ସିମୁଳିଆ (ବାଲେଶ୍ଵର): ନିଆଁ ଆଁରେ ସବୁକିଛି ଜଳିଗଲା । ଜମା ଟଙ୍କାରୁ ନେଇ ପୋଷାକ ଆଉ ଚାଉଳ ସବୁକିଛି ଜଳି ପୋଡ଼ି ପାଉଁଶ ହୋଇ ଯାଇଛି । କେବଳ ବଞ୍ଚି ଯାଇଛି ଜୀବନ । ବିଳମ୍ବିତ ରାତିରେ ସର୍ଟସର୍କିଟରୁ ଲାଗିଥିବା ନିଆଁରେ ୫ ପରିବାରର ୧୪ ବଖରା ଘର ସମ୍ପୂର୍ଣ୍ଣ ଜଳି ଯାଇଛି ।


ବାଲେଶ୍ୱର ଜିଲ୍ଲା ଖଇରା ଥାନା ମାଖନପୁର ପଞ୍ଚାୟତ ଅଧୀନ ତରାଙ୍ଗ ଗାଁରେ ବିଳମ୍ବିତ ରାତିରେ ନିଆଁ ଲାଗିଥିଲା । ବିଦ୍ୟୁତ୍ ସର୍ଟସର୍କିଟ୍‌ରୁ ଲାଗିଥିବା ନିଆଁ ଦେଖୁ ଦେଖୁ ଗୋଟିଏ ପରେ ଗୋଟିଏ ଘରକୁ ବ୍ୟାପି ଯାଇଥିଲା ।


ଆଖି ପିଛୁଳାକେ ପୋଡ଼ି ଯାଇଥିଲା ୫ଟି ପରିବାରର ୧୪ ବଖରା ଘର । ଅଗ୍ନିକାଣ୍ଡରେ ୨୦ ଲକ୍ଷରୁ ଊର୍ଦ୍ଧ୍ଵ ଟଙ୍କାର ଆସବାବପତ୍ର ପୋଡ଼ି ନଷ୍ଟ ହୋଇଛି । ତରାଙ୍ଗ ଗାଁର ପୂର୍ଣ୍ଣଚନ୍ଦ୍ର ସେଠୀ, ଅକ୍ଷୟ ସେଠୀ, ବିଜୟ ସେଠୀ, ମନୋରଞ୍ଜନ ସେଠୀ ଓ ସରୋଜ ସେଠୀଙ୍କ ଘର ନିଆଁ ଲାଗି ଜଳି ଯାଇଛି ।


ନିଆଁ ଦେଖି ପଡ଼ୋଶୀ ଲୋକ ଡାକ ପକାଇଥିଲେ । ୫ ପରିବାରର ୨୫ ଜଣ ସଦସ୍ୟ ଘର ବାହାରକୁ ପଳାଇ ଆସି ନିଆଁ ଲିଭାଇବାକୁ ଚେଷ୍ଟା କରିଥିଲେ । ଖବର ପାଇ ଖଇରା ଏବଂ ଅଡ଼ା ଅଗ୍ନିଶମ ବାହିନୀ ପହଞ୍ଚିବା ସହ ନିଆଁ ଲିଭାଇଥିଲା ।

ଏଥିସହ ପଢ଼ନ୍ତୁ: ରାତି ଅଧରେ ଜଳିଗଲା ଗାଁ; ଶୋଇଥିବା ବେଳେ ପୋଡ଼ିଗଲା ୭ ପରିବାରର ସବୁକିଛି


ହେଲେ ସେତେବେଳକୁ ଘର ଗୁଡ଼ିକ ସମ୍ପୂର୍ଣ୍ଣ ଜଳିପୋଡ଼ି ଯାଇଥିଲା । ଘରେ ଥିବା ଧାନ, ଚାଉଳ, ସୁନା ରୂପା ଅଳଙ୍କାର ସହ ପଲିଥିନ୍ ଜରିରେ ବାନ୍ଧି ରଖିଥିବା ନଗଦ ୨ ଲକ୍ଷରୁ ଊର୍ଦ୍ଧ୍ଵ ଟଙ୍କା ମଧ୍ୟ ଜଳି ଯାଇଛି । ସରକାରୀ ସହାୟତା ଯୋଗାଇ ଦେବାକୁ ପରିବାର ସଦସ୍ୟଙ୍କ ସମେତ ଗ୍ରାମବାସୀମାନେ ଦାବି କରିଛନ୍ତି ।