ଆଜ୍ଞା ହଁ.. ଏବେ ଓଡ଼ିଶାର ସୀମାନ୍ତ ନୂଆପଡ଼ା ଅଞ୍ଚଳରେ ଥିବା ଗାଁ ଗୁଡ଼ିକର ଲୋକେ ଆଉ ଦେହ ଭଲ କରିବାକୁ ଛତିଶଗଡ଼ ଯିବେନି । କାରଣ ଏବେ ତାଙ୍କ ପାଖକୁ ଯିବେ ଭଲ ଭଲ ଡାକ୍ତର । ନିକଟରେ ଆରମ୍ଭ ହୋଇଛି ମୁଖ୍ୟମନ୍ତ୍ରୀ ବାୟୁ ସ୍ୱାସ୍ଥ୍ୟ ସେବା । ଯାହାଫଳରେ କଟକ ଭୁବନେଶ୍ୱରରୁ ବିଶେଷଜ୍ଞ ଡାକ୍ତରମାନେ ଫ୍ଲାଇଟ୍‌ରେ ଯାଉଛନ୍ତି ନୂଆପଡ଼ା । ସେଠାରେ ରୋଗୀ ଦେଖୁଛନ୍ତି, ଚିକିତ୍ସା କରୁଛନ୍ତି ଔଷଧ ମଧ୍ୟ ଦେଉଛନ୍ତି । ଖାଲି ସେତିକି ନୁହେଁ ଅତ୍ୟାଧୁନିକ ଯନ୍ତ୍ରପାତିର ବ୍ୟବସ୍ଥା ମଧ୍ୟ କରାଯାଇଛି ।

ଯେତେବେଳେ ଏହି ବିଶେଷଜ୍ଞ ଡାକ୍ତରମାନେ ନୂଆପଡ଼ାରେ ପହଞ୍ଚୁଛନ୍ତି ତାଙ୍କୁ ଭଗବାନଙ୍କ ଭଳି ସମ୍ମାନର ସହିତ ପାଛୋଟି ନେଉଛନ୍ତି ଲୋକେ । ଆଉ ଭଲ ଭଲ ଡାକ୍ତରଙ୍କୁ ପାଖରେ ପାଇ ଗାଁ ଲୋକେ ମଧ୍ୟ ଖୁସି ବ୍ୟକ୍ତ କରୁଛନ୍ତି ।

ଚାରିଦିନ ଧରି ଚାଲିଥିବା ମୁଖ୍ୟମନ୍ତ୍ରୀ ବାୟୁ ସ୍ୱାସ୍ଥ୍ୟ ସେବା ଶିବିରରେ ପ୍ରାୟ ୯୪୪ ଜଣ ରୋଗୀଙ୍କୁ ଚିକିତ୍ସା କରିଛନ୍ତି ଡାକ୍ତର । ସେଥିମଧ୍ୟରୁ ସ୍ନାୟୁରୋଗ ବିଭାଗରେ ୩୭୪ ଜଣଙ୍କୁ ଚିକିତ୍ସା କରାଯାଇଥିବା ବେଳେ ୧୬୪ ହୃଦରୋଗୀଙ୍କୁ ଦେଖିଥିଲେ ଡାକ୍ତର, ୧୫୩ ଜଣ ଗ୍ୟାଷ୍ଟ୍ରୋ ଏଣ୍ଡ୍ରୋଲୋଜି, ୧୧୨ ଜଣ ନେଫ୍ରୋଲୋଜି ବିଭାଗର ଡାକ୍ତରଙ୍କ ନକଟରେ ସ୍ୱାସ୍ଥ୍ୟ ପରୀକ୍ଷା କରିଥିଲେ ।

କଟକ ଶ୍ରୀରାମଚନ୍ଦ୍ର ମେଡିକାଲ କଲେଜ ଓ ହସ୍ପିଟାଲରୁ ୧୧ ଜଣ ବିଶେଷଜ୍ଞଙ୍କ ସହ ଏସସିବିର ବିଶେଷଜ୍ଞ ଡାକ୍ତର ଏହି ସ୍ୱାସ୍ଥ୍ୟ ସେବାରେ ସାମିଲ ଥିଲେ । ନୂଆପଡ଼ା ହସ୍ପିଟାଲଠାରେ ସେମାନଙ୍କୁ ଅତ୍ୟାଧୁନିକ ରୋଗ ନିରୂପଣ ଯନ୍ତ୍ରପାତି ମଧ୍ୟ ଯୋଗାଇ ଦିଆଯାଇଥିଲା। ନୂଆପଡ଼ା ଭଲି ଉପାନ୍ତ ଜିଲ୍ଲାରେ ମୁଖ୍ୟମନ୍ତ୍ରୀ ବାୟୁ ସ୍ୱାସ୍ଥ୍ୟ ସେବା ଆରମ୍ଭ ହୋଇଥିବାରୁ ଜିଲ୍ଲାବାସୀ ଏବେ ବହୁତ ଖୁସି ।