୨୦୪୭ ସୁଦ୍ଧା ସିକଲ୍ ସେଲ ସ୍ଵାସ୍ଥ୍ୟ ସମସ୍ୟାର ହେବ ବିଲୋପ
Key Points
ମିଶନ ମୋଡରେ ପଦକ୍ଷେପ ହାତକୁ ନେଉଛନ୍ତି ମୋଦି ସରକାର
୨୦୪୭ ସୁଦ୍ଧା ସିକଲ୍ ସେଲ ସ୍ଵାସ୍ଥ୍ୟ ସମସ୍ୟାର ହେବ ବିଲୋପ
ଫୋକସରେ ଚିକିତ୍ସା, ନିରାକରଣ ଓ ପରିଚାଳନାର ଅଗ୍ରଗତି
୨୦୪୭ ସୁଦ୍ଧା ବିକଶିତ ଭାରତ ଗଠନ ନେଇ ଲକ୍ଷ ରଖିଛନ୍ତି ମୋଦି ସରକାର। ବିକଶିତ ଦେଶ ଗଠନରେ କେବଳ ଶିକ୍ଷା, ଶିଳ୍ପ, ଅର୍ଥନୀତିର ଅଭିବୃଦ୍ଧି ନୁହେଁ , ବରଂ ଏକ ସୁସ୍ଥ ଭାରତର ମଧ୍ୟ ଆବଶ୍ୟକତା ରହିଛି। କୁଷ୍ଠ, ଯକ୍ଷ୍ମା, ହଇଜା ଭଳି ରୋଗ ପ୍ରଭାବହୀନ ହୋଇସାରିଥିବା ବେଳେ ଆମୋନିଆ, ସିକଲ ସେଲ୍ ଭଳି ରକ୍ତହୀନତା ରୋଗର ମୁକୁଳିବା ପାଇଁ ବିଭିନ୍ନ କାର୍ଯ୍ୟକ୍ରମ ହାତକୁ ନେଉଛନ୍ତି କେନ୍ଦ୍ର ସରକାର। ଓଡ଼ିଶାରେ ବିଜେପି ସରକାର ଗଠନ ପରେ ବିଶେଷ କରି ଆଦିବାସୀ ଅଧ୍ୟୁଷିତ ଜିଲ୍ଲା ଗୁଡିକରେ ଏହି ସବୁ ଜନସଚେତନତା ମୂଳକ କାର୍ଯ୍ୟକ୍ରମକୁ ଜୋରଦାର କରାଯାଇଛି।
ଏନେଇ ଆଜିଠାରୁ ଭୁବନେଶ୍ଵରରେ ଦୁଇ ଦିନିଆ ଜାତୀୟ ସମ୍ମିଳନୀ ଆରମ୍ଭ ହୋଇଛି, ଯାହାକୁ ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ। ୟୁନିସେଫ୍, ୟୁଏନଡିପି, ଆଇଏସଏଚବିଟିର ପ୍ରତିନିଧି ମାନଙ୍କ ସହ କେନ୍ଦ୍ର ଓ ରାଜ୍ୟ ସରକାରଙ୍କ ବିଭାଗୀୟ ମନ୍ତ୍ରୀ ଓ ଅଧିକାରୀ ମାନେ ଆଲୋଚନା କରି ରାଜ୍ୟରୁ କିପରି ଭାବେ ରକ୍ତହୀନତା ଓ ସିକଲ ସେଲ୍ ସମସ୍ୟାର ସମ୍ପୁର୍ଣ୍ଣ ସମାଧାନ କରାଯାଇପାରିବ ସେ ଦିଗରେ ରୋଡମ୍ୟାପ୍ ପ୍ରସ୍ତୁତ କରିଛନ୍ତି।
ସିକଲ ସେଲ୍ ମଣିଷ ଶରୀରରେ ପ୍ରବାହିତ ହେଉଥିବା ରକ୍ତକୁ ପ୍ରଭାବିତ କରୁଥିବା ଏକ ରୋଗ। ଏହି ରୋଗ ହେତୁ ରକ୍ତ କଣିକା ମଧ୍ୟରେ ହେମୋଗ୍ଲୋବିନର ସ୍ତର ହ୍ରାସ ହୋଇଥାଏ। ପ୍ରଭାବରେ ରୋଗୀ ବିଭିନ୍ନ ସ୍ଵାସ୍ଥ୍ୟ ସମସ୍ୟାର ସମ୍ମୁଖୀନ ହେବା ସହିତ ଅକାଳରେ ଜୀବନ ମଧ୍ୟ ଯାଇଥାଏ। ଏହା ମଧ୍ୟ ଏକ ବଂଶଗତ ରୋଗ। ସର୍ବଭାରତୀୟ ସ୍ତରରେ ସିକଲ୍ ସେଲ୍ ରୋଗର ସବୁଠାରୁ ବଡ ଭାଗ ରହିଛି, ୨୦ ନିୟୁତ ବାହକ ଏବଂ ୧.୪ ନିୟୁତ ସିକଲ ସେଲ୍ ରୋଗରେ ପ୍ରଭାବିତ। ଆଦିବାସୀ ବହୁଳ ରାଜ୍ୟ ଓଡିଶାରେ ମଧ୍ୟ ମୋଟ ଜନସଂଖ୍ୟାର ୨୨.୮୫% ଲୋକ ଏସସିଡିରେ ଆକ୍ରାନ୍ତ, ଯାହା ଦେଶରେ ସର୍ବାଧିକ।
ବ୍ୟାପକ ଜନସଚେତନତା ସହ ଉତ୍ତମ ସ୍ଵାସ୍ଥ୍ୟ ସୁବିଧା ଦ୍ଵାରା ହିଁ ସିକଲ ସେଲ୍ ଭଳି ରକ୍ତହୀନତା ସମସ୍ୟାକୁ ସମୂଳ ନାଶ କରିବା ସମ୍ଭବ। ଯାହା ଉପରେ ଫୋକସ ରଖି ମିଶନ ମୋଡରେ କାମ କରୁଛନ୍ତି ଉଭୟ କେନ୍ଦ୍ର ଓ ରାଜ୍ୟ ସରକାର।
