଲେଖ ରହିଛି । ଗୋଟିଏ ଗୁଳି ସେ ବ୍ଲାଙ୍କ ଫାୟାରିଂ ମଧ୍ୟ କରିଥିଲେ । କିନ୍ତୁ ଷ୍ଟେଟ୍ ଫରେନସିକ୍ ଲ୍ୟାବର ରିପୋର୍ଟ କହୁଛି, ଭେଇକିଲ୍ ୨ ଅର୍ଥାତ୍ ପଛରେ ଥିବା ଗାଡ଼ିରେ ବି ପାଞ୍ଚଟି ଗୁଳି ବାଜିଥିବାର କଣା ରହିଛି । ଏଭଳି ସ୍ଥିତିରେ ନବ ଦାସଙ୍କୁ କେଉଁ ବନ୍ଧୁକରୁ ଗୁଳି ବାଜିଛି ତାହା ବର୍ତ୍ତମାନ ସୁଦ୍ଧା ଅସ୍ପଷ୍ଟ ରହିଛି ।

ପଛ ଗାଡ଼ିଟି ସରକାରୀ ଥିବା ବେଳେ ସେହି ଗାଡ଼ିରେ ନବ ଦାସ ଥିବା ଅନୁମାନ କରି ଗୁଳି ବର୍ଷା କରାଯାଇଥିଲା କି ? କେତୋଟି ବନ୍ଧୁକ ପ୍ରକୃତରେ ବ୍ୟବହାର କରାଯାଇଥିଲା ସେ ଦିନ ? ଘଟଣାସ୍ଥଳରେ ଏତେ ଗୁଳିମାଡ଼ ହେବା ପରେ କେହି କେମିତି କିଛି ଜାଣିପାରି ନ ଥିଲେ ଆଦି ଅନେକ ପ୍ରଶ୍ନ ଏବେ ବି ଅସମାହିତ ।

ସେପଟେ ଘଟଣା ସମୟରେ ନବ ଦାସଙ୍କୁ ଆହତ ଅବସ୍ଥାରେ ଉଠାଇ କାର୍‌ ଭିତରକୁ ନେଇଥିବା ଦ୍ଵାରିକାନାଥ ପଣ୍ଡା ଓ ଶୁଭେନ୍ଦୁ ପଟ୍ଟନାୟକଙ୍କ ପୋଷାକ, ନବ ଦାସଙ୍କ ବେକରେ ପଡ଼ିଥିବା ଫୁଲ ମାଳ, ତାଙ୍କ ଚପଲକୁ କ୍ରାଇମ୍‌ବ୍ରାଞ୍ଚ ଜବତ କରିଥିଲା ବେଳେ ଘଟଣା ସମୟରେ ନବ ଦାସ ପିନ୍ଧିଥିବା ସାର୍ଟ, ବସିଥିବା କାର୍‌ ସିଟ୍‌ର ରକ୍ତଭିଜା ଟର୍‌କିସ୍‌ ସିଜର୍‌ ଲିଷ୍ଟରେ ନଥିଲା ।

ନବ ଦାସଙ୍କ ହତ୍ୟାରେ ଏକାଧିକ ବନ୍ଧୁକ ବ୍ୟବହାର ହୋଇଥିବା ତଥ୍ୟ ପଦାକୁ ଆସିବା ପରେ ଚାଞ୍ଚଲ୍ୟକର ସ୍ଥିତି ସୃଷ୍ଟି ହୋଇଛି । ଗୋପାଳଙ୍କ ସହ ଆଉ କେଉଁମାନେ ଏହି ହତ୍ୟାକାଣ୍ଡରେ ସମ୍ପୃକ୍ତ ? ହତ୍ୟା ପାଇଁ କିଏ ସୁପାରି ଦେଇଥିଲା ? ଏଭଳି ଅନେକ ପ୍ରଶ୍ନ ଉଠିଛି ।

Argus News | argus news | Odisha Latest News, Breaking News, Trending News, Live TV