ଢେଙ୍କାନାଳ: ଘରେ ପଶିଲେ, ମହିଳାଙ୍କୁ ଛୁରୀ ଦେଖାଇବା ସହ ହାତ ଗୋଡ଼ ବାନ୍ଧି ଦୁଷ୍କର୍ମ କରିଥିବା ଅଭିଯୋଗ ହୋଇଛି । ଏଭଳି ଅଭାବନୀୟ ଘଟଣା ଘଟିଛି ଢେଙ୍କାନାଳ ସଦର ଥାନା ଅଞ୍ଚଳରେ । ଘଟଣାରେ ଅଭିଯୁକ୍ତ ହୃଷିକେଶ ସାହୁକୁ ଗିରଫ କରିଛି ସଦର ଥାନା ପୋଲିସ ।

ସୂଚନା ଅନୁସାରେ, ମହିଳା ଜଣଙ୍କ ଏକ ଭଡ଼ା ଘରେ ଏକୁଟିଆ ରହୁଥିଲେ । ଏହାର ସୁଯୋଗ ନେଇ ଶନିବାର ରାତିରେ ଘରେ ପଶି ହୃଷିକେଶ ଦୁଷ୍କର୍ମ କରିଥିବା ଅଭିଯୋଗ ହୋଇଛି । ହୃଷିକେଶର ଘର ଦେବଗଡ଼ ଜିଲ୍ଲାରେ ବୋଲି ଜଣାପଡିଛି । ପୀଡିତା ରହୁଥିବା ଘର ନିକଟ ଏକ ସ' ମିଲରେ କାମ କରେ ହୃଷିକେଶ ।

ବିଗତ କିଛି ଦିନ ହେବ ଅଭିଯୁକ୍ତ ହୃଷିକେଶ ମହିଳାଙ୍କ ଉପରେ ନଜର ରଖିଥିଲା । ଶନିବାର ରାତିରେ ମହିଳା ଜଣଙ୍କ କୌଣସି କାମ ପାଇଁ ଘର ବାହାରକୁ ଆସିବା ସମୟରେ ଅଗୋଚରରେ ହୃଷିକେଶ ଘରେ ପଶିଥିଲା । ଆଉ ମହିଳା ଜଣଙ୍କ ଭିତରକୁ ଯିବା ପରେ ଛୁରି ଦେଖାଇ ହୃଷିକେଶ ଭୟଭୀତ କରାଇଥିଲା ।

ମହିଳାଙ୍କ ହାତ ଗୋଡ଼ ବାନ୍ଧି ଦେବା ସହ ରାତି ୮ଟାରୁ ୧୧ଟା ପର୍ଯ୍ୟନ୍ତ ପ୍ରାୟ ୩ ଘଣ୍ଟା ଧରି ମହିଳାଙ୍କୁ ଅସଦାଚରଣ କରିଥିବା ଅଭିଯୋଗ ହୋଇଛି । ଏ ନେଇ ସଦର ଥାନାରେ ପୀଡ଼ିତା ଲିଖିତ ଅଭିଯୋଗ କରିବା ପରେ ସଦର ଥାନା ପୋଲିସ ଅଭିଯୁକ୍ତ ହୃଷିକେଶକୁ ଗିରଫ କରିଛି । ଅଭିଯୁକ୍ତ ଠାରୁ ଛୁରିକୁ ପୋଲିସ ଜବତ କରିଛି ।