ମାହାଙ୍ଗାରେ ବିଜୁବାବୁ ପ୍ରତିମୂର୍ତ୍ତି ଭାଙ୍ଗିବା ଘଟଣା । ସାମ୍ନାକୁ ଆସିଲା ସାଂଘାତିକ ସତ । ବିବାଦରେ ପୂର୍ବତନ ବିଧାୟକ ପ୍ରତାପ ଜେନା । ଚାଞ୍ଚଲ୍ୟକର ଖୁଲାସା କରିଛନ୍ତି ମୂର୍ତ୍ତି ଭାଙ୍ଗିଥିବା ଅଭିଯୁକ୍ତ ନନ୍ଦକିଶୋର ମଲିକ ଏବଂ ବିଶ୍ୱଜିତ ମହାପାତ୍ର ଓରଫ୍ ରାଜା । ପ୍ରତାପଙ୍କ ଖାସ୍ ବିସ୍ମୟ ମହାପାତ୍ର ଓରଫ ଇଲୁ ମଦ ପିଆଇ ତାଙ୍କୁ ମୂର୍ତ୍ତି ଭାଙ୍ଗିବା ପାଇଁ କହିଥିବା ସେମାନେ ସ୍ୱୀକାର କରିଛନ୍ତି । ଏହାସହ ସୋସିଆଲ ମିଡିଆରେ ଅଭିଯୁକ୍ତମାନେ କ୍ଷମା ପ୍ରାର୍ଥନା କରିଛନ୍ତି । ଇଲୁ ହେଉଛି ପ୍ରତାପ ଜେନାଙ୍କ ଅତି ଖାସ । ପ୍ରତାପ ଜେନା ନିଜେ ପ୍ରତିବାଦ ସଭାରେ କହିଛନ୍ତି, ଇଲୁ ହେଉଛି ମୋ ଲୋକ ।

ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଜୟନ୍ତୀର ଠିକ୍‌ ପୂର୍ବଦିନ ତାଙ୍କର ପ୍ରତିମୂର୍ତ୍ତି ଭଙ୍ଗାଯାଇଥିଲା । ଏହି ଘଟଣାକୁ ନେଇ ମାହାଙ୍ଗା ଅଞ୍ଚଳରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। ଏହା ମାହାଙ୍ଗା ବ୍ଲକ ଭଦ୍ରେଶ୍ୱର ଥାନା ଅନ୍ତର୍ଗତ ଉମର ଗ୍ରାମରେ ଘଟିଥିଲା । ଉମର ଗ୍ରାମର ହନୁମାନ ମନ୍ଦିର ସମ୍ମୁଖରେ ସ୍ଥାନୀୟ ଉତ୍ସାହୀ ବିଜୁପ୍ରେମୀଙ୍କ ଦ୍ବାରା ବିଜୁ ପଟ୍ଟନାୟକଙ୍କର ଏକ ପ୍ରତିମୂର୍ତ୍ତି ସ୍ଥାପନ କରାଯାଇଥିଲା। ଯାହାକୁ ବିଜୁ ଜୟନ୍ତୀ ପୂର୍ବଦିନ ଭଙ୍ଗାଯାଇଥିଲା ।

ଏହି ଘଟଣାରେ ସ୍ଥାନୀୟ ଜନସାଧାରଣଙ୍କ ତରଫରୁ ଭଦ୍ରେଶ୍ୱର ଥାନାରେ ଏନେଇ ଅଭିଯୋଗ କରାଯିବା ସହିତ ଘଟଣାର ତଦନ୍ତ ଏବଂ ଏଥିରେ ସଂପୃକ୍ତ ଥିବା ଅସାମାଜିକ ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି କରାଯାଇଥିଲା।

ସାଲେପୁର ଏସ୍‌ଡିପିଓ ବିରଞ୍ଚି ନାରାୟଣ ପତି ଓ ଭଦ୍ରେଶ୍ୱର ଥାନା ଅଧିକାରୀ ସନ୍ଧ୍ୟାରାଣୀ ସିଂହ ପ୍ରମୁଖ ଘଟଣାସ୍ଥଳରେ ପହଞ୍ଚି ସ୍ଥାନୀୟ ଅଞ୍ଚଳର ମନ୍ଦିର ଓ ବିଭିନ୍ନ ଦୋକାନରେ ଲାଗିଥିବା ସିସି କ୍ୟାମେରା ଯାଞ୍ଚ କରିବା ସହ ତଦନ୍ତ ଆରମ୍ଭ କରିଥିଲେ।