ଯୁଦ୍ଧ ପରିସ୍ଥିତିରେ ନିଜକୁ କେମିତି ରଖିବେ ସୁରକ୍ଷିତ ? କେଉଁଠି ନେବେ ଆଶ୍ରୟ ? କଣ କରିବେ, କଣ କରିବେ ନାହିଁ ? ଆସନ୍ତା କାଲି ରାଜ୍ୟର ୧୨ଟି ସ୍ଥାନ ରେ ହେବ ବଡ଼ ଧରଣର ମକ୍‌ ଡ୍ରିଲ୍‌ । ଭୁବନେଶ୍ବର, ତାଳଚେର, ବାଲେଶ୍ବର, କୋରାପୁଟ, ଗୋପାଳପୁର, ହୀରାକୁଦ, ପାରାଦୀପ, ରାଉରକେଲା, ଭଦ୍ରକ, ଢେଙ୍କାନାଳ, ଜଗତସିଂହପୁର, କେନ୍ଦ୍ରାପଡାରେ ହେବ ଯୁଦ୍ଧ ସ୍ଥିତିର ମୁକାବିଲା ପାଇଁ ମକ୍ ଡ୍ରିଲ୍ ।

ଏଥିପାଇଁ ଜୋରଦାର ପ୍ରସ୍ତୁତି କରିଛି ରାଜ୍ୟ ଗୃହ ବିଭାଗ। ବରିଷ୍ଠ ଅଧିକାରୀଙ୍କ ଆଲୋଚନା ପରେ ମକ୍‌ଡ୍ରିଲ୍‌ ହେବାକୁ ଥିବା ଜିଲ୍ଲାର ଜିଲ୍ଲାପାଳ ମାନଙ୍କ ସହ ଆଲୋଚନା କରିଛନ୍ତି ମୁଖ୍ୟ ଶାସନ ସଚିବ ଓ ଗୃହ ସଚିବ। କାଲିର ମକ୍ ଡ୍ରିଲ୍ ସମ୍ପର୍କରେ ବିସ୍ତୃତ ସୂଚନା ଦେଇଛନ୍ତି ଅଗ୍ନିଶମ ଡିଜି ସୁଧାଂଶୁ ଷଡ଼ଙ୍ଗୀ । ଅପରାହ୍ନ ୪ ଟାରେ ବାଜିବ ସାଇରନ । ଲୋକେ ସୁରକ୍ଷିତ ରହିବାକୁ କଂକ୍ରିଟ୍ ଛାତ ତଳକୁ ଚାଲିଯିବେ । ଆସନ୍ତାକାଲି ସହରାଞ୍ଚଳ ସହ ଉପକୂଳବର୍ତ୍ତୀ ଅଞ୍ଚଳର ବାତ୍ୟା ଆଶ୍ରୟସ୍ଥଳୀରେ ବି ମକ୍ ଡ୍ରିଲ୍ କରାଯିବ । ପର୍ଯ୍ୟାୟ କ୍ରମେ 7 ଦିନ ଧରି ଚାଲିବ ଏହି ପ୍ରକ୍ରିୟା।

କେବଳ ସମ୍ଭାବ୍ୟ ଯୁଦ୍ଧ ସ୍ଥିତି ପାଇଁ ପ୍ରସ୍ତୁତି ଏହାକୁ ନେଇ କୌଣସି ଭୟଭୀତ ବା ବ୍ୟସ୍ତ ନ ହେବାକୁ ପରାମର୍ଶ ଦେଇଛନ୍ତି ବିପର୍ଯ୍ୟୟ ପରିଚାଳନା ମନ୍ତ୍ରୀ। ସେପଟେ ରାଜ୍ୟ ସରକାରଙ୍କ ନିର୍ଦ୍ଦେଶ ପରେ ଆକ୍ସନ୍ ମୋଡକୁ ଆସିଛନ୍ତି ଜିଲ୍ଲା ପ୍ରଶାସନ । ବାଲେଶ୍ଵରରୁ ନେଇ ଜଗତସିଂହପୁର, କଟକ ସବୁଠି କାଲି ପାଇଁ ଆରମ୍ଭ ହୋଇଛି ଜୋରଦାର ପ୍ରସ୍ତୁତି। କାଲିସୁଦ୍ଧା ଜିଲ୍ଲା ଓ ରାଜ୍ୟସ୍ତରରେ ନିୟନ୍ତ୍ରଣ କକ୍ଷ କାର୍ଯ୍ୟକ୍ଷମ ହେବ ବୋଲି ସୂଚନା ଦେଇଛନ୍ତି ରାଜ୍ୟ ସରକାର।