ଗାଡି ଚୋରି ହେବା କିଛି ନୂଆ ଘଟଣା ନୁହେଁ । ଯାହାର ଗାଡି ଚୋରି ହୋଇଥାଏ ସେ କେତେ ଯେ ଟେନସନ୍ ନିଏ ସେ ନିଜେ ହିଁ ଜାଣିଥାଏ । ହେଲେ ଏ ଗାଡି ଚୋରି କଥା ଶୁଣିଲେ ଆପଣ ହସି ହସି ଗଡି ଯିବେ । ଏମିତି କି ଖୋଦ ଗାଡି ମାଲିକ ମଧ୍ୟ ନ ହସି ରହିପାରୁନାହାନ୍ତି ।

କଥା ଟା ହେଉଛି ବ୍ରହ୍ମପୁର ଲାଞ୍ଜିପଲ୍ଲୀ ମୁଖ୍ୟ ରାସ୍ତାରୁ ଏପ୍ରିଲ ୩୦ ତାରିଖ ମଧ୍ୟ ରାତ୍ରିରେ ଏକ ବାଇକ୍ ଚୋରି ହୋଇଥିଲା। ଚୋରି ସମୟର ସିସିଟିଭି ଫୁଟେଜ୍ ମଧ୍ୟ ଭାଇରାଲ ହୋଇଥିଲା । ଏ ନେଇ ବାଇକ୍ ମାଲିକ ବୈଦ୍ୟନାଥପୁର ଥାନାରେ ଅଭିଯୋଗ କରିଥିଲେ । ପୁଲିସ ଅଭିଯୋଗ ଆଧାରରେ ମାମଲା ରୁଜୁ କରି ତଦନ୍ତ ମଧ୍ୟ କରୁଥିଲା । ଇତି ମଧ୍ୟରେ ବେଶ୍‌ କିଛି ଦିନ ବିତିଥିଲା ।

ନିକଟରେ ଚୋରି ହୋଇଥିବା ସ୍ଥାନରେ ବାଇକ୍ ଛିଡ଼ା ହୋଇଥିବା ମାଲିକ ଦେଖିବାକୁ ପାଇଥିଲେ । ପାଖକୁ ଯାଇ ଦେଖିବା ବେଳକୁ ବାଇକ୍ ଭଲ ଅବସ୍ଥାରେ ଅଛି । ଆଉ ବାଇକ୍ ଉପରେ ଏକ ଚିଠି ରଖା ଯାଇଛି ।

ଚିଠିରେ ଲେଖା ହୋଇଛି "ସରି, ଏମିତି ନେବାର ନଥିଲା ମୋ ଗାର୍ଲଫ୍ରେଣ୍ଡର ଆକ୍‌ସିଡେଣ୍ଟ କାଲି ରାତିରେ ହୋଇଥିଲା । ମୋ ପାଖରେ ପଇସା ନଥିଲା ଓ ଜଲ୍‌ଦି ଯିବାର ଥିଲା । ତେଣୁ କରି ଆପଣଙ୍କ ବାଇକ ନେଇଥିଲି । ସେମିତି ନେବାର ନଥିଲା । କିନ୍ତୁ ସେଥ‌ିପାଇଁ ସରି । ସାନ ଭାଇ ଭାବି କ୍ଷମା କରିଦେବେ ଭାଇ।"

ଆଉ ଏହି ଚିଠିକୁ ପଢ଼ି ମାଲିକ ମଧ୍ୟ ଆଶ୍ଚର୍ଯ୍ୟ ହୋଇଥିଲେ । ନିଜ ସାଙ୍ଗ ସାଥିଙ୍କୁ ଘଟଣା ବିଷୟରେ ଜଣାଇଥିଲେ। ଏହା ସହ ତାଙ୍କ ବାଇକ୍ ଫେରି ପାଇଛନ୍ତି ଓ ସାଥିରେ ପାଇଥିବା ଚିଠି ବିଷୟରେ ପୁଲିସକୁ ସୂଚନା ଦେଇଛନ୍ତି । ହେଲେ ଏହି ଘଟଣା ବିଷୟରେ ସେ ଯାହାକୁ କହୁଛନ୍ତି ସମସ୍ତେ ହସୁଛନ୍ତି । ଏମିତି ରୋକ ଘଟଣା ଆଗରୁ କେବେ ଘଟିନଥିବାବେଳେ ଚୋରି ପରେ ବାଇକ ଫେରି ପାଇଥିବାରୁ ମାଲିକ ମଧ୍ୟ ଖୁସି ଅଛନ୍ତି ।

Argus News | argus news | -Argusnews Home: Odisha Latest News, Breaking News, Trending News, Live TV and more