ଆରେ... ଆରେ... କେମିତି ବରାଟିକୁ ଧରି ଚୁପ୍‌କିନା ଗାତ ଭିତରକୁ ପଳାଉଛି । ଆଉ ....କାଳେ, କିଏ ତା ଖାଇବା ଉପରେ ଯଦି ନଜର ପକାଇଦେବ ...ତାକୁ ଏମିତି କିଏ ବରା ଚୋରି କରୁଥିବା ଦେଖିଦେବ.. ତ କଥା ସରିଲା । ସେଥିପାଇଁ ଗାତ ଭିତରୁ ଡୁଙ୍ଗି ଡୁଙ୍ଗି ଛକିକି ଯାଇ ଧିରିକିନା ବରାଟିକୁ ଧରି ଗାତ ଭିତରକୁ ପଳାଉଛି । ହେଲେ ଏ କଣ , ଗାତ ଭିତରକୁ ପଶୁ ପଶୁ, ହାତରୁ ବରା ଟା ଖସିଗଲା.... ଯା, ହେଲେ ସେ କି ହାର ମାନେ, ପୁଣି ଛକିକି ଗଲା ଆଉ ନେଇକି ଆସିଲା ।

ସୋସିଆଲ ମିଡିଆର ଏହି ମଜାଦାର ଭିଡିଓ ଆପଣଙ୍କୁ ଦେଖିବାକୁ ମଜା ଲାଗୁଛି ସିନା , ହେଲେ ଏ ଭିଡିଓ ଆମକୁ ଅନେକ ଶିକ୍ଷା ଦେଉଛି । ଯଦି ଭଲ କରି ଭିଡିଓଟିକୁ ଦେଖିବେ, ତାହେଲେ ଦେଖିବେ, ମୂଷାଟି ସେଠାରେ ପଡିଥିବା ବରାଟିକୁ ଆଣିବା ପାଇଁ କେତେ ସମୟ
ଅପେକ୍ଷା କରୁଛି । ଆଉ ପୁଣି ଯେତେବେଳେ ବାହାରି ଆଣିବାକୁ ଯାଉଛି, ହାତରେ ଧରିନପାରି ଫେରିଆସୁଛି । ହେଲେ ସେ ଟିକେ ହେଲେ ବି ହାର ମାନୁନି । ଲଗାତାର ବିଫଳ ହେଲା ପରେ ବି ସେ ପୁଣି ଯାଉଛି, ଆଉ ଶେଷରେ ବରା ଆଣି ଗାତକୁ ଫେରୁଛି ।

ଜୀବନରେ କୌଣସି କାର୍ଯ୍ୟ ଅସମ୍ଭବ ନୁହେଁ । ଆମର ଲଗାତାର ଚେଷ୍ଟା, ଆଉ ଧୈର୍ଯ୍ୟ ଏହି ଦୁଇଟି ଜିନିଷ ଯଦି ଥାଏ, ତେବେ ସଫଳତା ସୁନିଶ୍ଚିତ । ଯଦି କୌଣସି କାର୍ଯ୍ୟରେ ବାରମ୍ବାର ବିଫଳ ହେଉଛେ ବୋଲି ଭାବି କାର୍ଯ୍ୟଟିକୁ ଅଧାରୁ ଛାଡି ଦେବା ବା ହାର୍ ମାନି ପଛଘୁଞ୍ଚା ଦେଇଦେବା, ତେବେ କେବେ ବି ଜୀବନରେ ସଫଳତାର ସ୍ଵାଦ ଚାଖିପାରିବା ନାହିଁ । ସେ କୌଣସି ପରୀକ୍ଷା କଥା କୁହନ୍ତୁ, କି କୌଣସି ଗୁରୁତ୍ଵପୂର୍ଣ୍ଣ କାର୍ଯ୍ୟ । କେବଳ ନିଜର ଲକ୍ଷ୍ୟ ସ୍ଥିର ରଖନ୍ତୁ, ଏବଂ ଦୃଢ ଇଚ୍ଛା ଆଉ ନିଷ୍ଠାର ସହ ଚେଷ୍ଟା କରି ଚାଲନ୍ତୁ, ଏହା ସୁନିଶ୍ଚିତ ଯେ, ସଫଳତା ଦିନେ ନା ଦିନେ ଆପଣଙ୍କ ଚରଣ ସ୍ପର୍ଶ କରିବ ।