ପୁରୀ: ପୁରୀରେ ସେବାୟତ ଆଦର୍ଶ ଗୁରୁକୁଳ ପ୍ରକଳ୍ପ ନିର୍ମାଣ ପାଇଁ ୨୦୧୪ ଶ୍ରୀମନ୍ଦିର ପରିଚାଳନା କମିଟି ବୈଠକରେ ନିଷ୍ପତ୍ତି ହୋଇଥିଲା । ମହାପ୍ରଭୁଙ୍କ ସେବାପୂଜା ଓ ନୀତିକାନ୍ତି ଠିକ୍ ସମୟରେ ସମ୍ପନ୍ନ କରିବାକୁ ଆବଶ୍ୟକ ଆଦର୍ଶ ସେବକ ଗଢ଼ିବାକୁ ରହିଥିଲା ଯୋଜନା । ୨୦୧୪ ରେ ଗଜପତି ମହାରାଜାଙ୍କ ପରାମର୍ଶ କ୍ରମେ ଏହି ପ୍ରକଳ୍ପର ପରିକଳ୍ପନା କରାଯାଇଥିଲା । ଶ୍ରୀମନ୍ଦିର ବଜେଟରେ ୧୦ କୋଟି ଅନୁମୋଦନ ମଧ୍ୟ ହୋଇଥିଲା । ୟା ଭିତରେ ୧୦ ବର୍ଷ ବିତିଗଲାଣି । ଏକାଧିକ ପରିଚାଳନା କମିଟି ବୈଠକ ସରିଛି । ହେଲେ ପ୍ରକଳ୍ପରେ ଇଟା ଖଣ୍ଡେ ବି ପଡ଼ିପାରୁନି ।

ଗୁରୁକୁଳ ପାଇଁ ସୁପ୍ରିମକୋର୍ଟ ୬ କୋଟି ୧୯ ଲକ୍ଷ ୮୯ ହଜାର ଟଙ୍କା ପ୍ରଦାନ କରିଥିବା ବେଳେ, ଅବଢ଼ା ଯୋଜନାରେ ତତ୍କାଳୀନ ରାଜ୍ୟ ସରକାର ୨୦ କୋଟି ଟଙ୍କା ବ୍ୟୟ ବରାଦ କରିଥିଲେ । ୩୨ ଏକର ଜମିରେ ଖେଳ ପଡିଆ, ଏକାଡେମିକ୍ ସେକ୍ସନ, ମନ୍ଦିର, ହଷ୍ଟେଲ ନିର୍ମାଣ ପାଇଁ ରହିଥିଲା ପ୍ରସ୍ତାବ । ସେବାୟତ ପିଲାଙ୍କ ପାଇଁ ୫୦ ପ୍ରତିଶତ ସିଟ ସଂରକ୍ଷଣ ରଖିବାକୁ ହୋଇଥିଲା ଯୋଜନା ।

୨୦୨୨ ଅକ୍ଟୋବର ରେ ଏହା ସୋସାଇଟି ପଞ୍ଜୀକୃତ ହୋଇଥିଲା । ଡିସେମ୍ବର ୨୦୨୨ରେ ବିର୍ଲା କମ୍ପାନୀ ସହ MOU ସ୍ବାକ୍ଷର ହୋଇଥିଲା । ହେଲେ ସେବାୟତଙ୍କୁ ମାର୍ଜିତ ଓ ଭବ୍ୟ ଶିକ୍ଷା ଦେବାର ସ୍ବପ୍ନ ଦେଖାଇ ଫେଲ ମାରିଲେ ତତ୍କାଳୀନ ସରକାର । ସେପଟେ ଗତ ସେପ୍ଟେମ୍ବରରୁ କାର୍ଯ୍ୟକାଳ ସରିଥିବା ଶ୍ରୀମନ୍ଦିର ପରିଚାଳନା କମିଟି ଏଯାବତ୍ ପୁନର୍ଗଠନ ହୋଇନଥିବାରୁ ପ୍ରକଳ୍ପର ଅନିଶ୍ଚିତତା ବଢ଼ିଛି । ରାଜ୍ୟରେ ସରକାର ବଦଳିଛି, ଏବେ ଗୁରୁକୁଳ ପ୍ରକଳ୍ପର ଭାଗ୍ୟ କଣ ହେବ, କଣ ନିଷ୍ପତ୍ତି ନେବେ ସରକାର ଓ ଆଦର୍ଶ ସେବାୟତ ଗୁରୁକୁଳ ନିର୍ମାଣ କେତେ କ୍ରିୟାନ୍ବୟନ ହେବ ତାହା ଏବେ ବଡ଼ ପ୍ରଶ୍ନ ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV