ଦିନକୁ ଦିନ ସଂକୁଚିତ ହେବାରେ ଲାଗିଛି ଓଡ଼ିଶାର ପ୍ରମୁଖ ମଧୁର ଜଳ ହ୍ରଦ ତଥା ପର୍ଯ୍ୟଟନ ସ୍ଥଳୀ ତାମ୍ପରା ହ୍ରଦ...ବର୍ଷତମାମ ହଜାର ହଜାର ପର୍ଯ୍ୟଟକ ଆସୁଥିଲେ ସେହି ତାମ୍ପରା ଏବେ ପୋତି ହେବାକୁ ବସିଲାଣି । ଏହାର ପାଣି ମଧ୍ୟ ଶୁଖି ଶୁଖି ଯାଉଛି l ତାମ୍ପରା ହ୍ରଦର ଶେଷଭାଗରେ ବର୍ଷାଜଳକୁ ସଂରକ୍ଷଣ କରିବା ପାଇଁ କୌଣସି ବ୍ୟବସ୍ଥା ନଥିବା ସହ ଚେକଡ୍ୟାମ୍ ନାହିଁ। ଫଳରେ ହ୍ରଦର ପାଣି ସିଧାସଳଖ ସମୁଦ୍ରରେ ମିଶୁଥିବାରୁ ଚାଷୀ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ।

ବିପଦରେ ପ୍ରସିଦ୍ଧ ତାମ୍ପରା ହ୍ରଦ...ସଂକୁଚିତ ହେଉଛି ….କମୁଛି ଜଳସ୍ତର । ପୁନଃରୁଦ୍ଧାର ନ ହେଲେ ପର୍ଯ୍ୟଟନ ମାନଚିତ୍ରରୁ ହଜିଯିବ ହ୍ରଦ । ଏହି ବିଶାଳ ଜଳାଶୟରେ ଯଥେଷ୍ଟ ପାଣି ନାହିଁ । ଗଞ୍ଜାମ ଜିଲ୍ଲା ଛତ୍ରପୁର ନିକଟ ଋଷିକୁଲ୍ୟା ନଦୀର ଡାହାଣ ପାର୍ଶ୍ଵରେ ରହିଛି ଏହି ହ୍ରଦ । ୭୫୦ ଏକର ପରିମିତ ଜାଗାରେ ବ୍ୟାପି ରହିଛି ଏହି ବିଶାଳ ଜଳାଶୟ । ଯାହାକି ଋଷିକୁଲ୍ୟା ନଦୀ ସହ ସଂଯୁକ୍ତ। ନଦୀର ବନ୍ୟାଜଳ ଏହାର ଜୈବ ବିବିଧତାକୁ ସମୃଦ୍ଧ କରିଥାଏ। ଏଥିପାଇଁ ଏହି ହ୍ରଦ ରାମସର ଆର୍ଦ୍ରଭୂମି ତାଲିକାରେ ସାମିଲ ହୋଇଛି। ଆଉ ଏଠାକାର ପରିବେଶ ୬୦ ପ୍ରଜାତିର ପକ୍ଷୀ ଓ ୪୬ ପ୍ରଜାତିର ମାଛ ପାଇଁ ବେଶ୍ ଅନୁକୂଳ । ଏଠାରୁ ଛତ୍ରପୁର ସହରକୁ ପିଇବା ପାଣି ଯୋଗାଣ ହେଉଛି । ଏହାସହ ଜଳକ୍ରୀଡ଼ା ଓ ଭାରତୀୟ ସେନା ପକ୍ଷରୁ ତାଲିମ କାର୍ଯ୍ୟକ୍ରମ ପାଇଁ ତାମ୍ପରା ହ୍ରଦକୁ ବ୍ୟବହାର କରାଯାଉଛି ।

ବୋଟିଂ ସମେତ ମନୋରଞ୍ଜନ ପାଇଁ ସମସ୍ତ ପ୍ରକାର ସୁବିଧା ଏଠାରେ କରଯାଇଛି । କିନ୍ତୁ ବିଭିନ୍ନ କାରଣରୁ ତାମ୍ପରା ହ୍ରଦ ଧୀରେ ଧୀରେ ସଙ୍କୁଚିତ ହେବାରେ ଲାଗିଛି । ଏହାର ପାଣି ମଧ୍ୟ ଶୁଖି ଶୁଖି ଯାଉଛି । ତାମ୍ପରା ହ୍ରଦର ଶେଷଭାଗରେ ବର୍ଷାଜଳକୁ ସଂରକ୍ଷଣ କରିବା ପାଇଁ କୌଣସି ବ୍ୟବସ୍ଥା ନାହିଁ । ଏପରିକି ଚେକଡ୍ୟାମ୍ ନାହିଁ । ଫଳରେ ହ୍ରଦର ପାଣି ସିଧାସଳଖ ସମୁଦ୍ରରେ ମିଶୁଥିବାରୁ ଚାଷୀ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ।

ଅନ୍ୟପକ୍ଷରେ ଜାତୀୟ ଗ୍ରୀନ୍ ଟ୍ରିବ୍ୟୁନାଲ୍ ଛାଟ ପରେ ପାଣି ଭିତରେ ନିର୍ମାଣ କରାଯାଉଥିବା କୋଠାଗୁଡ଼ିକ ଅଧାପନ୍ତରିଆ ଅବସ୍ଥାରେ ପଡି ରହିଛି। ସେଗୁଡ଼ିକରେ ଶିଆଳି ଲାଗିଗଲାଣି । ଛତ୍ରପୁର ବିଧାୟକ କହିଛନ୍ତି, ଏ ନେଇ ଡିପିଆର ପ୍ରସ୍ତୁତ ହୋଇଛି । ରାଜ୍ୟ ଖଣି ପରିବାହନ ମନ୍ତ୍ରୀ ପୁନଃରୁଧାର ସହ କିପରି ବିକାଶ ହୋଇପାରିବ ତାର ତଦାରଖ କରିଛନ୍ତି । ଯଥାଶୀଘ୍ର ଏହାର ବିକାଶ ଦିଗରେ କାର୍ଯ୍ୟ କରାଯିବ । ଏବେ ତାମ୍ପରା ହ୍ରଦର ରକ୍ଷଣା ବେକ୍ଷଣ ଦିଗରେ ପଦକ୍ଷେପ ନେବା ଜରୁରୀ ହୋଇପଡିଛି ।