ବାଲିଅନ୍ତା ଭିଡ଼ ଭିତରେ ସୌମ୍ୟରଞ୍ଜନ ସ୍ୱାଇଁ ହତ୍ୟା ଘଟଣା... ବାଲିଅନ୍ତା ସୌମ୍ୟ ହତ୍ୟା ମାମଲାରେ ଆଉ ଜଣେ ଅଭିଯୁକ୍ତ ବିନୋଦ ବେହେରାକୁ ଗିରଫ କଲା କ୍ରାଇମ ବ୍ରାଞ୍ଚ । କେନ୍ଦ୍ରାପଡ଼ାର ଇନ୍ଦୁପୁର ଅଞ୍ଚଳରୁ ଅଭିଯୁକ୍ତ ବିନୋଦ ଗିରଫ ହୋଇଛନ୍ତି । ବିନୋଦ ଭୁବନେଶ୍ୱର ସତ୍ୟନଗର ଅଞ୍ଚଳର ବାସିନ୍ଦା ।

ବାଲିଅନ୍ତା ଥାନା ଅଞ୍ଚଳରେ ଘଟିଥିଲା ସାଂଘାତିକ ହତ୍ୟାକାଣ୍ଡ । ସୌମ୍ୟଙ୍କୁ ସଂଘବଦ୍ଧ ଭାବେ ମାରପିଟ୍ କରିବା ଅଭିଯୋଗରେ ହୋଇଛି ଗିରଫଦାରୀ । ବାଲିଅନ୍ତା ମାମଲାରେ ବର୍ତ୍ତମାନ ସୁଦ୍ଧା ଏପର୍ଯ୍ୟନ୍ତ ମୋଟ ୧୬ ଜଣ ଅଭିଯୁକ୍ତ ଗିରଫ ହୋଇଛନ୍ତି । ଘଟଣାରେ ସଂପୃକ୍ତ ଅନ୍ୟ ଅଭିଯୁକ୍ତଙ୍କୁ ଧରିବା ପାଇଁ କ୍ରାଇମ ବ୍ରାଞ୍ଚର ଧରପଗଡ଼ ଜାରି ରଖିଛି ।

ସେପଟେ କୋର୍ଟରେ ୨ ଯୁବତୀଙ୍କର ହେବ ବୟାନ ରେକର୍ଡ । ମାଜିଷ୍ଟ୍ରେଟଙ୍କ ସାମ୍ନାରେ ହେବ ବୟାନ ରେକର୍ଡ । BNSSର 183ରେ ୨ ଯୁବତୀ ଦେବେ ବୟାନ । ଘଟଣା ଦିନ କଣ ଘଟିଥିଲା ମାଜିଷ୍ଟ୍ରେଟଙ୍କ ସାମ୍ନାରେ ଗୋଟି ଗୋଟି ସତ କହିବେ ୨ ଯୁବତୀ ।

ଗତ ମେ ୭ ତାରିଖରେ ରାଜଧାନୀ ଉପକଣ୍ଠ ବାଲିଅନ୍ତାରେ ପୋଲିସ ଆଖି ଆଗରେ ସୌମ୍ୟରଞ୍ଜନ ସ୍ଵାଇଁ ନାମକ ଜଣେ ଯୁବକକୁ ପିଟିପିଟି ହତ୍ୟା କରାଯାଇଥିଲା । ଏହି ଜଘନ୍ୟ ହତ୍ୟାକାଣ୍ଡ ସବୁ ସୀମା ଟପିଥିଲା । ଘଟଣାସ୍ଥଳରେ ପୋଲିସ ଉପସ୍ଥିତ ଥିଲେ ବି ରୋକି ପାରିନଥିଲା । ହାତଗୋଡ଼ ବାନ୍ଧି ଲୁହାରେ ଓଲଟା ଟଙ୍ଗାଇ ସଂଘବଦ୍ଧ ହୋଇ ଅତି ନିର୍ମମ ଭାବେ ରଡ୍, ଲାଠିରେ ପିଟିପିଟି ମାରିଦେଇଥିଲ ସୌମ୍ୟରଞ୍ଜନଙ୍କୁ । ମୃତ ସୌମ୍ୟରଞ୍ଜନ ରେଳବାଇରେ ଜଣେ କନେଷ୍ଟବଳ ଥିଲେ ।

ଘଟଣାରେ ମୁଖ୍ୟମନ୍ତ୍ରୀ ଦୁଃଖ ପ୍ରକାଶ କରିବା ସହ କ୍ରାଇମବ୍ରାଞ୍ଚକୁ ଏହାର ତଦନ୍ତ ଦାୟିତ୍ଵ ଦେଇଥିଲେ । ରାଜ୍ୟ ମହିଳା କମିଶନ ଅଧ୍ୟକ୍ଷା ଶୋଭନା ମହାନ୍ତିଙ୍କ ଘଟଣାସ୍ଥଳ ପରିଦର୍ଶନ କରିବା ସହ ପୀଡ଼ିତାଙ୍କୁ ଭେଟିଥିଲେ । ଏହି ଘଟଣାରେ ପୀଡ଼ିତା ଓ ମୃତ ସୌମ୍ୟରଞ୍ଜନଙ୍କ ସାଙ୍ଗ ଅଲଗା ଅଲଗା ବୟାନ ଦେଇଥିଲେ । ତାଙ୍କ ସହ ଅସଦାଚରଣ କରାଯାଇଛି । ମାଡ଼ ମରାଯିବା ସହ ତାଙ୍କୁ ଉଠାଇ ନେବାକୁ ମଧ୍ୟ ସାଙ୍ଗକୁ କହୁଥିଲେ ମୃତ ସୌମ୍ୟରଞ୍ଜନ ବୋଲି ପୀଡ଼ିତା ଅଭିଯୋଗ କରିଥିଲେ ।

୭ ତାରିଖ ଦିନ ବାଳକାଟି ସରକାରୀ ମେଡିକାଲରେ ଡିୟୁଟିରେ ଥିବା ଡାକ୍ତର ଯେଉଁ ବୟାନ ଦେଇଛନ୍ତି, ତାହା ଆହୁରି ଚମକାଇ ଦେଲା ଭଳି। ଡାକ୍ତରଙ୍କ କହିବା ଅନୁସାରେ, ଦିନ ୧୨ଟା ୩୦ରୁ ୧୨ଟା ୪୦ ମଧ୍ୟରେ ସୌମ୍ୟଙ୍କୁ ମେଡିକାଲ ଅଣାଯାଇଥିଲା । ସେତେବେଳେ ମଧ୍ୟ ତାଙ୍କର ହାତଗୋଡ଼ ବନ୍ଧା ଯାଇଥିଲା ଏବଂ କୌଣସି ଷ୍ଟ୍ରେଚର ନୁହେଁ ବରଂ ଏକ ବାଡ଼ିରେ ବୋହିକି ତାଙ୍କୁ OPDକୁ ଅଣାଯାଇଥିଲା ।

ସେତେବେଳେ ସୌମ୍ୟଙ୍କ ନାକରୁ ପ୍ରଚୁର ରକ୍ତ ବୋହୁଥିଲା, ଡାହାଣ ପାଖ ଆଖି ପତା ଉପରେ ଏକ ବଡ଼ କଣା ହୋଇଥିଲା । ବ୍ଲଡ୍‌ ପ୍ରେସର କିମ୍ବା ପଲ୍ସ କିଛି ବି ଫିଲ୍ ହେଉନଥିଲା । ମେଡିକାଲରେ ECG ଉପଲବ୍ଧ ନଥିବାରୁ ଅପରାହ୍ନ ୧୨ଟା ୫୫ରେ ସୌମ୍ୟଙ୍କୁ କ୍ୟାପିଟାଲ ହସ୍ପିଟାଲକୁ ସ୍ଥାନାନ୍ତରିତ କରାଯାଇଥିଲା । ଆଉ ସବୁଠୁ ବଡ଼ କଥା ହେଉଛି, ଏହି ସମୟରେ ମେଡିକାଲ ପରିସରରେ ୪ ଜଣ ପୋଲିସ ଅଧିକାରୀ ଉପସ୍ଥିତ ଥିଲେ ।