ବ୍ରହ୍ମପୁର ପ୍ରେମିକାକୁ ପ୍ରେମିକ ହତ୍ୟା ଘଟଣା। ଅଭିଯୁକ୍ତ ପ୍ରେମିକକୁ ଘଟଣାସ୍ଥଳକୁ ନେଇ ସିନ୍ ରିକ୍ରିଏସନ୍ କଲା ପୋଲିସ୍ । ଲଜ୍ ରୁମରେ କେମିତି ନିଜ ପ୍ରେମିକାକୁ ହତ୍ୟା କରିଥିଲା ଗୋଟି ଗୋଟି କରି ସିନ୍ ରିକ୍ରିଏସନ୍ କରି ଦେଖାଇଛି ପ୍ରେମିକ ଅଭୟ । ତେବେ ପ୍ରେମରେ ପାଗଳ ହୋଇ ଏହି ଜଘନ୍ୟ କାଣ୍ଡ ଭିଆଇଥିଲା ସଇତାନ ପ୍ରେମିକ । ପିଲାଦିନୁ ଲାଞ୍ଜିପଲ୍ଲୀର ଅଭୟ ମହାରଣା ଓ ପ୍ରିୟା ମହାରଣା ସାଙ୍ଗ ହୋଇ ସ୍କୁଲରେ ପାଠ ପଢୁଥିଲେ । ପରେ ଉଭୟ ପରସ୍ପରର ପ୍ରେମରେ ପଡିଥିଲେ । ଗତ ୪ ମାସ ହେବ ଉଭୟଙ୍କ ସଂପର୍କ ଅଧିକ ନିବିଡ଼ ହୋଇଥିଲା ।  

ଯୁବତୀ ଜଣଙ୍କ ବ୍ରହ୍ମପୁର ଉପକଣ୍ଠ ସ୍ଥିତ ଏକ ଘରୋଇ ଚିକିତ୍ସାଳୟରେ ଲ୍ୟାବ ଆସିଷ୍ଟାଣ୍ଟ ଭାବେ କାର୍ଯ୍ୟ କରୁଥିଲେ । ଏବଂ ଯୁବକ ଜଣଙ୍କ ଏକ କମ୍ପାନୀରେ କାମ କରୁଥିଲା । ପରେ ପ୍ରେମିକ ଅଭୟ ଚାକିରି ହରାଇବା ଯୋଗୁଁ ଯୁବତୀ ଜଣଙ୍କ ତାଙ୍କୁ ଅଣଦେଖା କରି ଆସୁଥିଲେ । କାଳେ ପ୍ରେମିକା ଅନ୍ୟ କେଉଁଠି ବିବାହ କରିଦେବ ଏହା ଭାବି ପ୍ରେମିକାକୁ ହତ୍ୟା ପାଇଁ ଯୋଜନା କରିଥିଲା ପ୍ରେମିକ । ବ୍ରହ୍ମପୁର ବୈଦ୍ୟନାଥପୁର ଥାନା ନୂଆ ବସଷ୍ଟାଣ୍ଡ ସ୍ଥିତ ଏକ ଲଜକୁ ପ୍ରେମିକାକୁ ଡାକି ନେଇଥିଲା । ସେଠାରେ କିଛି ସମୟ ପ୍ରେମିକା ସହ ବିତାଇବା ପରେ ଶେଷରେ ସାଙ୍ଗରେ ନେଇଥିବା ଏକ ଛୁରୀରେ ପ୍ରେମିକାଙ୍କୁ ଆକ୍ରମଣ କରି ହତ୍ୟା କରିଥିଲା । ଧାରୁଆ ଛୁରୀରେ ପ୍ରେମିକାର ଗଳା କାଟିବା ସହ ଶରୀରର ପାଖାପାଖି ୧୫ଟି ସ୍ଥାନରେ ଛୁରୀ ମାରିଥିଲା ପ୍ରେମିକ । ଆଉ ଶେଷରେ ଥାନାରେ ପୋଲିସ ପାଖେ ଆତ୍ମସମର୍ପଣ କରିଥିଲା ଅଭିଯୁକ୍ତ ଅଭୟ ।