ଶ୍ରୀମନ୍ଦିରରେ ଦିନକୁ ଦିନ ଶ୍ରଦ୍ଧାଳୁଙ୍କ ସଂଖ୍ୟା ବଢୁଥିବାବେଳେ ନାଟମଣ୍ଡପ ଦର୍ଶନ ବ୍ୟବସ୍ଥାକୁ ସହଜ କରିବାକୁ ରାଜ୍ୟ ସରକାରଙ୍କ ଫୋକସ୍ । ସାତପାହାଚଠୁ ନାଟମଣ୍ଡପ ମଧ୍ୟରେ କମ୍ ସମୟରେ କିଭଳି ଅଧିକ ଲୋକଙ୍କୁ ଦିଆଯିବ ଦର୍ଶନ । ସେଥିପାଇଁ ଆରମ୍ଭ ହୋଇଛି ମାନସ ମନ୍ଥନ। ଏହି ପରିପ୍ରେକ୍ଷୀରେ ପୁରୀ ଯାଇ ସ୍ଥିତି ସମୀକ୍ଷା କରି ଫେରିଛନ୍ତି ମୁଖ୍ୟମନ୍ତ୍ରୀଙ୍କ ଉପଦେଷ୍ଟା ପ୍ରକାଶ ମିଶ୍ର । ମୁଖ୍ୟ ପ୍ରଶାସକ, ଉପଜିଲ୍ଲାପାଳ ତଥା ଶ୍ରୀମନ୍ଦିର ଉପ ମୁଖ୍ୟ ପ୍ରଶାସକ, ଏସପିଙ୍କ ସହ ବୈଠକ କରିଥିଲେ । ସମୟ ଲାଗିବ, କିନ୍ତୁ ରେଗୁଲେଟେଡ୍ ହେବ ଦର୍ଶନ କହିଛନ୍ତି ପ୍ରକାଶ ମିଶ୍ର । ଶିଶୁ, ମହିଳା, ବୟସ୍କ ଦର୍ଶନ ଉପରେ ଗୁରୁତ୍ବ ଦିଆଯିବ । ଆଗକୁ ପରିଚାଳନା କମିଟି ଗଠନ ସହ ହୁଣ୍ଡି ସ୍ଥାନାନ୍ତର ହୋଇ ଲାଗୁ ହେବ ଦର୍ଶନ ବ୍ୟବସ୍ଥା ।

ବାହାର କାଠ ଦର୍ଶନ ଅର୍ଥାତ୍ ନାଟ ମଣ୍ଡପ ଧାଡ଼ି ଦର୍ଶନ ପାଇଁ ଗତ ବର୍ଷଠାରୁ ଚାଲିଛି ମସୁଧା।ବିଭିନ୍ନ ନିଯୋଗ ସହ କଥାବାର୍ତ୍ତା, ଆଲୋଚନା ଓ ଓବିଶିଶିର ଡିଜାଇନ୍ ପରେ ଚୂଡ଼ାନ୍ତ ହୋଇଥିଲା ରୂପରେଖ।ଭୁବନେଶ୍ୱରରେ ଏନେଇ ସୁଉଚ୍ଚ କାଠ ରାମ୍ପ ଓ ଷ୍ଟେପ ପ୍ରସ୍ତୁତି ସରିଛି । ସେପଟେ ଧାଡ଼ି ଦର୍ଶନ ବ୍ୟବସ୍ଥାରେ ଅଧିକ ଲୋକ ଦର୍ଶନ କରିବେ ବୋଲି ଆକଳନ କରାଯାଉଥିଲେ ହେଁ ସେବାୟତ କିନ୍ତୁ ଅମଙ୍ଗ ।

ମୁଖ୍ୟମନ୍ତ୍ରୀଙ୍କ ଉପଦେଷ୍ଟାଙ୍କ ସ୍ଥିତି ସମୀକ୍ଷା ପରେ ନାଟମଣ୍ଡପ ଦର୍ଶନ ଶୃଙ୍ଖଳା ନେଇ ଦେଖାଦେଇଛି ନୂଆ ଆଶା । ତେବେ ଏହାକୁ ସଫଳ ରୂପାୟନ ପାଇଁ କ'ଣ ପଦକ୍ଷେପ ନିଆଯିବ ତାହା ଦେଖିବାକୁ ବାକି।