Shital Sasthi / ସରିଲା ପତର ପେଣ୍ଡି ଚାଲିଛି ଦେବ ନିଉତା: ଦେବ ଦମ୍ପତିଙ୍କ ବିବାହ ଜମୁଛି ନିମନ୍ତ୍ରଣ ପରମ୍ପରା

ସରିଲା ପତର ପେଣ୍ଡି, ଚାଲିଛି ଦେବ ନିଉତା...ବାଜା, ଗାଜା, ଦୁଲଦୁଲିର ତାଳେ ତାଳେ ଜମୁଛି ଦେବ ନିମନ୍ତ୍ରଣ । କେଉଁଠି ହନୁମାନ ତ କେଉଁଠି ପ୍ରଭୁ ନୃସିଂହ । ସମ୍ବଲପୁରରୁ ଏକାମ୍ର କ୍ଷେତ୍ର, ଦେବ ଦମ୍ପତିଙ୍କ ମିଳନ ପାଇଁ ପରିବେଶ ଉତ୍ସବମୁଖର । କାଲି କେଦାରଗୌରୀ ଅଭିମୁଖେ ବାହାରିବେ ଏକାମ୍ରର ନାଥ ପ୍ରଭୁ ଲିଙ୍ଗରାଜ ।

ପ୍ରସିଦ୍ଧ ସମ୍ବଲପୁର ଶୀତଳ ଷଷ୍ଠୀ ଯାତ୍ରାର ସରିଲା ପତର ପେଣ୍ତି ବା ନିର୍ବନ୍ଧ କାର୍ଯ୍ୟ । ଆଜି ହେବ ହନୁମାନ ନିୟୁତା ବା ଗୁଆଗୁଣ୍ତା । ଶୀତଳଷଷ୍ଠୀ ଯାତ୍ରାରେ ଗୁରୁତ୍ବ ବହନ କରିଥାଏ ଦେବ ନିମନ୍ତ୍ରଣ ବା ଗୁଆଗୁଣ୍ଡା । ପ୍ରମୁଖ ପଡ଼ାଗୁଡ଼ିକରେ ସୁସଜ୍ଜିତ ବିମାନରେ ହନୁମାନ ବିରାଜମାନ ହୋଇ ଏକ ବିରାଟ ଶୋଭାଯାତ୍ରାରେ ବାହାରି ବିଭିନ୍ନ ମନ୍ଦିର ଯାଇଥାନ୍ତି ଏବଂ ସେଠାରେ ଦେବ ବିବାହ ପାଇଁ ନିମନ୍ତ୍ରଣ କରିଥାନ୍ତି । କିନ୍ତୁ ନନ୍ଦପଡ଼ାର ବମ୍ ବରାଡ ବାଲୁଙ୍କେଶ୍ୱର ବାବାଙ୍କ ଶୀତଳଷଷ୍ଠୀରେ ନୃସିଂହ ନିଉତାର ନୀତି ଅନୁଷ୍ଠିତ ହୁଏ ।

ଦେବାଦିଦେବ ମହାଦେବ ଓ ମା’ ପାର୍ବତୀଙ୍କ ଦିବ୍ୟ ବିବାହରେ ସାମିଲ ହେବା ପାଇଁ ପ୍ରଭୁ ନୃସିଂହ ସହରର ବିଭିନ୍ନ ଦେବଦେବୀଙ୍କୁ ନିମନ୍ତ୍ରଣ କରିଥାନ୍ତି । ବାଜା, ଗାଜା, ନିଶାନ ଓ ଦୁଲଦୁଲିର ତାଳେ ତାଳେ ସୁସଜ୍ଜିତ ବିମାନରେ ବିରାଜମାନ ହୋଇ ପ୍ରଭୁ ନୃସିଂହ ବାହାରନ୍ତି । ତାଙ୍କ ସହ ବରପିତା ମଧ୍ୟ ରହିଥାନ୍ତି । ହଳଦୀ, ଗୁଆ, ଲଡୁ ଓ ବସ୍ତ୍ର ଅର୍ପଣ କରି ଦେବଦେବୀଙ୍କୁ ବିବାହ ଉତ୍ସବରେ ଯୋଗଦେବାକୁ ନିମନ୍ତ୍ରଣ କରାଯାଏ ।

ସମ୍ବଲପୁର ଭଳି ରାଜଧାନୀ ଭୁବନେଶ୍ୱରରେ ମଧ୍ୟ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ । ଆସନ୍ତାକାଲି ପବିତ୍ର ଶୀତଳଷଷ୍ଠୀ ପାଇଁ ବାଜା, ବାଣ ରୋଷଣୀ ନେଇ କେଦାରଗୌରୀ ମନ୍ଦିର ଅଭିମୁଖେ ବାହାରିବେ ମହାପ୍ରଭୁ ଲିଙ୍ଗରାଜ । ଦେବନୀତି ଅନୁଯାୟୀ ଶୂଭ ମୁହୂର୍ତ୍ତରେ ଧରିବେ ମାତା ପାର୍ବତୀଙ୍କ ହାତ ।

ଆସନ୍ତାକାଲି ରାତି ୧୦ଟାରୁ ଲିଙ୍ଗରାଜ ମନ୍ଦିର ପରିସରରୁ ବାହାରିବେ ବରଯାତ୍ରୀ ଏବଂ ରାତି ୩ଟା ୧୫ ମିନିଟରେ ହସ୍ତ ଘଣ୍ଟି ପାଇଁ ନୀତି ନିର୍ଦ୍ଧାରଣ କରାଯାଇଛି। ୧୨ ହଜାର ଲୋକଙ୍କ ପାଇଁ ପ୍ରସାଦ ସେବନର ବ୍ୟବସ୍ଥା କରାଯାଇଥିବା ବେଳେ ୫ ପ୍ଲାଟୁନ୍ ଫୋର୍ସ ମୁତୟନ କରାଯିବ । ଯୁଗ ବଦଳୁଛି, ସମୟ ବଦଳୁଛି, କିନ୍ତୁ ସମ୍ବଲପୁରରୁ ଏକାମ୍ର କ୍ଷେତ୍ର ପର୍ଯ୍ୟନ୍ତ ଶୀତଳଷଷ୍ଠୀର ଏହି ଶତାବ୍ଦୀ ପୁରୁଣା ଦେବ ପରମ୍ପରା ଆଜି ବି ଜୀବନ୍ତ ଏବଂ ଅନନ୍ୟ।