ବରଗଡ: ଷ୍ଟ୍ରବେରୀ କରିଛି ସ୍ୱାବଲମ୍ବୀ । ଧାଡି ଧାଡି ହୋଇ ଲାଗିଛି ଷ୍ଟ୍ରବେରୀ ଗଛ । ଫଳିଛି ପେନ୍ଥା ପେନ୍ଥା ଷ୍ଟ୍ରବେରୀ । ଆଉ ଏହି ଷ୍ଟ୍ରବେରୀ ଚାଷ କରି ମଫସଲ ଗାଁର ମହିଳା ହୋଇଛନ୍ତି ସ୍ୱାବଲମ୍ୱୀ ।

ବରଗଡ ପଦ୍ମପୁର ସବ୍ ଡ଼ିଭିଜନ ପାଇକମାଳ ବ୍ଲକ ଅନ୍ତର୍ଗତ କର୍ମେଲାବାହାଲ ମହିଳା ଚାଷୀ ଝରଣା ସାହୁ । ସ୍ବାମୀ, ଶ୍ୱଶୁର, ଝିଅ ପୁଅକୁ ନେଇ ଛୋଟ ପରିବାର । ଚାଷ କରି ଦି ପଇସା ରୋଜଗାର କରି ସ୍ବାବଲମ୍ବୀ ଚାଷୀ ଭାବେ ବେଶ ପରିଚିତ । ଏହାସହ ମହିଳା ସ୍ଵୟଂ ସହାୟକ ଗୋଷ୍ଠୀର MBK ଭାବେ ମଧ୍ୟ ବେଶ ସୁନାମ ଅର୍ଜନ କରିଛନ୍ତି । ପନିପରିବା ଚାଷ ସହ ଆମ୍ବ, ସଜନା ଚାଷ ମଧ୍ୟ ରହିଛି ।

ଏ ବର୍ଷ ସେ ପ୍ରଥମ କରି ଷ୍ଟ୍ରବେରୀ ଚାଷ କରି ଭଲ ଦି ପଇସା ରୋଜଗାର କରିପାରୁଛନ୍ତି । ଷ୍ଟ୍ରବେରୀ ଚାଷ କରି ଲାଭାନ୍ୱିତ ହେଉଥିବା ନେଇ ବେଶ ଖୁସି ଅଛନ୍ତି । ଆସନ୍ତା ବର୍ଷ ଆହୁରି ଅଧିକାଂଶ ଷ୍ଟେବେରୀ ଚାଷ କରିବାକୁ ଏବେ ଠାରୁ ପ୍ରସ୍ତୁତ ଥିବା କହିଛନ୍ତି । ମାର୍କେଟରେ ଅଧିକ ଚଢା ଦର ରହିଛି । କିନ୍ତୁ ଝରଣା କମ୍ ଦରରେ ଲୋକଙ୍କୁ ଦେଇ ଅଧିକ ଖୁସି ଅନୁଭବ କରୁଛନ୍ତି । ଅମଳ ଷ୍ଟ୍ରବେରୀକୁ ତାଙ୍କୁ କୌଣସି ଆଡ଼କୁ ବିକ୍ରି କରି ନେବାକୁ ପଡୁ ନ ଥିବାବେଳେ ତାଙ୍କ ଘରେ ବସି ପ୍ରାୟ 300 ଟଙ୍କାରେ ବିକ୍ରି କରି ଦେଉଥିବା କହିଛନ୍ତି ଝରଣା । ସ୍ବାମୀ ବି ଜଣେ ଚାଷୀ ହେତୁ ନିଜେ ମଧ୍ୟ ଚାଷ କାର୍ଯ୍ୟ କରି ସ୍ବାବଲମ୍ବୀ ହୋଇପାରିବା ଆଶା ବ୍ୟକ୍ତ କରି ସମାଜ ତଥା ଅନ୍ୟ ମାନଙ୍କ ପାଇଁ ଦିଗଦର୍ଶନ ଦେବା ସହ ମାର୍ଗଦର୍ଶନ ପ୍ରଦାନ କରୁଛନ୍ତି ।

Argus News | argus news | Odisha Latest News, Breaking News, Trending News, Live TV