ଆଜି ସମ୍ବିଧାନ ହତ୍ୟା ଦିବସ ପାଳିବେ ରାଜ୍ୟ ସରକାର । ୧୯୭୫ ମସିହା ଜୁନ ୨୫ରେ ଭାରତରେ ଜରୁରୀକାଳୀନ ସ୍ଥିତି ଲାଗୁ ହେବାର ୫୦ ତମ ବାର୍ଷିକୀକୁ ସ୍ମରଣ କରିବା ପାଇଁ ରାଜ୍ୟ ସରକାର ପାଳନ କରିବେ ସମ୍ବିଧାନ ହତ୍ୟା ଦିବସ । ରାଜ୍ୟର ସମସ୍ତ ବିଶ୍ୱବିଦ୍ୟାଳୟ ଏବଂ ଉଚ୍ଚଶିକ୍ଷା ବିଭାଗ ଅଧୀନରେ ଥିବା ମହାବିଦ୍ୟାଳୟ ଗୁଡ଼ିକୁ ୨୦୨୫ ମସିହା ଜୁନ ୨୫ ତାରିଖକୁ ‘ସମ୍ବିଧାନ ହତ୍ୟା ଦିବସ’ ଭାବେ ପାଳନ କରାଯିବ । ଏହି ଦିବସରେ ଛାତ୍ରଛାତ୍ରୀ ଓ ଅଧ୍ୟାପକମାନଙ୍କୁ ନେଇ ସମ୍ବିଧାନର ମୂଲ୍ୟବୋଧ ସମ୍ପର୍କରେ ସଚେତନତା ସୃଷ୍ଟି କରିବା ପାଇଁ ସେମିନାର, ସଚେତନତା ରାଲି, ବିତର୍କ, କର୍ମଶାଳା, ବକ୍ତୃତା, ‘ସମ୍ବିଧାନ ବଞ୍ଚାଅ’ ବିଷୟରେ ରାଜପଥ ନାଟକ ଆୟୋଜନ ହେବ ।

ଆଜି ଭୁବନେଶ୍ଵର ରେଳ ଅଡିଟରିୟମରେ ପାଳନ ହେବ ରାଜ୍ୟସ୍ତରୀୟ ସମ୍ବିଧାନ ହତ୍ୟା ଦିବସ । ରାଜନୀତି ବିଜ୍ଞାନର ଛାତ୍ରଛାତ୍ରୀ ଏହି କାର୍ଯ୍ୟକ୍ରମରେ ଭାଗ ନେବେ । ଅନ୍ୟପଟେ ଜୟପୁରରେ ହେଉଛି ନିଆରା ପ୍ରତିବାଦ । ଦଳର ଯୁବ ମୋର୍ଚ୍ଚା ତରଫରୁ ଯୁବ ବର୍ଗଙ୍କୁ ନେଇ ଆୟୋଜନ କରାଯାଉଛି ମୋକ ପାର୍ଲାମେଣ୍ଟ । କଂଗ୍ରେସ ଶାସନ ସମୟରେ ଗଣତନ୍ତ୍ର ଓ ସମ୍ବିଧାନକୁ ହତ୍ୟାକରି କିପରି ଦେଶବାସୀଙ୍କ ମୌଳିକ ଅଧିକାର ଓ ବାକ୍ ସ୍ଵାଧୀନତାକୁ କ୍ଷୂର୍ଣ୍ଣ କରାଯାଇଥିଲା ସେ ସମ୍ପର୍କରେ ଯୁବ ପୀଢ଼ିକୁ ଅବଗତ କରାଇବା ଏହି କାର୍ଯ୍ୟକ୍ରମର ମୂଳଲକ୍ଷ୍ୟ ।