ପବିତ୍ର ଶୀତଳ ଷଷ୍ଠୀ ପାଇଁ ଉଠୁଚି ପଡୁଛି ସମ୍ବଲପୁର । ଘରେ ଘରେ କୁଣିଆ । ଶୀତଳ ଷଷ୍ଠୀ ଯାତ୍ରା ଦେଖିବାକୁ ଲୋକଙ୍କ ମନରେ ପ୍ରବଳ ଉତ୍ସାହ । ସମ୍ବଲପୁର ପ୍ରସିଦ୍ଧ ଶୀତଳ ଷଷ୍ଠୀ ଯାତ୍ରାର ମୁଖ୍ୟ ପରମ୍ପରା ପତ୍ରପେଣ୍ଡି ବା ନିର୍ବନ୍ଧ ସରିଛି । ବରପିତା, ସପ୍ତଋଷି ଗଣ ଓ ଷଷ୍ଠୀ କମିଟି ସଦସ୍ୟ ବିରାଟ ପଟୁଆର ଶୋଭାଯାତ୍ରା ନେଇ କନ୍ୟା ଅନ୍ବେଷଣରେ ପହଁଚି ମାତା ପାର୍ବତୀଙ୍କ ସହ ବିବାହ ପାଇଁ ପ୍ରସ୍ତାବ ରଖିଛନ୍ତି । ସର୍ଗିପତ୍ର ଓ ଫୁଲ କନ୍ୟା ଘରକୁ ପ୍ରଦାନ କରି ନିର୍ବନ୍ଧ ସମ୍ପୂର୍ଣ୍ଣ କରିଛନ୍ତି ।

ଗୁରୁବାର ସଂଧ୍ୟାରେ ଝାଡୁଆପଡା ଲୋକନାଥ ବାବାଙ୍କ ପତରପେଣ୍ତି ଥିଵାବେଳେ ଵରପିତା, ସପ୍ତରଷୀ ଓ ଷଷ୍ଠୀ କମିଟି ସଦସ୍ୟ ବିରାଟ ପଟୁଆରରେ ବାଜା , ରୋଷଣୀ ଶୋଭାଯାତ୍ରା କରି କନ୍ୟା ଅନ୍ଵେଷଣ ବା ଖୋଜିବା ପାଇଁ ବାହାରିଥିଲେ । ରାଜସ୍ବ ମନ୍ତ୍ରୀ ସୁରେଶ ପୁଜାରୀ ଓ ତାଙ୍କ ସ୍ତ୍ରୀ ପଦ୍ମିନୀ କନ୍ୟା ମାତାପିତା ଥିବାରୁ ସାକ୍ଷୀପଡା ସ୍ଥିତ ବାସଭବନ ପହଁଚି ମାତା ପାର୍ବତୀଙ୍କ ସହ ଲୋକନାଥ ବାବାଙ୍କ ବିବାହ ପାଇଁ ପ୍ରସ୍ତାବ ରଖିଥିଲେ । ବିଧି ମୁତାବକ ଉଭୟ ପକ୍ଷ କଥୋପକଥନ ବା ଯୁକ୍ତିତର୍କ ପରେ ବିବାହ ପ୍ରସ୍ତାବ ହୋଇଥିଲା । ବରପିତା ମହାଦେବଙ୍କ ମହିମା ବର୍ଣ୍ଣନା ମଧ୍ୟ କରିଥିଲେ । ଏହାପରେ ବରପକ୍ଷ ଆଣିଥିବା ସର୍ଗିପତ୍ର, ବେଲପତ୍ର, ଫୁଲ କନ୍ୟା ପିତାମାତାକୁ ପ୍ରଦାନ କରି ନିର୍ବନ୍ଧ ବା ପତ୍ରପେଣ୍ତି ସମ୍ପୂର୍ଣ୍ଣ ହୋଇଛି ।

ସେହିପରି ମୁଦୀପଡା ଜାଗେଶ୍ବର ବାବାଙ୍କର ମଧ୍ୟ କନ୍ୟା ଅନ୍ୱେଷଣ ପାଇଁ ବିରାଟ ଶୋଭାଯାତ୍ରା ବାହାରି କମଲିବଜାର ପାଟଣେଶ୍ଵରୀ ମଣ୍ତପ ପହଁଚିଥିଲେ । ଉଭୟ ପକ୍ଷ ଅନେକ ସମୟ ଧରି ଯୁକ୍ତିତର୍କପରେ ମହାଦେବ ଓ ମାତା ପାର୍ବତୀଙ୍କ ବିବାହ ପ୍ରସ୍ତାବ କରି କନ୍ୟା ପିତା ମୃତ୍ୟଞୟ ଦାସ ଓ ମାତା ମଧୁସ୍ମିତା ପଣ୍ତାଙ୍କୁ ପୂଜା ଓ ସର୍ଗିପତ୍ର ଥାଳ ପ୍ରଦାନ କରି ନିର୍ବନ୍ଧ କରିଥିଲେ । ସେଭଳି ବଡବଜାରର ଶୀତଲେଶ୍ବର ବାବା ମୁଦୀପଡା ପହଁଚି କନ୍ୟା ଖୋଜି ନିର୍ବନ୍ଧ କରିଥିଲେ । ଠାକୁରପଡା ଗୁପ୍ତେଶ୍ଵର ବାବା ମଧ୍ୟ ବରେଇପାଲି ଅଂଚଳରେ ବିବାହ ପ୍ରସ୍ତାବ ହୋଇଥିଲା ।

ପ୍ରସିଦ୍ଧ ଶୀତଳ ଷଷ୍ଠୀର ମୁଖ୍ୟ ପରମ୍ପରା ପତର ପେଣ୍ତି ସମସ୍ତ ପଡାର ବେଶ ଧୁମ୍ ଧାମରେ ସମ୍ପୂର୍ଣ୍ଣ ହେବା ପୁରା ସମ୍ବଲପୁର ସହର ଉତ୍ସବ ମୁଖର ରହିଛି । ସେପଟେ ଆଜି ସମସ୍ତ ଶୀତଳ ଷଷ୍ଠୀର ଦେବ ବିବାହ ନେଇ ଗୁଆ ଗୁଣ୍ତା ବା ହନୁମାନ ନିୟୁତା ପରମ୍ପରା ବିଧି ହେବ । ପ୍ରଭୁ ହନୁମାନ ସହରର ବିଭିନ୍ନ ଦେବାଦେବୀଙ୍କୁ ନିମନ୍ତ୍ରଣ କରୁଛନ୍ତି ।

Argus News | argus news | -Argusnews Home: Odisha Latest News, Breaking News, Trending News, Live TV and more