Food Safety / ମିଠା ଦୋକାନରେ ଚଢ଼ାଉ,୨୪ କିଲୋ ବାସି ଖାଦ୍ୟ ନଷ୍ଟ ଲାଗିଲା ଫାଇନ୍

ରାକ୍ଷୀ ପୂର୍ଣ୍ଣିମା ପୂର୍ବରୁ ବଲାଙ୍ଗୀର ଓ ଟିଟିଲାଗଡ଼ରେ ଆକ୍ସନ୍‌ ମୋଡ୍‌କୁ ଆସିଛି ଖାଦ୍ୟ ନିରାପତ୍ତା ବିଭାଗ । ପାର୍ବଣ ସମୟରେ ମିଠା ଓ ଦୁଗ୍ଧଜାତ ଖାଦ୍ୟର ଚାହିଦା ବଢ଼ୁଥିବାରୁ ନିମ୍ନମାନର କିମ୍ବା ଅସ୍ୱାସ୍ଥ୍ୟକର ଖାଦ୍ୟ ବିକ୍ରି ରୋକିବାକୁ ବିଭିନ୍ନ ମିଠା ଦୋକାନ ଓ ଖାଦ୍ୟ ପ୍ରତିଷ୍ଠାନରେ ଅଚାନକ ଯାଞ୍ଚ କରାଯାଇଛି ।

ବଲାଙ୍ଗୀର ସହରରେ ଖାଦ୍ୟ ନିରାପତ୍ତା ଟିମ୍‌ ସଦର ଥାନା ପୁଲିସର ସହଯୋଗରେ ବିଭିନ୍ନ ଦୋକାନରେ ଯାଞ୍ଚ କରିଥିଲେ । ଏହି ସମୟରେ ମୋଟ ୯ଟି ଖାଦ୍ୟ ନମୁନା ସଂଗ୍ରହ କରାଯାଇ ପରୀକ୍ଷାଗାରକୁ ପଠାଯାଇଛି । ଯାଞ୍ଚ ବେଳେ ୪ କିଲୋଗ୍ରାମ୍ ବାସି ଖାଦ୍ୟ ଓ ୨୦ଟି ମିଆଦପୂର୍ଣ୍ଣ ଖାଦ୍ୟ ସାମଗ୍ରୀ ଜବତ କରାଯାଇ ଅଧିକାରୀଙ୍କ ଉପସ୍ଥିତିରେ ନଷ୍ଟ କରାଯାଇଛି । ନିୟମ ଉଲ୍ଲଂଘନକାରୀଙ୍କଠାରୁ ୨ ହଜାର ଟଙ୍କା ଜରିମାନା ଆଦାୟ ସହ ୩ଟି ପ୍ରତିଷ୍ଠାନକୁ କାରଣ ଦର୍ଶାଅ ନୋଟିସ୍‌ ଜାରି ହୋଇଛି ।

ସେହିପରି ଟିଟିଲାଗଡ଼ ପୌରାଞ୍ଚଳରେ ମଧ୍ୟ ବିଭାଗୀୟ ଟିମ୍‌ ବିଭିନ୍ନ ମିଠା ଦୋକାନରେ ଯାଞ୍ଚ କରିଥିଲେ । ପନୀର, ଖୁଆ, ଛେନା ଓ ବିଭିନ୍ନ ପ୍ରକାର ମିଠା ସମେତ ୧୩ଟି ଖାଦ୍ୟ ନମୁନା ସଂଗ୍ରହ କରାଯାଇଛି । ଏହାର ରିପୋର୍ଟ ଆସିବା ପରେ ନିମ୍ନମାନର ଖାଦ୍ୟ କିମ୍ବା ଖାଦ୍ୟ ନିରାପତ୍ତା ନିୟମ ଉଲ୍ଲଂଘନ ପ୍ରମାଣିତ ହେଲେ ସମ୍ପୃକ୍ତ ବ୍ୟବସାୟୀଙ୍କ ବିରୋଧରେ କଡ଼ା ଆଇନଗତ ପଦକ୍ଷେପ ନିଆଯିବ ବୋଲି ଅଧିକାରୀମାନେ କହିଛନ୍ତି ।

ଟିଟିଲାଗଡ଼ରେ ଯାଞ୍ଚ ସମୟରେ ନିୟମ ଉଲ୍ଲଂଘନକାରୀ ଦୋକାନୀଙ୍କଠାରୁ ୮,୫୦୦ ଟଙ୍କା ଜରିମାନା ଆଦାୟ ହୋଇଛି । ଏଥିସହ ବିଭିନ୍ନ ଦୋକାନରୁ ଜବତ ପ୍ରାୟ ୨୦ କିଲୋଗ୍ରାମ୍ ବାସି, ଅବ୍ୟବହାରଯୋଗ୍ୟ ଓ ଅସ୍ୱାସ୍ଥ୍ୟକର ଖାଦ୍ୟକୁ ନଷ୍ଟ କରାଯାଇଛି ।

ଦୁଇ ସହରର ଯାଞ୍ଚକୁ ମିଶାଇ ମୋଟ ୨୨ଟି ଖାଦ୍ୟ ନମୁନା ସଂଗ୍ରହ, ୨୪ କିଲୋଗ୍ରାମ୍‌ରୁ ଅଧିକ ବାସି ଓ ଅସ୍ୱାସ୍ଥ୍ୟକର ଖାଦ୍ୟ ନଷ୍ଟ ଏବଂ ୧୦,୫୦୦ ଟଙ୍କା ଜରିମାନା ଆଦାୟ କରାଯାଇଛି । ପାର୍ବଣ ସମୟରେ ଖାଦ୍ୟରେ ଅପମିଶ୍ରଣ, ନିମ୍ନମାନର ସାମଗ୍ରୀ ବ୍ୟବହାର କିମ୍ବା ଅସ୍ୱାସ୍ଥ୍ୟକର ଖାଦ୍ୟ ବିକ୍ରିକୁ କୌଣସି ପରିସ୍ଥିତିରେ ବରଦାସ୍ତ କରାଯିବ ନାହିଁ ବୋଲି ପ୍ରଶାସନ ପକ୍ଷରୁ ଦୋକାନୀମାନଙ୍କୁ ଚେତାବନୀ ଦିଆଯାଇଛି । ରାକ୍ଷୀ ପୂର୍ଣ୍ଣିମା ପୂର୍ବରୁ ପ୍ରଶାସନର ଏହି ଚଢ଼ାଉ ଫଳରେ ମିଠା ଓ ଖାଦ୍ୟର ଗୁଣବତ୍ତା ନେଇ ଗ୍ରାହକଙ୍କ ମଧ୍ୟରେ ନିଶ୍ଚିତତା ବଢ଼ିବ ବୋଲି ଆଶା କରାଯାଉଛି ।