ଆଉ ଚାଲିବନି ମନମାନି। ବନ୍ଦ ହେବ ଗରିବ, ଅବହେଳିତ, ଦଳିତ, ଆଦିବାସୀଙ୍କୁ ଶିକ୍ଷା, ହଷ୍ଟେଲ ସୁବିଧା ଦେବା ନାଁରେ ସାଂଘାତିକ କେଳେଙ୍କାରୀ । ଡ୍ରିମ୍ ସେଣ୍ଟର ହଷ୍ଟେଲ ନାଁରେ ସାରା ରାଜ୍ୟରେ ପୈଜ୍ ରେହମାନ ନାମକ ଏ ବ୍ୟକ୍ତି ଚଳାଇଥିବା ଧର୍ମାନ୍ତରୀକରଣର ସାଂଘାତିକ ଷଡ଼ଯନ୍ତ୍ରର ପର୍ଦ୍ଦାଫାସ୍ ପରେ ଆକ୍ସନ ମୋଡକୁ ଆସିଛନ୍ତି ରାଜ୍ୟ ସରକାର । ଆଇନ ଅନୁଯାୟୀ ତୁରନ୍ତ କାର୍ଯ୍ୟାନୁଷ୍ଠାନ ନେବାକୁ ଡିଜିପିଙ୍କୁ ନିର୍ଦ୍ଦେଶ ଦେଇଛି ରାଜ୍ୟ ଗୃହ ବିଭାଗ । ସେପଟେ ଝାରସୁଗୁଡ଼ା ପରେ ଦେବଗଡ଼ ଓ କଟକରେ ଡ୍ରିମ୍ ସେଣ୍ଟର ହଷ୍ଟେଲ ବନ୍ଦ କରାଇବାକୁ ପ୍ରକ୍ରିୟା ଆରମ୍ଭ କରିଛି ପ୍ରଶାସନ। କଟକ ଚୌଦ୍ବାର ଶଙ୍କରପୁରରେ ଚାଲିଥିବା ଏ ଡ୍ରିମ ସେଣ୍ଟର ହଷ୍ଟେଲରେ ପହଞ୍ଚି ଛାନଭିନ୍ କରିଛନ୍ତି ବ୍ଲକ ଶିକ୍ଷା ଅଧିକାରୀ । ହଷ୍ଟେଲରେ କେବଳ ବଡ଼ଦିନ ପାଳନର ବ୍ୟାନର ଲାଗିଛି । ଅନ୍ୟ କୌଣସି ପୂଜା ହେଉନଥିବା କହିଛନ୍ତି ହଷ୍ଟେଲ କେୟାର ଟେକର। ବିନା ଅନୁମତିରେ ଚାଲିଛି ଏ ହଷ୍ଟେଲ। ଏ ନେଇ ଜିଲ୍ଲାପାଳଙ୍କୁ ଜଣାଇବେ ବୋଲି କହିଛନ୍ତି BEO।

ସେପଟେ ଫୈଜ ରେହମାନଙ୍କ କେଳେଙ୍କାରୀ ବିରୋଧରେ ତାତିଛନ୍ତି ହିନ୍ଦୁ ସଂଗଠନ। ରାଜ୍ୟରେ ବେଆଇନ ଭାବେ ଚାଲିଥିବା ଡ୍ରିମ ସେଣ୍ଟର ହଷ୍ଟେଲରେ ନିରୀହ ଆଦିବାସୀଙ୍କ ଧର୍ମାନ୍ତରୀକରଣ କରାଯାଉଛି । ଏଭଳି ସେଣ୍ଟରକୁ ବନ୍ଦ କରିବା ସହ ମୁଖ୍ୟ କାର୍ପଟଦାର ଫୈଜ ରେହମାନକୁ ଗିରଫ ପାଇଁ ଦାବି କରିଛି ହିନ୍ଦୁ ଜାଗରଣ ମଞ୍ଚ। ଏଥିପାଇଁ କଟକ ବକ୍ସି ବଜାର ସ୍ଥିତ ପୋଲିସ ମୁଖ୍ୟାଳୟରେ ଡିଜିପିଙ୍କ ଉଦ୍ଦେଶ୍ୟରେ ଦେଇଛନ୍ତି ଦାବିପତ୍ର ।

ସେପଟେ ବଲାଙ୍ଗିରରେ ବେଆଇନ ଭାବେ ଚାଲିଥିବା ଡ୍ରିମ୍ ସେଣ୍ଟର ହଷ୍ଟେଲ ବନ୍ଦ କରିବାକୁ 14 ଦିନ ପୂର୍ବରୁ ଦିଆଯାଇଥିଲା ନୋଟିସ୍। ଏଯାଏଁ କେମିତି ହଷ୍ଟେଲ ଚାଲିଛି ତାହା ବଡ଼ ପ୍ରଶ୍ନ । ପୁଣି ଥରେ ତଦନ୍ତ ହେବ ବୋଲି ଜିଲ୍ଲପାଳ କହୁଥିବାବେଳେ ଜିଲ୍ଲା ଶିକ୍ଷା ଅଧିକାରୀ କହୁଛନ୍ତି ଟିମ୍ ଗଠନ କରି ତଦନ୍ତ କରିବେ। ତଦନ୍ତ କରି ବନ୍ଦ ପାଇଁ ନୋଟିସ ହୋଇଥିଲା। ପୁଣି କଣ ତଦନ୍ତ କରିବେ ଜିଲ୍ଲାପାଳ ତାହା ବଡ଼ ପ୍ରଶ୍ନ । ୧୪ ଦିନ ହେଲାଣି ଜିଲ୍ଲା ଶିକ୍ଷା ଅଧିକାରୀଙ୍କ ପାଖରେ କେମିତି ଖବର ନାହିଁ । କିଏ ଲୁଚାଇ ରଖିଥିଲା ବନ୍ଦ ନୋଟିସ ତାହା ବି ପ୍ରଶ୍ନ ଘେରରେ।