ବୌଦ୍ଧ: ବୌଦ୍ଧରେ ପୁଣି ମାତିଲେ ମନ୍ଦିର ଲୁଟେରା । ଜଗନ୍ନାଥ ମନ୍ଦିର ତାଲା ଭାଙ୍ଗି ଲୁଟିଲେ ଦୁର୍ବୃତ୍ତ । ସୂଚନା ଅନୁଯାୟୀ ଗତକାଲି ବିଳମ୍ବିତ ରାତିରେ ବୌଦ୍ଧ ସହର ସ୍ଥିତ ଜଗନ୍ନାଥ ମନ୍ଦିର ହୁଣ୍ଡି ଭାଙ୍ଗି ଚୋରି ହୋଇଥିବା ଜଣାପଡିଛି । ମନ୍ଦିରର ତାଲା କାଟି ଭିତରେ ଥିବା ହୁଣ୍ଡି ସହ ଅନ୍ୟାନ୍ୟ ଜିନିଷ ଲୁଟ୍ କରି ନେଇଛନ୍ତି ଦୁର୍ବୃତ୍ତ । ହେଲେ ବଞ୍ଚିଯାଇଛି ଠାକୁରଙ୍କ ସୁନା, ରୂପା ଓ ଅଳଙ୍କାର ।

ତେବେ ସୁନା ଓ ରୂପା ଅଳଙ୍କାର ସରକାରୀ ଟ୍ରେଜେରୀରେ ରହୁଥିବାବେଳେ କେବଳ ରଥଯାତ୍ରା ସମୟରେ ବାହାର କରାଯାଏ ବାହୁଡ଼ା ପରେ ପୁଣି ରଖି ଦିଆଯାଏ । ଯାହାଫଳରେ ସେଗୁଡିକ ସୁରକ୍ଷିତ ରହିଛି । ଅନ୍ୟପକ୍ଷରେ ଖବର ପାଇ ଘଟଣାସ୍ଥଳରେ ଅଦର୍ଶ ଥାନା ପୋଲିସ ଓ ସାଇଣ୍ଟିଫିକ୍ ଟିମ ପହଂଚି ତଦନ୍ତ ଆରମ୍ଭ କରିଛି । ତେବେ ବିଗତ ୪ ମାସ ମଧ୍ୟରେ ସିରିଜ ଭାବରେ ହନୁମାନ ମନ୍ଦିର, ରାମେଶ୍ୱର ମନ୍ଦିର, ଭୈରବୀ ମନ୍ଦିର, ମାତଙ୍ଗେଶ୍ବର ମନ୍ଦିର, କଲେଶ୍ବର ଆଦି ମନ୍ଦିରରୁ ଚୋରି ହୋଇଥିବା ବେଳେ ପୋଲିସ ଲୁଟେରାମାନଙ୍କୁ ଧରିବାରେ ବିଫଳ ହୋଇଛି ।

ମନ୍ଦିରରେ ଚୋରି ହେଲେ କମିଟି ପକ୍ଷରୁ ଲିଖିତ ଅଭିଯୋଗ ଦିଆଯାଏ । ମାତ୍ର ପୋଲିସ ମାମଲା ରୁଜୁ କରି ତଦନ୍ତକୁ ଶିଥିଳ କରି ଚୁପ ହୋଇଯାଇଥାଏ । ଏହାର ସୁଯୋଗ ନେଇ ବାରମ୍ବାର ପୋଲିସ ନାକ ତଳୁ ମନ୍ଦିର ଗୁଡିକରୁ ଚୋରି କରି ପୋଲିସକୁ ବାରମ୍ବାର ଚ୍ୟାଲେଞ୍ଜ କରୁଛନ୍ତି ଲୁଟେରା ।

Argus News | argus news | -Argusnews Home: Odisha Latest News, Breaking News, Trending News, Live TV and more