ଜିମ ଉପକରଣ କିଣିବା ନେଇ ବଡ଼ ଘୋଟଲା ହୋଇଥିବା ନେଇ ସନ୍ଦେହ
Key Points
ଜିମ ଉପକରଣ କିଣିବା ନେଇ ବଡ଼ ଘୋଟଲା ହୋଇଥିବା ନେଇ ସନ୍ଦେହ
ସିଏମସି ସିଟି ଇଂଞ୍ଜିନିୟରଙ୍କ ନାମରେ କୋଟି କୋଟି ଟଙ୍କାର ଦୁର୍ନୀତି ଅଭିଯୋଗ
କେବେ ଆସିଲା, କେଉଁଠି ଲାଗିଲା ଉପକରଣ ତାହା ହୋଇପାରୁନି ସ୍ପଷ୍ଟ
୨୦୨୨ରେ ଆସିଥିବା ଜିମ ଉପକରଣ ବିକାଶ ଭବନରେ ଖତ ଖାଉଛି
ଜିମ ଉପକରଣ କିଣିବାକୁ ନେଇ ସିଏମସି ସିଟି ଇଞ୍ଜିନିୟର ଅତନୁ ସାମନ୍ତଙ୍କ ଏହି ଚିଠି ଉପରେ ଟିକେ ନଜର ପକାନ୍ତୁ। ୧୬.୦୨.୨୦୨୪ର ଏହି ଚିଠିକୁ ଭଲ ଭାବରେ ଦେଖନ୍ତୁ। ରାଜ୍ୟ ବାହାରର ଏକ ଘରୋଇ ସଂସ୍ଥାକୁ ୫ କୋଟି ଟଙ୍କାର ଜିମ ସରଞ୍ଜାମ କିଣିବା ପାଇଁ କାର୍ଯ୍ୟାଦେଶ ଦେଇଛନ୍ତି। ସିଏମସି ଅଞ୍ଚଳରେ ଥିବା ଫାଇଭ-ଟି ସ୍କୁଲରେ ଜିମ ସରଞ୍ଜାମ ଲାଗିବା ପାଇଁ ଚିଠିରେ ଉଲ୍ଲେଖ କରାଯାଇଛି। ତେବେ ୫ କୋଟି ଟଙ୍କାର ଯନ୍ତ୍ରାଂଶ କେବେ ଆସିଲା ଓ କେଉଁଠି ବ୍ୟବହାର ହୋଇଛି ତାହା ସ୍ପଷ୍ଟ ହେଉନି।
ଏନେଇ ଦୁର୍ନୀତିର ଗନ୍ଧ ବାରିଛନ୍ତି କଂଗ୍ରେସ ଓ ବିଜେପି କର୍ପୋରେଟର। ପୂର୍ବରୁ ୨୦୨୨ ମସିହାରୁ ଆସିଥିବା ଜିମ ଉପକରଣ ବିକାଶ ଭବନ ପରିସରରେ ପଡ଼ିଥିବା ବେଳେ ପୁଣି ଏତେ ଟଙ୍କାର ସାମଗ୍ରୀ ଆସିଛି ନା କେବଳ ଫଲ୍ସ ବିଲ ହୋଇଥିବା ଅଭିଯୋଗ କରି ତଦନ୍ତ ଦାବି କରିଛନ୍ତି କର୍ପୋରେଟର।
ସିଟି ଇଞ୍ଜିନିୟର ତାଙ୍କ କ୍ଷମତାର ଅପବ୍ୟବହାର କରିଥିବା ଅଭିଯୋଗ ମଧ୍ୟ ହେଉଛି। ଯଦିଓ ସିଏମସି କମିଶନରଙ୍କ ନିର୍ଦ୍ଦେଶରେ ଏହି ଚିଠି ହୋଇଥିବା ଉଲ୍ଲେଖ କରାଯାଇଛି। ତେବେ ସରକାରୀ ନିୟମ ଅନୁସାରେ ନଗର ଉନ୍ନୟନ ବିଭାଗର ନିର୍ଦ୍ଦେଶନାମା ଅନୁଯାୟୀ ସିଏମସି କମିଶନର ଏକ କୋଟି, ଷ୍ଟାଣ୍ଡିଂ କମିଟି କୋଟିଏରୁ ଉର୍ଦ୍ଧ୍ବ, କାଉନସିଲ ବା କର୍ପୋରେସନ ଦୁଇ କୋଟିରୁ ଉର୍ଦ୍ଧ୍ବ ଏବଂ ନଗର ଉନ୍ନୟନ ବିଭାଗ ବା ସରକାର ୪ କୋଟି ଟଙ୍କାର ସିଧାସଳଖ କାର୍ଯ୍ୟାଦେଶ ଦେଇପାରିବେ। ତେବେ କେଉଁ ଆଧାରରେ ସିଟି ଇଞ୍ଜିନିୟର ଏଭଳି କାର୍ଯ୍ୟାଦେଶ ଦେଲେ ତାକୁ ନେଇ ସନ୍ଦେହ ଉପୁଜିଛି। ବିନା ଟେଣ୍ଡରରେ କିଭଳି ୫ କୋଟି ଟଙ୍କାର ଯନ୍ତ୍ରାଂଶ ପାଇଁ ନିର୍ଦ୍ଧିଷ୍ଟ ସଂସ୍ଥାକୁ ଚିଠି ଲେଖିଲେ।
ତେବେ ଏ ବାବଦରେ ସିଟି ଇଞ୍ଜିନିୟର ପ୍ରତିକ୍ରିୟା ଦେଇ ନଥିବା ବେଳେ ସିଏମସି କମିଶନର କହିଛନ୍ତି ଏହା ମୋ ସମୟରେ ହୋଇନାହିଁ ମୁଁ ସେତେବେଳେ କମିଶନର ନଥିଲି। ସରକାରୀ ନିୟମକୁ ଉଲ୍ଲଂଘନ କରି ତତ୍କାଳୀନ କମିଶନର ଓ ସିଟି ଇଞ୍ଜିନିୟର ଏଭଳି କାର୍ଯ୍ୟାଦେଶ କିପରି ଦେଲେ ତାକୁ ସନ୍ଦେହ ସୃଷ୍ଟି ହୋଇଛି।
