ବିଦ୍ୟୁତ୍ ଉପଭୋକ୍ତାଙ୍କୁ ବଡ଼ ଆଶ୍ଵସ୍ତି । ସରକାର ଲଗାଇବେ ସ୍ମାର୍ଟ ମିଟର । କ୍ୟାବିନେଟରେ ଏହି ପ୍ରସ୍ତାବ ଉପରେ ମୋହର ମାରିଛନ୍ତି ରାଜ୍ୟ ସରକାର । ଉପଭୋକ୍ତାଙ୍କ କାନ୍ଧରେ କମ୍ ହେବ ଖର୍ଚ୍ଚ ଭାର । ଏବେ ଦୂର ହେବ ସ୍ମାର୍ଟ ମିଟର ବୋଝ...ସ୍ମାର୍ଟ ମିଟର ଲଗାଇବା ପାଇଁ ଲାଗୁଥିବା ଖର୍ଚ୍ଚରୁ ଏଣିକି ବିଦ୍ୟୁତ୍ ଉପଭୋକ୍ତାଙ୍କୁ ମିଳିବ ଆଶ୍ଵସ୍ତି । ଏବେ ସ୍ମାର୍ଟ ମିଟର ଲଗାଇବାକୁ ଆଉ କୌଣସି ଖର୍ଚ୍ଚ କରିବାକୁ ପଡ଼ିବନି । ୨ କିଲୋୱାଟ୍ ଯାଏଁ ବିଦ୍ୟୁତ୍ ବ୍ୟବହାର କରୁଥିବା ଉପଭୋକ୍ତାଙ୍କ ସ୍ମାର୍ଟ ମିଟର ଲଗାଇବା ଖର୍ଚ୍ଚ ବହନ କରିବେ ରାଜ୍ୟ ସରକାର ।

କ୍ୟାବିନେଟ ବୈଠକରେ ଏ ନେଇ ନିଷ୍ପତ୍ତି ହୋଇଛି । ଏହାଦ୍ୱାରା ରାଜ୍ୟର ପ୍ରାୟ ୮୭ ପ୍ରତିଶତ ବିଦ୍ୟୁତ ଉପଭୋକ୍ତା ଲାଭବାନ ହେବେ । ୨୦୨୬-୨୭ଆର୍ଥିକ ବର୍ଷରୁ ଓଇଆରସି ଦ୍ୱାରା ଅନୁମୋଦିତ ଟାରିଫ ଜରିଆରେ ସ୍ମାର୍ଟ ମିଟର ସ୍ଥାପନ କାମ ଆଗକୁ ବଢ଼ାଯିବ ।

ସ୍ମାର୍ଟ ମିଟର ଏକ ଚିପ୍ ବେସଡ୍ ମିଟର । ଯାହାଦ୍ୱାରା ଉପଭୋକ୍ତାଙ୍କୁ ସବୁ ଅପଡେଟ୍ ମୋବାଇଲ ମେସେଜରେ ମିଳିବ । ସଠିକ ରିଡିଂ ଆସିବ, ପ୍ରିପେଡ୍ ମିଟର ଥିବାରୁ ପୈଠ କରିଥିବା ବିଲ୍ ସରିବା ପୂର୍ବରୁ ମେସେଜ୍ ଆସିବ, ବିଲ୍ ପୈଠ ନ କଲେ ବିଦ୍ୟୁତ୍ ବିତରଣ କମ୍ପାନୀ ଅଫିସରୁ କନେକ୍ସନ କାଟି ଦେଇପାରିବ । ସ୍ମାର୍ଟ ମିଟର ଲଗାଇଲେ ମିଟର ରିଡିଂ ଅଧିକ ଆସୁଥିବା ଉପଭୋକ୍ତାଙ୍କର ଧାରଣା ରହିଛି। ଏ ନେଇ ଉପଭୋକ୍ତା ସଂଘ କହିଛି ନୂଆ ମିଟର ଲଗାଇବା ପୂର୍ବରୁ ସରକାର ଗ୍ରାହକଙ୍କୁ ସଚେତନ କରନ୍ତୁ ।

ଏଥିସହ ପଢ଼ନ୍ତୁ: ଏହି ରାଶିର ବ୍ୟକ୍ତିମାନଙ୍କୁ ଚାକିରିରେ ମିଳିବ ଢେର୍‌ ସଫଳତା

୨୦୨୫-୨୬ ଆର୍ଥିକ ବର୍ଷରେ ୨ କିଲୋୱାଟ୍ ପର୍ଯ୍ୟନ୍ତ ଉପଭୋକ୍ତାଙ୍କ ପାଇଁ ୧୧,୫୩,୧୦୦ ଟି ସ୍ମାର୍ଟ ମିଟର ସ୍ଥାପନ କରିବାକୁ ପ୍ରସ୍ତାବ ରହିଛି । ଏଥିମଧ୍ୟରୁ ୮,୭୫,୦୦୦ଟି ପୁରୁଣା ମିଟର ବଦଳରେ ସ୍ମାର୍ଟ ମିଟର ଲଗାଯିବ ଏବଂ ପ୍ରାୟ ୨,୭୮,୧୦୦ ଟି ନୂତନ ସଂଯୋଗ ପାଇଁ ସ୍ମାର୍ଟ ମିଟର ବ୍ୟବହାର କରାଯିବ।

ସୂଚନାନୁଯାୟୀ ୭ଟି ବିଭାଗର ୧୦ଟି ବଡ଼ ପ୍ରସ୍ତାବରେ ବାଜିଲା କ୍ୟାବିନେଟ ମୋହର । ବୁଧବାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ରାଜ୍ୟ କ୍ୟାବିନେଟ ବୈଠକରେ ୧୦ଟି ପ୍ରସ୍ତାବ ଉପରେ ବାଜିଛି ମୋହର। ରାଜ୍ୟରେ ଶତ ପ୍ରତିଶତ ସ୍ମାର୍ଟ ମିଟର ବ୍ୟବସ୍ଥାକୁ ସୁନିଶ୍ଚିତ କରିବାକୁ ଏମ୍‌ଏମ୍‌ଏସ୍‌ବିୱାଇ -ସ୍ମାର୍ଟ ମିଟର ସଂଯୋଗର ପ୍ରଥମ ପର୍ଯ୍ୟାୟକୁ କ୍ୟାବିନେଟ୍‌ ଅନୁମୋଦନ କରିଛି। ଏହି ପଦକ୍ଷେପ ଦ୍ୱାରା ରାଜ୍ୟରେ ୨ କିଲୋୱାଟ ପର୍ଯ୍ୟନ୍ତ ବିଦ୍ୟୁତ ବ୍ୟବହାର କରୁଥିବା ଉପଭୋକ୍ତାଙ୍କୁ ସ୍ମାର୍ଟ ମିଟର ସଂଯୋଗ ପାଇଁ କୌଣସି ଅତିରିକ୍ତ ମିଟର ଭଡ଼ା ଦେବାକୁ ପଡିବ ନାହିଁ ।

ଅଧିକ ପଢ଼ନ୍ତୁ ଓଡ଼ିଶା ଖବର...