ବୁଲା କୁକୁର ପ୍ରସଙ୍ଗରେ ସୁପ୍ରିମକୋର୍ଟଙ୍କ ବଡ଼ ନିର୍ଦ୍ଦେଶ ପରେ ପୁରୀରେ ବନ୍ଧ୍ୟାକରଣ କାର୍ଯ୍ୟ ଶୀଘ୍ର ଆରମ୍ଭ କରିବାକୁ ଉଠିଲା ଦାବି । ପୁରୀ ସହରରେ ବୁଲା କୁକୁରଙ୍କ ଆତଙ୍କ ଏବେ ବଢ଼ିବାରେ ଲାଗିଛି । ବୁଲା କୁକୁରଙ୍କ ସଂଖ୍ୟା ଅତ୍ୟଧିକ ବୃଦ୍ଧି ପାଇଥିବା ବେଳେ ଲୋକେ କୁକୁର କାମୁଡ଼ାର ଶିକାର ହେଉଛନ୍ତି । ପୌରପାଳିକା କାର୍ଯ୍ୟନିର୍ବାହୀ ଅଧିକାରୀ କହିଛନ୍ତି କୁକୁର ବନ୍ଧ୍ୟାକରଣ ପାଇଁ ଟେଣ୍ଡର କରାଯାଇଛି । ଖୁବଶୀଘ୍ର ଆରମ୍ଭ ହେବ ପ୍ରକ୍ରିୟା ।

ବୁଲା କୁକୁର ପ୍ରସଙ୍ଗରେ ସୁପ୍ରିମକୋର୍ଟଙ୍କ ଦେଇଛନ୍ତି ବଡ଼ ନିର୍ଦ୍ଦେଶ । ଶିକ୍ଷାନୁଷ୍ଠାନ, ସମ୍ବେଦନଶୀଳ ଅଞ୍ଚଳ, ହସ୍ପିଟାଲ, ଜାତୀୟ ରାଜପଥ, ବସଷ୍ଟାଣ୍ଡ, ରେଳଷ୍ଟେସନ, ବେଳାଭୂମି ଆଦି ସ୍ଥାନରୁ ବୁଲା କୁକୁରଙ୍କୁ ହଟାଇବାକୁ ସର୍ବୋଚ୍ଚ ଅଦାଲତ କହିବା ପରେ ପୁରୀରେ ଏହାକୁ ନେଇ ପ୍ରକାଶ ପାଇଛି ପ୍ରତିକ୍ରିୟା । ପୁରୀ ସହରରେ ବୁଲା କୁକୁରଙ୍କ ଆତଙ୍କ ଦିନକୁ ଦିନ ବଢ଼ିବାରେ ଲାଗିଛି । ଭୟଭୀତ ଅବସ୍ଥାରେ ପୁରୀ ସହରବାସୀ । ଛୋଟ ପିଲାଙ୍କୁ ଏକୁଟିଆ ସ୍କୁଲ ଓ ଟିଉସନ ଛାଡ଼ିବାକୁ ଅଭିଭାବକମାନେ ଭୟ କରୁଛନ୍ତି । ପୁରୀ ପୌରପାଳିକାରେ ବୁଲା କୁକୁରଙ୍କ ସଂଖ୍ୟା ନିୟନ୍ତ୍ରଣ ପାଇଁ ବନ୍ଧ୍ୟାକରଣ କାର୍ଯ୍ୟ ଶୀଘ୍ର ଆରମ୍ଭ କରିବାକୁ ଦାବି କରିଛନ୍ତି ସହରବାସୀ।

ପୁରୀକୁ ଆସୁଥିବା ପର୍ଯ୍ୟଟକ ବି ବୁଲା କୁକୁରଙ୍କ କାମୁଡ଼ାର ଶିକାର ହେଉଛନ୍ତି । ପୌରପାଳିକା କାର୍ଯ୍ୟନିର୍ବାହୀ ଅଧିକାରୀ କହିଛନ୍ତି ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସାଳୟରେ କୁକୁର ବନ୍ଧ୍ୟାକରଣ ପାଇଁ ସ୍ପେଶାଲିଷ୍ଟ ଡାକ୍ତର ନଥିବାରୁ କୁକୁର ବନ୍ଧ୍ୟାକରଣ କାମ ହୋଇପାରୁନାହିଁ। ତେବେ ପୌରପାଳିକା ପକ୍ଷରୁ ଟେଣ୍ଡର କରାଯାଇଛି । ଖୁବଶୀଘ୍ର କୁକୁର ବନ୍ଧ୍ୟାକରଣ କାର୍ଯ୍ୟ କରାଯିବ।

ପର୍ଯ୍ୟଟନ ସହର ପୁରୀର ଗଳିକନ୍ଦିରେ ଏବେ ବୁଲା କୁକୁରଙ୍କ ଦୌରାତ୍ମ୍ୟ ବଢୁଥିବାରୁ ସୁପ୍ରିମକୋର୍ଟଙ୍କ ନିର୍ଦ୍ଦେଶ କାର୍ଯ୍ୟକାରୀ କରିବାର ଆବଶ୍ୟକତା ରହିଛି ବୋଲି ପୁରୀରେ ବୁଦ୍ଧିଜୀବୀ ମହଲରେ ଚର୍ଚ୍ଚା ଚାଲିଛି ।